— 172 —
ia minoem selamanja dengen tiada berkata satoe apa, betoel sebagi ia maoe bilang pada itoe minoeman: Masoek, anggoer, dan bikin ilang akoe poenja kesel.“
— „Sekarang akoe bilang apa jang kita nanti dapet liat. Itoe orang bangsawan jang matanja tjeli, jang dandanannja tjakep dan begitoe pantes keliatannja djikaloe toenggang koeda, sekarang tentoe soeda beroba djadi satoe orang toea jang soeda bongkok dan idoengnja telah djadi mera. Kita nanti dapetken ia soeda reba di roempoet pekarangan astananja dan matanja jang goerem nanti awasin pada kita. Djikaloe akoe boekan inget boedinja itoe graaf, sasoenggoenja, Planchet, akoe tiada nanti soeka pergi liat satoe pertoendjoekan jang boleh bikin akoe poenja hati djadi sedi.“
Planchet gojang kepalanja, kerna ia djoega kwatirken itoe perkara
„Dan laen dari itoe,“ kata poela d'Artagnan, „akoe kwatir ia ada dalem soesa djoega, kerna ia tiada nanti oeroes oewangnja dengen betoel, sedeng Grimaud toeroet minoem sampe mabok sebagi toeannja.“
„Akoe doega nanti dapetken itoe doea orang lagi selojongan dan mengatjo,“ kata Planchet.
— „Jang akoe sanget boeat kwatir, jaitoe lantaran lagi poesing ia maoe djoega toeroet kita orang; djikaloe sampe kedjadian begitoe roepa, betoel satoe tjilaka besar bagi Porthos dan akoe. Tapi djikaloe ia minoem mabok, akoe nanti tinggalken padanja dan pada waktoe ia soeda sedar kombali, ia nanti bisa pikir lagi itoe perkara dan mengarti ia poenja sala.“
— „Maski begimana djoega keada'annja, sigra kita nanti bisa menjaksiken sendiri, kerna
