— 156 —
— „Rochefort. Apa kau masi inget itoe orang?"
— „Setan! Tentoe akoe masi inget itoe orang, lantaran siapa kita soeda dapetken banjak bahaja, tapi kamoedian kau soeda toesoek padanja sampe tiga kali, jang memang haroes ia dapet."
— „Tapi apa kau taoe ia soeda djadi kita poenja sobat ?"
— „Tida, akoe tiada dapet taoe itoe perkara, djadi ia tiada tinggal sakit hati pada kau ?"
— „Kau sala, Porthos, akoe jang tiada tinggal sakit hati padanja."
Porthos blon mengarti, apa d'Artagnan mao bilang dengen itoe perkata'an, tapi pembatja tentoe masi inget, memang Porthos tiada begitoe tjerdik sebagi d'Artagnan.
— „Djadi sebagimana kau bilang baroesan, graaf de Rochefort soeda bitjara dari akoe pada Kardinaal," kata Porthos.
— „Ja dan pada Sri Ratoe djoega."
— „Begimana pada Sri Ratoe?"
— „Boeat bikin soepaja kita djadi pertjaja padanja, Sri Ratoe soeda seraken pada Mazarin itoe tjintjin jang doeloe akoe telah dapet dari Sri Baginda dan kamoedian kita soeda djoeal, tapi setaoe lantaran begimana, itoe tjintjin bisa djato kombali di tangannja Sri Ratoe."
— „Menoeroet akoe poenja pikiran," kata Porthos, „ada lebi baek djikaloe Sri Baginda kasi itoe tjintjin pada kau."
„Akoe djoega pikir begitoe," menjaoet d'Artagnan, „tapi apa maoe dikata, soeda loemranja Radja radja dan Ratoe ratoe ada poenja adat di loear biasa, tapi kerna kahormatan besar dan harta ada di tangan iaorang, kepaksa orang
