— 143 —
Koetika sampe di pinggir oetan d’Artagnan dapet liat di sela goenoeng ada satoe rawa besar, di sepoeternja pinggiran itoe rawa ada bebrapa banjak roema roema, sedeng di satoe tempat jang pernanja ada sedikit lebi tinggi, ada keliatan satoe astana jang tiada brapa besar, tapi sanget enda roepanja.
D'Artagnan doega, boleh djadi Porthos ada tinggal di itoe tempat dan kerna djalanan ada lempeng menoedjoe itoe astana, d'Artagnan lantes djalan menoedjoe ka itoe tempat.
Sapoeloe minuut kamoedian d‘Artagnan sampe di pintoe hek dari besi jang ditjat idjo dengen pake aer mas, deket itoe pintoe ada keliatan satoe toean doedoek di satoe koeda boeloe belang, itoe toean ada berpake pakean warnanja sama dengen warna tjat dari pintoe hek, sedeng di depannja itoe toean ada keliatan bebrapa orang berdiri kasi hormat padanja.
„O," kata d’Artagnan dalem hatinja," apa brangkali itoe dianja toean du Vallon de Bracieux de Pierrefonds? Ja, Allah, kenapa roepanja ia soeda djadi ringkes dari wates ia tiada bernama Porthos lagi!"
„Boekan, toean,“ kata Planchet jang roepa roepanja soeda dapet doega, apa jang d’Artagnan telah pikir dalem hatinja, „toean Porthos tingginja ada anem kaki lebi, sedeng ini orang tiada ada lima kaki tingginja."
„Tapi itoe orang orang manggoet sanget renda boeat hormat itoe toean,“ kata d’Artagnan.
Dengen berkata begitoe d’Artagnan toedjoeken koedanja pada itoe orang jang toenggang koeda dan lagi dihormat oleh bebrapa banjak penggawenja. D’Artagnan rasa soeda taoe liat itoe
