— 15 —
benernja tiada taoe boeat apa itoe lotjeng moesti diboenjiken.
d'Artagnan kepalaken barisannja dengen tiada kwatir satoe apa; djikaloe ada orang orang berkoempoel di tenga djalan, ia lariken koedanja menoedjoe itoe koempoelan dan sebagi itoe orang orang taoe siapa adanja jang menerdjang, iaorang lantes minggir dengen tiada berkata satoe apa. Kardinaal kagoem liat d'Artagnan tinggal begitoe sabar, ia doega, sebab ini officier soeda biasa hadepken bahaja di medan prang, maski begitoe tiada oeroeng itoe perkara bikin Kardinaal djadi taro enda pada d'Artagnan poenja hati taba dan kegagahan.
Koetika iaorang sampe pada djalanan des Sergents, di mana ada satoe barisan djaga, orang djaga treaken: „Werda ?" d'Artagnan menjaoet dan hampirken Kardinaal boeat menanja perkataan resia boeat itoe malem, kamoedian ia dateng pada jang djaga dan kata, „Louis" dan .Rocroy."
Sasoedanja bitjara sedikit perkataän, d'Artagnan tanja, apa boekan toean de Comminges jang kepalaken itoe barisan.
Soldadoe djaga oendjoek satoe officier jang lagi berdiri bitjara pada satoe toean jang toenggang koeda. Itoe officier ada luitenant Comminges.
„Itoe dia toean de Comminges," kata d'Artagnan pada Kardinaal.
Mazarin madjoeken koedanja pada itoe doea orang jang lagi bitjara; d'Artagnan moendoer bebrapa tindak, tapi dari kelakoeannja itoe doea toean toean jang angkat iaorang poenja topi, d'Artagnan dapet kenjataän, iaorang soeda kenalken Kardinaal.
