— 14 —
Kardinaal pake itoe topi dan hampirken d'Artagnan.
„Kau tentoe ada sedia koeda jang soeda diselaken ?" menanja Kardinaal.
— „Ja, Monseigneur."
— „Mari kita djalan."
— „Brapa orang moesti anter Eminentie ?"
— „Kau bilang, ampat orang tjoekoep boeat lawan saratoes orang perossoehan dan kerna boleh djadi kita ketemoe doearatoes orang, baek kau bawa delapan orang sadja."
— „Begimana Monseigneur kira baek."
— „Djalan doeloe, akoe toeroet dari blakang; ja djangan begitoe, lebi baek kita djalan dari sini. Bernouin, soeloein djalan."
Kardinaal ambil satoe koentji dari medja toelisnja, boeka satoe pintoe; Bernouin dengen bawa lilin djalan di depan, tiada sebrapa lama lagi iaorang ada di pekarangan dari Palais Royal.
− − − −
II.
Sapoeloe minuut kamoedian satoe barisan ketjil djalan kaloear dari blakang roema komedie astana ka djalanan des Bons Enfants.
Dalem kota keliatannja blon beres, bebrapa koempoelan orang orang djalan sana sini dan saben saben ada barisan ronda iaorang awasin dengen tersenjoem, sebagi iaorang maoe kasi mengarti, pada itoe waktoe rahajat negri tiada soeka merenda sadja sebagimana biasa. Kadang kadang kadengeran swara riboet dari laen djoeroesan dan dari djoeroesan djalanan Saint Denis ada kadengeran swara orang menembak, sedeng lotjeng diboenjiken, maski iaorang sa-
