— 153 —
„Itoe binatang berboeat begitoe boeat kebaeannja sendiri, itoe perkara orang bisa dapet kenjata’an, djikaloe liat iapoenja badan." Kamoedian dengen swara plahan, ia kata: „tapi ia tinggal setia pada akoe."
„Dan ia bahasaken toeannja Monseigneur," d’Artagnan pikir dalem hatinja.
„Soeda, Mouston,” kata Porthos.
„Kau seboet namanja Mouston?" kata d’Artagnan, „O! boeat bikin lebi pendek; Mousqueton ada lebi pandjang, djadi lebi lama dikaloearkennja."
„Botoel,“ kata Porthos, „itoe nama mengartinja pendjaga, sedeng kita lagi bitjara itoe kerbo dateng masoek."
— „Akoe kira baek kita moendoerken doeloe ini bitjara’an; akoe kwatir, kau poenja orang nanti dapet doega ini perkara dan boleh dijadi djoega deket ini tempat ada mata mata moesoe. Kau tentoe mengarti, Porthos, perkara jang kita maoe bitjaraken ada sanget penting."
— „Lebi baek kita djalan djalan di kebon boeat bitjara, sekalian bikin toeroen barang makanan jang kita baroe dahar."
— „Dengen senang hati."
Kerna iaorang soeda dahar sampe kenjang, lantes iaorang djalan kaloear ka satoe kebon jang dirawat baek, di itoe tempat sengadja di bikin gombolan roempoet roempoet, dalem mana ada keliatan bebrapa klintji semboeni.
„Demi Kahormatankoe," kata d’Artagnan, „djikaloe di itoe empang ada djoega banjak ikannja sebagi itoe klintji jang kelijatan di gombolan gombolan, ini taman boleh dibilang sampe baek dan djikaloe kau masi soeka pada memboeroe dan pantjing ikan, kau boleh dianggep
Doeapoeloe taon blakangan
90
