Dimana adanja Allah
177
„Barang jang tentoe ia moesti berboeat,“ balik menjaoet Holbez sembari mesem. „Dan boeat itoe akoe soedah itoeng lama dan taoe lebih doeloe. Apa kaoe kira akoe belon dapet batja bagimana iapoenja pikiran? Apa dikira akoe tida taoe jang ia diam² pandeng akoe satoe pendjoesta serta berpoera-poera? Soedah loemrah, bahoea pendapetan-pendapetan pengatahoean jang baroe bermoela memang selaloe orang hinaken, sangsiken serta tioerigaken tida katoean. Ivan poen tida boleh terlaloe diseselken kaloe ia anggep akoe demikian roepa, kerna ia toch tida banjak beda sebagi manoesia-manoesia biasa sadja—jang pikirannja tjoema berwates di oedjoeng idoeng. Biarlah ia nanti djadi lebih pinter dengen djalannja tempo.“
Bebrapa meniet Holbaz preksa badannja Graaf Ivan.
„Zara, kaoe lebih baek berlaloe dari ini kamar,“ kadengeran.Holbaz menitahken itoe soedara. „Kaoe poenja moeka boeat pertama Ivan melekin matanja djangan ia liat doeloe samentara ini tempo. Dan kaoe,“ ia berpaling padakoe, „boleh tinggal bersama akoe disini.“
Zara menjingkir sebagimana diprentah oleh Holbaz ka iapoenja studio. Lantas Holbaz pegang kadoea tangannja Ivan, awasin moekanja itoe Graaf jang poetiet dengen concentratie penoeh, ia tida oetjapken sepata kata, tapi dari Holbaz poenja sikep jang dijedjak
