— 157 —
djadi toeroet iaorang poenja kemaoean, dan tinggal setia."
— „Djadi kau sampe sekarang masi tinggal setia?"
— „Setia pada Radja, setia pada Sri Ratoe dan pada Kardinaal, dan akoe soeda tanggoeng, kau djoega ada setia pada iaorang.“
— „Tapi boeat itoe perkara kau bilang, lebi doeloe kau soeda bikin satoe perdjandjian?“
— „Perdjandjian bagoes sekali! Kau ada banjak oewang, boekan?Ampatpoeloe riboe francs sataon, kau bilang."
Porthos djadi tjoeriga.
„Sobat," kata ia, „oewang selamanja tiada bisa terlaloe banjak. Njonja du Vallon koetika meninggal soeda tinggalken oeroesannja sanget koesoet dan akoe boekan saorang jang pande mengitoeng, djadi tjoema ada sampe sadja oewang boeat akoe liwatken tempo sahari hari."
„Ia kwatir akoe dateng boeat pindjem iapoenja oewang," d’Artagnan pikir dalem hatinja, kamoedian ia berkata:
„O, sobat, djikaloe kau masi ada dalem soesa ada lebi baek lagi!"
„Kenapa begitoe ?" menanja Porthos.
„Kerna Zijne Eminentie nanti kasi apa jang kau jngin: tana, oewang dan gelaran," Kata d’Artagnan.
„Wel! Wel! Wel!" kata Porthos dengen boeka matanja djadi besar.
„Pada masa Kardinaal jang doeloe,” kata d’Artagnan lagi, „kita tiada ada itoe djalan boeat dapet keoentoengan, itoe perkara sabenernja ada sanget perloe; tapi akoe boekan bitjara boeat kau jang ada poenja keasilan ampatpoeloe riboe franc.”
