— 144 —
orang, tapi ia blon inget, di mana dan siapa adanja itoe orang.
„Ja, Allah, toean!" kata Planchet jang soeda depet doega siapa adanja itoe toean, „apa boleh djadi begitoe ?"
Lantaran dapet denger swaranja Planchet, dengen angkoe itoe orang menengok dari atas koedanja, hingga d’Artagnan dan Planchet lantes bisa liat moekanja itoe orang gemoek dan matanja mengkilap, sedeng moekanja ampir sama dengen Mousqueton.
Sabenernja itoe orang ada Mousqueton, pengikoetnja Porthos, jang soeda djadi sanget gemoek, Mousqueton adatnja sanget berbeda dengen Bazin jang di hadepan orang banjak sengadja sebagi ia tiada kenal pada d’Artagnan, tapi Mousqueton koetika ia dapet liat d’Artagnan, lantes ia merosotken dirinja dari atas koeda dan dengen iapoenja topi di tangan ia hampirken pada d’Artagnan, hingga itoe orang orang jang lebi doeloe begitoe hormat pada Mousqueton, djadi lebi hormat lagi pada ini tetamoe.
„Toean d’Artagnan! toean d’Artagnan!" Mousqueton oelangken perkata’annja, sedeng moekanja djadi mera, „toean d’Artagnan! O, begimana senang hatinja akoe poenja toean, toean tana dari Bracieux dan Pierrefonds, djikaloe ia dapet liat pada toean."
Mousqueton jang baek! Djadi kau poenja toean ada di sini?" kata d’Artagnan.
„Toean ada di atas iapoenia tana," menjaoet Mousqueton.
„Tapi kau keliatannja begitoe tiakep, begitoe gemoek dan seger!" kata d’Artagnan jang djadi kagoem liat itoe orang, jang doeloe biasa tahan lapar, sebab tiada kebagian barang makanan
