— 162 —
bisa dapet kenjata'an, ia ada saorang jang beroentoeng.
„Ha, ini orang jang akoe tjari,“ kata d'Artagnan dalem hatinja, „tapi ia blon dapet taoe, apa sebab akoe dateng di sini dan apabila ia soeda dapet taoe, boleh djadi djoega ia nanti rasa dirinja tjilaka lagi.“
Mousqueton tinggal berdiri bebrapa tindak djaoenja dari d'Artagnan jang lantes doedoek di satoe bangkoe dan gapeken Mousqueton boeat dateng lebi deket padanja.
„Toean,“ kata Mousqueton jang djadi brani lantaran d'Artagnan panggil padanja, „akoe ada poenja satoe perminta'an.“
„Tjoba kasi denger,“ kata d'Artagnan.
― „Akoe tiada brani, akoe kwatir toean nanti kira lantaran soeda djadi senang akoe djadi bertingka.“
― „Djadi kau rasa diri kau beroentoeng, Mousqueton ?“
― „Sampe beroentoeng, toean, tapi toean bisa bikin akoe djadi lebi beroentoeng lagi.“
― „Tjeritaken apa jang kau ingin dan djikaloe akoe bisa toeloeng, lebi doeloe akoe berdjandji soeka toeloeng kau dalem itoe perkara.“
― „Itoe perkara tjoema bergantoeng pada toean sendiri.“
― „Akoe menoenggoe kau tjeritaken itoe perkara.“
― „Jang akoe maoe minta pada toean, jaitoe soepaja djangan panggil akoe Mousqueton, tapi Mouston sadja. Moelai akoe diangkat djadi intendant dari Monseigneur du Vallon, akoe soeda roba nama djadi Mouston, kerna itoe nama didengernja ada lebi pantes dan ada lebi tjakep boeat bikin orang orang jang ada di bawa
