— 174 —
orangnja berlakoe sebagi Porthos, orang moesti bahasaken Monseigneur padanja dan ia poenja roema moesti diseboet satoe astana.“
Grobak sampi djalannja sanget plahan, hingga d'Artagnan dan Planchet jang toeroet di blakang djadi ilang sabarnja.
„Ini djalan djadi menoedjoe ka tempatnja toean graaf dan djikaloe kita toeroet sadja ini djalan, kita tiada nanti bisa djadi kesasar lagi?“ menanja d'Artagnan pada itoe toekang grobak.
— „Tiada bisa kesasar, toean, toean boleh djalan troes sadja. Kira kira stenga mijl lagi di sebla kanan ada keliatan satoe astana. Djikaloe tiada kehalangan itoe poehoen poehoen, dari sini toean soeda bisa liat. Itoe boekan astana Bragelonne, tapi astana La Vallière Toean moesti liwatken itoe tempat dan kira kira ampat tembakan lagi djaoenja ada satoe roema dengen temboknja poeti di atas satoe boekit dan sapoeternja ada satoe kebon besar, di itoe astana ada tinggal toean graaf de la Fere.“
— „Kau bilang stenga mijl, apa itoe stenga mijl pandjang? Akoe menanja begitoe, kerna satoe mijl di kota dan satoe mijl di pagoenoengan ada sanget berbeda djaoenja.“
— „Kira kira sapoeloe minuut boeat toean poenja koeda lari.“
D'Artagnan mengoetjap trima kasi pada itoe toekang grobak dan lantes lariken koedanja, tapi lantaran itoe pikiran jang ia doega Athos soeda roesak badannja lantaran minoem, tiada bisa ilang dari otaknja d'Artagnan, dan sabenernja ia rasa koerang senang boeat liat iapoenja sobat jang ia sanget tjinta dan inget boedinja ada dalem itoe kesoesahan, d'Artagnan tahan koedanja dan kasi djalan sedikit plahan, sedeng ia
