— 17 —
duers. Sekalian perkara dinamaken fronde, kerna itoe jang djadi model jang paling baroe; ada roti fronde, topi fronde dan laen laen barang. Njanjian djoega ada lagoe fronde, tjoba Monseigneur denger itoe orang jang lagi menjanji."
Itoe koetika dari satoe djendela jang baroe diboeka kadengeran orang menjanji itoe lagoe dengen menjindir pada Mazarin.
„Tiada taoe maloe itoe orang!" kata Guitaut.
„Monseigneur," kata Comminges jang masi oering oeringan, sebab loekanja dan sanget ingin bales sakit hati, apa Eminentie soeka akoe kirim satoe pelor pada itoe orang, boeat adjar, soepaja laen kali ia menjanji lebi baek ?"
Seabisnja berkata begitoe Comminges kasi kaloear iapoenja pistol.
„Djangan, djangan ! treak Mazarin. „Diavolo! sobat, dengen begitoe roepa kau nanti bikin ini perkara djadi lebi koesoet! Akoe kenal betoel orang Frans poenja adat, sama djoega akoe jang soeda kasi iaorang dateng di ini doenia satoe persatoe; iaorang menjanji, itoe mengartinja iaorang nanti soeka bajar djoega. Doeloe koetika ada Ligue jang Guitaut baroe tjeritaken, semoea pergi sembajang di gredja sadja, maka sekalian oeroesan djadi kepiran. Guitaut, mari toeroet akoe, kita nanti liat apa di Quinz Vingts dan di djalanan des Sergents djoega didjaga baek."
Sasoedanja manggoet pada Comminges, Kardinaal hampirken d'Artagnan jang lantes djalan di moeka barisannja, di sebla blakangnja Kardinaal dengen Guitaut dan barisan musketier paling blakang.
Iaorang djalan ka djalanan Saint Honore, dimana ada keliatan bebrapa banjak koempoelan
Doeapoeloe taon blakangan
3
