— 154 —
ada saorang sanget beroentoeng, Porthos"
— „Perkara pantjing ikan akoe seraken peda Mousqueton, itoe perkara ada pakerdja’annja orang orang jang deradjatnja renda; akoe kadang kadang soeka djoega memboeroe, jaitoe djikaloe akoe lagi iseng akoe reba di sala satoe bangkoe marmer jang ada di kebon dan tembak klintji atawa haas; akoe poenja andjing Gredinet jang soeda diadjar pande nanti ambil dan bawa dateng pada akoe klintji jang akoe soeda kena pasang.“
— „Senang sekali plesir begitoe roepa!"
„Betoel senang," menjaoet Porthos dengen mengela napas lagi.
D’Artagnan tiada bisa itoeng lagi, brapa kali Porthos soeda mengelap napas.
„Dan djikaloe diprenta," kata poela Porthos, „itoe Gredinet lantes bawa klintjinja pada koki."
— „O, itoe andjing mengarti betoel.“
— „Ja, tapi akoe soeda moelai bosen pada itoe Gredinet dan djikaloe kau soeka, kau boleh dapet itoe andjing; mari kita bitjaraken lagi kita poenja oeroesan."
— „Dengen senang hati, tapi lebi doeloe akoe maoe kasi inget pada kau, boeat itoe perkara kau moesti roba kau poenja pengidoepan dan akoe harep, kau kamoedian tiada nanti seselken, akoe soeda beedjoek kau berboeat itoe perkara."
— „Apa kau maoe bilang dengen itoe perkata’an?"
— „Berpake lagi pakean prang, bawa sendjata, djalanken roepa roepa perkara jang berbahaja, kasi tinggal sedikit dari kita poenja dara di djalanan; pendeknja, djalanken lagi satoe
