Zonder Lentera/Bab VIII
VIII.
PEPREKSAAN.
Koetika Goedkoop soedah perkenalken Ang Pauw Sian dan Tjia Be Liauw pada de Stijf, itoe commissaris lantes adjak itoe tabib Tionghoa ka satoe kamar terpisah di sablah dalem jang speciaal boeat preksa perkara penting. Itoe kamar, jang pernanja di sablah dari kantoran, ada terpisah sendirian dari laen-laen begian, hingga tida ada orang bisa denger apa jang dibitjaraken. Tan Tjo Lat dan laen-laen tida di-idzinken masoek disitoe, kerna de Stijf hendak lakoeken pepreksaän dengen sendirian.
Sasoedahnja soeroe Ang Pauw Sian doedoek, itoe commissaris moelai bikin pertanjaän begini:
— „Apakah singseh ada poenja anak?‘
— „Ata, ata!“ saoet itoe tabib dengen tersenjoem, kerna pertanjaän begini, ada tjotjok dengen adat kabiasaän Tionghoa dan djadi tanda dari persobatan.
— „Brapa anak?“
— „Am-pwat: tika laki satoe pwan-pwan.“
— „Itoe jang lelaki, jang paling besar oemoer brapa?“
— „Anam walat tauwhoen.“
— „Apakah ia soedah masoek sekola.“
— „Soeta, soeta masoek haktong lay-in tauwhoen pitgiap, say-ia pikit mauw kilim Nanking.“
— „Apakah ia bisa naek fiets?“
— „Ho, lia wisa pekang piet toelit-an tjintjio soei, bauwboet sitkali.“
— „Boekan toelisan jang saja maoe tanja,“ kata de Stijf sasoedahnja berpikir sabentaran. „Jang saja maksoedken apa itoe anak jang paling besar, jang soedah beroemoer anemblas taon, bisa naek roda angin atawa speda?“
— „Ooh, wisa, ton, lia pintat sitkali nahiak sipèla.“
— „Singseh poenja anak jang kadoea brapa oemoernja?“
— „Lima walat tauwhoen.”
— „Dan dia djoega pinter naek spede?”
— „Kaka wisa, ton, pwan-pwan mana wole nahiak sipèla.”
— „Oh, jang kadoea anak prampoean; dan jang katiga brapa oemoer?”
— „Sipoeloe tauwhoen. Jang kitjit anam tauwhoen bolon piki haktong.”
— „Apakah singseh poenja anak-anak jang lelaki ada jang bernama Tjoe Pek San atawa Hong Hiang Tjioe?”
Ang Pauw Sian bengong sabentaran kerna ia merasa bingoeng pada ini pertanjaän, tapi boeat minta tegasken ia tida brani, dan lantes sadja anggep sekarang commissaris maoe moelai bitjara oeroesan penjakit dan obat-obatan.
— „Boetoet, ton, gwan anlak sa-mwa kaloe djiato bwalan saykit gosok Hong Hiang Tjioe, poeloet saykiet minloem Tjoe Pek San, toentoe ba-ik.”
De Stijf tersenjoem, kerna taoe itoe sienshe salah artiken iapoenja pertanjaän. Maka ia lantes ambil djalan jang lebih pendek dengen menanja begini:
— „Siapakah namanja itoe anak paling besar?”
— „Ang Hie Seng.”
— „Apakah ia tida poenja laen nama lagi.”
— „Kaka, ton.”
— „Sekarang saja maoe tanja, lagi kemaren sore tempo toeroen oedjan besar, dari djam anem sampe delapan malem, itoe Ang Hie Seng ada di mana?”
— „Lia nahiak sipèla say-ia soeloe kilim bis-tet sitasihoen oedjian boesat malam poekoet lalapan waloe poelang lomah.”
— „Oh, singseh soeroe itoe anak naek spede pergi di station boeat kirim bistel, lantes toeroen oedjan besar sampe malem djam delapan baroe ia poelang ka roemah?”
— „Boetoet, ton.”
— „Apakah ia pergi sendirian, tida ada bawa kawan?’,
— „Lia piki senlili, auwsin polang lomah sama tam-an satoe.”
— „Oh, tempo itoe anak pergi ka station ia naek spede sendirian, lantes waktoe ia poelang ka roemah dengen berdoeaän sama temennja.” — „Boetoet, ton.’,
— „Itoe waktoe ia berpakean bagimana?”
— „Kolang piliksa, ton.”
— „Dan siapa namanja iapoenja teman.”
— „Say-ia kaka tauwhoe nam-ma.”
— „Nou, baek, singseh boleh toenggoe sadja di loear.”
Sasoedahnja Ang Pauw Sien berlaloe, ia panggil mengadep pada Tjia Be Liauw, jang sasoedahnja disoeroe berdoedoek, ditanja begini:
— „Apakah dalem babah poenja roemah ada tinggal anak-anak moeda antara oemoer 15 dan 18 taon?”
— „Tida ada, toean, saja tinggal tjoemah sama saja poenja njaie dan boedjang-boedjang, tempo-tempo ada djoega tetamoe atawa familie jang menginep.”
— „Apakah kemaren sore di baba poenja restaurant tida ada dateng atawa menginep doea anak moeda?”
— „Jang dateng ada banjak, tapi jang menginep tida ada, toean.”
— „Apakah antara anak-anak moeda jang djadi baba poenja familie, sobat atawa kenalan, tida ada jang bernama Foe Yong Hay dan He Wan Tja?” Tjia Be Liauw bengong sabentaran, achirnja ia menjaoet.
— „Itoe boekan nama orang, toean, itoe nama makanan; kemaren saja kirim sama toean tiga roepa, jaitoe Foe Yong Hay, He Wan Tja dan Mi Shoa Thung, tapi jang masak boekan saja, saja poenja njaie, itoe waktoe saja masih tidoer, tida taoe satoe apa, kaloe saja taoe tentoe saja djaga baek tida kasih tjampoerin kepiting boesoek. Tadi saja soedah labrak sama dia, itoe prampoean memang koerang adjar sekali, saja harep toean soeka preksa biar adil, jang saja tida . . . .”
— „Hei, soedah! djangan bitjara apa jang saja tida tanja!” membentak de Stijf. „Sekarang saja tjoemah maoe taoe, apa kowe tida kenal anak-anak moeda jang pake itoe nama Foe Yong Hay dan He Wan Tja?”
— „Tida, toean.”
— „Apakah kemaren sore, kira djam delapan malem, sasoedahnja toeroen oedjan besar, tida ada dateng doea anak moeda dengen naek fiets di Soedi Mampir?”
— „Tida ada, toean, sebab itoe waktoe ada oedjan, siang-siang itoe restaurant saja soedah toetoep.”
— „Nah, soedah, boleh poelang sekarang.“ Tjia Be Liauw djadi sanget merasa heran jang itoe commissaris tiada seboet satoe apa dari perkara makanan boesoek. Boeat abisken penasaran, ia braniken hati aken menanja
— „Apakah toean tida maoe tanja dari laen-laen oeroesan lagi sama saja?“
— „Tida.“
— „Saja permisi, toean, saja maoe tanja sedikit sama toean, bagimana toean poenja njonja dan anak, apakah sakitnja sekarang soedah baek dan tida koerang apa-apa?“
— „Tida perloe kowe tjari taoe dari halnja saja poenja njonja dan anak!“ membentak de Stijf; „God verdomme, kowe koerang adjar sekali! lekas pigi dari sini!“
— „Saja, toean, trima kasih toean,” berkata Be Liauw sambil bongkokin badannja, moendoer-moendoer dan manggoet bebrapa kalih, lantes boeroe-boeroe djalan kaloear dengen girang dan hati lega, kerna itoe bahaja heibat jang tadi ia begitoe koeatirken, ternjata tida ada sama sekali. Berbareng dengen itoe, ia merasa menjesel soedah tempiling dan maki-maki pada Sarnah jang kasalahannja, soedah tjampoerin kepiting boesoek, tida menerbitken kasoedahan djelek seperti jang ia kira. Boeat bikin itoe njaie djadi ilang sakit hatinja, ia mampir di satoe toko ketjil, bli disitoe satoe flesch minjak wangi Rosa Centifolia dan satoe doos poepoer, jang ia niat kasih persen pada Sarnah kaloe soedah sampe di roemah. Orang bisa doega sendiri bagimana kaget dan djengkelnja Tjia Be Liauw koetika dapetken itoe „Premier“ soedah maboer, tida kataoean ka mana perginja dengen gondol djoega semoea oewang dan barang berharga.
Samentara itoe, Commissaris de Stijf soedah beber di hadepan Goedkoop dan Tan Tjo Lat hatsilnja iapoenja pepreksaän. Iaorang tida bersangsi lagi bahoea jang lakoeken itoe kadosaän ada Ang Hie Seng dengen kawannja. Goedkoop dan Tan Tjo Lat diprentah panggil itoe anak moeda dan iapoenja kawan jang tida kataoean siapa Damanja.
Tan Tjo Lat lakoeken ini prentah dengen sanget girang, kerna sekarang terboeka djalan boeat ia bersihken dirinja dari itoe sangkaän djelek. Hatinja merasa gemes sekali pada anaknja itoe sienshe dan kawannja, jang kadjoestaännja di hadepan itoe doea politie agent soedah bikin ia, Tan Tjo Lat, dapet banjak poesing dan djengkel. Ia soedah pikir, kaloe ketemoe pada Hie Seng, maoe kasih bebrapa tempiling dan tendangan boeat adjar adat atas iapoenja kalakoean nakal dan pande mendjoesta
Koetika sampe di kampoeng Tionghoa, sablonnja pergi ka roemah obat Gwa Po Tong, ia adjak itoe politie opziener mampir di roemahnja lebih doeloe aken tenggak bebrapa glas brendy. Sasoedah basahken tenggorokannja, lantes iaorang pergi ka itoe roemah obat dimana kaliatan Hie Seng lagi memaen bersama soedara-soedaranja.
Tan Tjo Lat dan Goedkoop masing-masing doedoek di satoe korsi, komoedian panggil itoe anak moeda aken ditanja.
„Seng loe moesti omong teroes terang,“ berkata Tan Tjo Lat dengen moeka bengis dan soeara kakoe, „lagi semalem loe pergi ka mana?“
„Owe kaga ka mana-mana,“ saoet itoe anak dengen roepa takoet.
„Loe djangan djoesta! Loe liat ini apa?“ Tan Tjo Lat angkat toengketnja.
Goedkoop bisikin Tan Tjo Lat aken djangan terlaloe bengis, hanja moesti menanja dengen sabar.
— „Goea dan ini toean politie opziener dateng disini boeat preksa sama loe, kaloe kaga omang teroes terang, loe nanti masoek di boei sekarang djoega, inget baek-baek!“
— „Kenapa? apa salahnja si Hie Seng?“ menanja Njonja Ang Pauw Sian jang menghamperi dari samping pintoe.
— „Entjim poenja anak ini kliwat nakal; semalem dia naek fiets zonder lentera dan brani djoestain politie, abis owe tanja dia bilang tida pergi ka mana-mana, sedeng entjek sienshe sendiri tadi soedah bilang sama toean commissaris ini anak naek spede pergi ka station.“
— „Owe pergi ka station waktoe masih siang, boekannja malem,“ saoet Hie Seng, „owe disoeroe kirim bistelgoed, tapi owe kaga naek spede zonder lentera dan kaga djoestain politie.“
— „Apa loe poenja spede ada lenteranja?“
— „Kaga ada.“
— „Djam brapa loe poelang?“
— „Lantaran oedjan besar, owe diam di station sampe ampir djam delapan, lantes owe naek deeleman bersama si Ke Eng, dan itoe spede owe taro di dalem deeleman. Dari sitoe owe kaga pergi lagi ka mana-mana.“
— „Loe djoesta! loe poelang dengen naek spede zonder lentera, dan tempo ketemoe politie loe kasih nama palsoe. Loe djangan maen gila, nanti goea tampar moeka loe!”
— „Betoel, Seng? kaloe betoel bilang teroes terang sadja sama enko Bek.” kata iboenja.
— „Bagimana owe moesti tjeritain barang jang kaga ada. Betoel owe poelang naek deeleman, tjoba tanja sadja si Ke Eng; owe bajar limablas cent, dia bajar sapitjis.”
— „Inget, kaloe kataoean loe bohong, loe lantes masoek di boewi, kaki tanganloe dirante dan loe dihoekoem pendjara tiga boelan, mengarti?” mengantjem Tan Tjo Lat.
— „Betoel owe poelang naek deeleman, tjoba tanja sadja si Ke Eng,” kata poela Hie Seng sambil meringis dan ketakoetan.
— „Itoe si Ke Eng anak siapa dan di mana tinggalnja?” tanja Tjo Lat.
— „Bapanja entjek Soewing, tinggalnja di Gang Koentianak.”
— „Saja kenal itoe orang,” kata Tjo Lat pada Goedkoop; „itoe Gouw Soewing pakerdjaännja djadi toekang tjet, nanti saja tjari itoe anak disana; sekarang toean brangkat sadja lebih doeloe bawa ini anak ka Commissariaat.” Komoedian ia berkata pada Hie Seng: „Loe moesti toeroet sama ini toean politie opziener sakarang!”
Hie Seng roepanja katakoetan.
„Anak saja maoe diapain. baba Bek?” tanja njonja Pauw Sian.
„Maoe dipreksa, kaloe dia kaga mengakoe lantes masoek boewi,” saoet Tan Tjo Lat.
„Mengakoe sadja sekarang, Seng,” kata iboenja dengen roepa sanget koeatir.
— „Owe poelang betoel naek sado, abis koedoe mengakoe bagimana lagi!”
— „Baba Bek, ini anak sabetoelnja kaga taoe mendjoesta, saja minta baba bek toeloeng, djangan dibawa doeloe, toenggoe sampe entianja poelang,” memoehoen njonja Pauw Sian.
— „Entjek sienshe masih ada di kantoor politie, nanti dia ketemoe disana.” saoet Tjo Lat.
— „Apa dia boekan dipanggil boeat mengobatin?”
— „Boekan, maoe dipreksa dari ini oeroesan, kaloe ini anak kaga mengakoe, doea-doea nanti teroes ditahan?”
— „Ai, Seng, kaloe begitoe bae ngakoe sadja soedah, bilang sadja betoel, djangan sampe entia loe ikoet di-boewi, kesian dia soedah toea, abis ini yothiam siapa njang oeroesin!” meratap njonja Pauw Sian.
— „Njonja djangan takoet,” saoet Goedkoop, „ini perkara ketjil dan politie nanti preksa dengen adil, tapi ini anak moesti toeroet sekarang.”
— „Ja, toean, toeloengin sadja djangan sampe dia masoek di boewi.”
— „Mana iapoenja roda angin? itoe barang moesti dibawa djoega,“ kata Goekoop.
Hie Seng masoek ka dalem, sèrèt iapoenja fiets, laloe pake badjoe dan topi sedia aken mengikoet.
„Nah, dari doeloe goea bilang apa, djangan bli spede, tapi loe maksa djoega, sekarang ini spede bikin tjilaka sama loe,” menjomel njonja Pauw Sian pada anaknja.
Sasoedahnja Goedkoop dan Hie Seng brangkat, Tan Tjo Lat moelai bertindak tjari pada Gouw Ke Eng anaknja Gouw Soewing di Gang Koentianak. Di djalan ia mampir doeloe pada satoe doea kenalannja, pada siapa ia tjerita hal ia soedah bisa terangken perboeatannja doea anak nakal jang naek fiets zonder lentera dan djoestaken pada politie.
„Jang satoe, anaknja sienshe Ang Pauw Sian, owe soedah kena bekoek, dan jang satoe lagi, owe maoe soeroe soesoelin.” kata Tan Tjo Lat.
Begitoelah di itoe sore dalem kampoeng Tionghoa tersiar poela lelakon baroe jang meloekisken katjakepan dan kapandeannja Eerste wijkmeester Tan Tjo Lat.