292
PENGHIDOEPAN
Dari tempat koeboeran akoe kombali saorang diri ka Villa Mars. Makanan tengah hari soedah tersedia boeat akoe di medja makan jang akoe dabar sendirian kerna Holbaz masi belon poelang boeat oeroesin koeboerannja itoe soedara. Sesaat berselang akoe tengok ia di iàpoenja kamar studie dan dapetken ia selagi doedoek dengen terpekoer. Sebagi satoe anak jang berbakti akoe lantas berloetoet dihadepannja, dan dengen lemboet akoe tjioem iapoenja tangan. Tjepet ia bangoenin akoe, memandeng akoe dengen matanja jang penoch sympathie sambil kamoedian ia bersenjoem:
„Kaoe dateng hendak oetjapken „Slamet tinggal", anakkoe?" ia menanja setjara satoe ajah jang menjinta. „Well!— kaoe poenja kawadjiban disini soedah sampe diachirnja!"
„Banjak trima kasih boeat kaoe poenja boedi besar jang soedah toeloeng akoe dari djoerang penjakit hingga sekarang akoe kombali mendjadi manoesia jang waras — men sana in corpore sano! Dan akoe tida taoe apa bakal djadinja dengen nasibkoe di doenia fanah ini dan jang baka bilah zonder kaoe poenja pengoendjoekan serta peladjaran besar itoe; begitoe djoega akoe tida bisa loepa pada itoe artist moeda jang memboeka djalan, Joseph Cellini!"
Laloe Holbaz bilang djangan anggep tentang pertoeloenganja, kerna iapoenja haloean hidoep memang moesti toeloeng sesama manoesia jang pertjaja dan berdjodo boeat berdjoempa padanja. Malah ia menjataken soekoernja bahoea
