— 170 —
Porthos jang soeda anter sobatnja djalan sampe di wates tananja, kasi slamet djalan pada d’Artagnan.
Sedeng d’Artagnan djalan menoedjoe ka Villers Cotterets, ia pikir dalem hatinja:
„Sedikitnja satoe orang akoe bisa bawa mengadep pada Kardinaal. Porthos poenja pengawakan ada menjataken ia masi ada poenja tenaga besar dan djikaloe Athos djoega soeka toeroet, djadi kita bertiga dan kita boleh ketawaken pada Aramis, jang tiada laen pakerdjaännja, tjoema tjinta njonja njonja eilok sadja.“
Dari Viller Cotterets d’Artagnan toelis pada Kardinaal, begini:
„Monseigneur, akoe soeda dapet satoe orang jang tenaganja boleh dibandingken dengen doea poeloe orang. Akoe brangkat ka Blois, kerna graaf de la Fere ada tinggal di astana Bragelonne jang pernanja deket Kota Blois.“
Seabisnja kirim itoe soerat d’Artagnan lantes troesken perdjalanannja ka Blois
XV.
Perdjalanan dari Viller Cotterets ka Blois ada djaoe djoega, tapi ini perkara tiada diboeat kwatir oleh d’Artagnan, kerna ia poenja koeda djoega soeda brenti bebrapa hari di istalnja Porthos, maka dengen pikiran senang ia menoedjoe ka Blois jang ia moesti sampeken dalem tempo lima hari.
Soepaja di djalan tiada djadi iseng, Planchet djalanken koedanja di sebla d’Artagnan jang tiada anggep dirinja sebagi toean lagi dari Planchet, sedeng ini pengikoet, jang memang dasarnja tjerdik, seabisnja ia brenti bekerdja pada d’Artagnan lantaran perniagaännja djadi banjak
