— 159 —
soeda dapet persen dari sala satoe familienja."
— „Itoe tana namanja?"
— „Bragelonne. Apa kau bisa mengarti itoe perkara, sobat? Athos jang memang soeda moelia sebagi satoe Keizer, trima, satoe warisan atas mana ada berikoet satoe gelaran graaf? Apa ia maoe bikin dengen gelaran begitoe banjak? Graaf de la Fere, graaf de Bragelonne.“
— „Dan ia tiada ada poenja anak."
— „Hm! akoe denger ia soeda poengoet satoe anak jang roepanja sama sekali dengen ianja."
— „Athos, kita poenja Athos jang begitoe alim? Apa kau soeda taoe ketemoe padanja?
— „Tida"
— „Akoe. nanti bawa kabar dari kau poenja keada’an, tapi akoe sanget kwatir, ia soeda djadi roesak lantaran anggoer jang tiada brentinja ia minoem."
„Itoe betoel, ia sanget soeka pada minoeman kras,“ kata Porthos.
„Dan antara kita orang, ia jang paling toea," kata d’Artagnan.
— „Oemoernja tiada berbeda bebrapa taon dari kita, tapi moekanja lantaran tiada soeka ketawa djadi keliatannja lebi toea."
— „Itoe betoel. Akoe nanti boedjoek padanja, djikaloe ia soeka ada baek sekali, tapi djikaloe ia tiada soeka, kita berdoea sadja brani bertaroeng pada doeablas orang."
„Tapi djikaloe Athos toeroet," kata Porthos dengen tersenjoem lantaran inget perkara doeloe, „kita nanti bisa lawan moesoe tiga losin banjaknja, apapoela sebagimana kau bilang baroesan, kita poenja pakerdja’an nanti ada sanget berat."
— „Berat boeat orang jang blon biasa, boekan bagi kita orang."
