— 16 —
„Begitoe betoel, Guitaut," kata Kardinaal pada officier jang toenggang koeda, „akoe liat, maski kau soeda beroemoer anempoeloe lima taon, kau masi sebet dan radjin. Apa kau bilang pada itoe anak moeda?
„Monseigneur," menjaoet Guitaut, bilang padanja, keadaan pada ini waktoe ada sama dengen keadaän pada waktoe Ligue, jang koetika akoe masi anak anak akoe soeda denger tjeritanja. Apa Monseigneur soeda dapet taoe, di djalanan Saint Denis dan Saint Martin rahajat negri soeda bikin tegoe itoe djalanan?"
„Dan apa Comminges soeda menjaoet, Guitaut?" menanja Kardinaal.
„Monseigneur." kata Comminges, „akoe djawab padanja, boeat bikin sama lagi dengen tempo Ligue, ada koerang satoe perkara, jaitoe hertog dari Guise. Tapi perkara bagitoe orang tiada bisa kerdjaken doea kali."
„Tida, tapi iaorang soeda diriken satoe Fronde, sebagimana iaorang soeda bilang," kata Guitaut
„Apa itoe satoe Fronde? menanja Mazarin.
— „Namanja iaorang poenja pakoempoelan, Monseigneur"
— „Dari mana iaorang dapet itoe nama?"
— „Roepa roepanja, baroe ini toean Bachaumont koetika bitjaraken ini oeroesan di astana, soeda andeken orang orang peroesoehan sebagi anak anak sekola jang maen bandringan di tepi soengi, jaitoe batoe diïket di sa potong tali boeat dilemparken, iaorang lantes lari apabila ada keliatan satoe commissaris politie, tapi baroe sadja itoe orang politie pergi, iaorang lantes berkoempoel lagi. Lantaran itoe bitjaraän iaorang namaken pakoempoelan peroesoehan Fronde dan orang orang jang toeroet bikin riboet Fron-
