238
Itoe boedak prampoewan lantas kasih taoe. pada Hoedjin, jang Bok Ing ada bitjara begitoe. Hoedjin bilang: Itoe Bok Ing, saorang moeda, ada poenja pikiran bagitoe, itoe baik sekali. Sekarang ini kaoe djangan dateng-dateng lagi padanja; kaloe misti bawain makanan, kaoe soeroe sadja orang lelaki
Pada satoe hari Bok Ing inget jang Hing Goan Siotjia ada kasih padanja satoe toesoek konde. Sadari dia berpisah dengen Siotjia, dia soedah simpen barang itoe baik-baik sekali, dan dari sebab salamanja dia ada banjak kerdja sadja, dia soedah tida dapet tempo boewat inget padjang padjang sama Siotjia. Sekarang dia tida kerdja satoe apa dan hati ada merasa kangen, dia lantas kaloewarken dan boewat main toesoek konde itoe dengen inget pada Siotjia poenja perkataan samoewa, jang Siotjia kataken padanja tempo kasih itoe toesoek konde. Hatinja djadi merasa sedih sekali dan kangen berlipet-lipet. Dan dari sebab dia tjinta sekali sama Siotjia, jang sekarang tida aken tertemoe lagi,― dia merasa takoet nanti loepa Siotjia poenja perkataan; dari itoe dia lantas ambil sapotong kertas, dan sembari mengoetjoer ajer mata dia toelisken samoewa apa jang Siotjia berkata padanja di itoe panggoeng Tiongtaij. Komoedian dari pada itoe, salamanja dia poenja hati ada inget sadja pada Siotjia, sampe dia djadi tida enak makan, tida
