— 171 —
tjampoer orang dan taoe djoega dari hal perkara politiek, hingga ini doea orang bisa bitjara satoe pada laen, boekan sebagi satoe toean dengen pengikoetnja.
Koetika iaorang soeda deket Blois, d'Artagnan tiada bisa tahan lagi apa jang ia kwatirken dan kata:
„Akoe lebi doeloe taoe, daja oepajakoe pada toean Athos tiada nanti berasil; tapi akoe wadjib pergi ketemoeken padanja, akoe poenja sobat lama jang boleh dianggep sebagi satoe orang jang paling baek hati boedinja.“
„O! toean Athos ada saorang bangsawan moelia!“ kata Planchet.
― „Kau djoega pikir begitoe?“
― „Toean Athos biasa rojaalken oewangnja sebagimana ia biasa rojaalken pelornja pada moesoe dan djikaloe ia tjaboet pedangnja, ia berboeat itoe perkara dengen tingka lakoe pantes sekali. Apa toean masi inget itoe duel jang dibikin di blakang klooster dengen itoe orang orang Inggris? O, tingka lakoenja toean Athos itoe koetika keliatannja sanget angkoe, betoel sebagi satoe Radja, koetika ia berkata pada tandingannja: „Kau minta taoe akoe poenja nama jang sedjati, toean, tapi djoestroe lantaran itoe perkara akoe djadi kepaksa boeat boenoe pada kau“, dan tiada lama poela tandingannja soeda reba di tana dengen tiada bisa berkoetik lagi. O, akoe oelangken lagi, toean, toean Athos haroes diseboet satoe orang bangsawan moelia.“
― „Apa jang kau bilang semoea betoel, Planchet, tapi itoe semoea kebaean sekarang tentoe soeda abis, lantaran ia langgar satoe perkara.“
― „Akoe masi inget itoe perkara, ia soeka minoem. Tapi ia tiada minoem sebagi laen orang,
