239
enak tidoer, dan badannja semingkin hari, djadi semingkin koeroes.
Sekalian boedak boedak jang biasa bawain dia makanan, seringkali dapet lihat Bok Ing itoe ada sedih hati kaloek dia ada rebah atawa ada doedoek di korsi, selamanja ajer mata ada mengoetjoer di moekanja, dan kaloek boedak boedak itoe tanjak apa sebab Bok Ing sedih, selamanja Bok Ing tida menjahoet: berdijem sadja seperti orang jang djadi lingloeng. Boedak boedak itoe rasa tentoe sekali Bok Ing itoe pikirin emak dan bapak jang berpisah djaoeh; dari sebab begitoe, djadi boedak boedak itoe tida begitoe openin sama perkara menangis itoe. Tapi ada Siotjia poenja satoe boedak perampoewan bernama Tjoenhiang jang soedah dapet lihat djoega Bok Ing menangis. Ini Tjoenhiang ada satoe prampoewan moeda jang tjerdik; dia lihat Bok Ing poenja tingkah lakoe seperti orang rindoe, dia djadi merasa, jang di dalem hal itoe tentoe ada rasia. Maka itoe dia lantas pergi di kamarnja Ien Ing Siotjia dengen niatan maoe bilang apa apa, dan itoe waktoe kebetoelan Ien Tug ada doedoek sendirian sadja. Tjoen-hiang dateng padanja, lantas berkata: Siotjia! saja maoe tjerita apa apa sama Siotjia, tapi saja tida brani.
Siotjia berkata: Kaoe bikin tingkah apa begitoe? Kaloek kaoe maoe tjerita apa apa,
