— 132 —
— „Tapi tiada lama lagi toean de Gondy maoe diangkat djadi Kardinaal, itoe (perkara orang soeda mintaken ka Rome."
— „Apa satoe Kardinaal tiada bisa kepalaken balatentara ?“
— „Apa kau kira bisa dapet banjak keoentoengan dari itoe fihak ?"
— „Iaorang nanti dapet banjak bantoean dari orang orang bangsawan jang kekwasa'annja besar."
—„Tapi lebi doeloe pamerenta boleh kasi poetoesan boeat hoekoem iaorang."
— „Itoe poetoesan nanti dibanta oleh parlement dan rahajat negri jang brontak."
— „Boleh djadi itoe perkara bisa berasil, sebagimana kau bilang, tapi orang moesti tjoba pisaken Radja dari iboenja."
— „Brangkali orang nanti berboeat itoe perkara.”
„Tiada bisa djadi !" kata d'Artagnan dengen swara tetep. „Kau sendiri, Aramis, jang kenal betoel adatnja Ratoe Anna van Oostenrijk, apa kau kira, ia nanti loepa, iapoenja poetra ada djadi satoe tanggoengan boeat iapoenja djiwa dan kekwasa'an besar, oleh kerna itoe masa ia maoe dipisa dari poetranja. Boleh djadi Sri Ratoe nanti adjak poetranja toeroet pada fihaknja orang orang bangsawan dan oesir Mazarin, tapi kau djoega taoe, masi ada laen sebab, maka ia tiada nanti seraken Mazarin pada orang banjak."
„Brangkali apa jang kau soeda bilang betoel adanja," kata Aramis, akoe tlada maoe bikin perdjandjian pada siapa djoega."
— „Boekan dengen iaorang, tapi kau boleh bikin perdjandjian dengen akoe."
