Zonder Lentera/Bab III
HAL-HAL JANG TIDA ENAK.
Koetika Eerste Wijkmeester Tan Tjo Lat kaloear dari kamar tidoernja, matahari soedah naek tinggi. Dengen tekoek moeka asem dan oering-oeringan ia sèmbat satoe handoek dan pergi ka kamar mandi, di mana ia bertreak dan maki-maki istrinja lantaran saboen jang ia biasa pake sekarang tida ada. Itoe istri dengen berlari-lari lantes bawain itoe saboen jang terletak di deket tempat tjoetji tangan.
„Kenapa itoe saboen dibawa ka sana?” menjengor Tan Tjo Lat.
„Kaga taoe siapa jang angkat,” saoet sang istri,
„Loe moesti taoe, loe moesti preksa! dasar loe males sama djoega babi! Kaloe loa soedah kaga soeka oeroes roemah tangga loe boleh pergi per setan dari sini, goea soedah kenjang liat loa poenja tjetjongor! seratoes anak prawan jang bagoes dan toeroenan pantes goea bisa dapet sekarang, loe taoe? Dasar prampoean kaga taoe diri! kaloe kaga goea jang kesianin, loe sekarang masih mendekam di roemahnja Ma Enok djadi soendel!”
Njonja Tan Tjo Lat menjingkir dari depan soeaminja dengen aer moeka tida berobah. Ia soedah terlaloe biasa satiap hari ditjoetji maki begitoe roepa, malah terkadang ditempilingin dan dilabrak, apalagi kaloe Tan Tjo Lat lagi sedang mabok arak, maka itoe makian jang sanget brutaal, jang bisa bikin laen prampoean djadi nekat aken lantes angkat kaki menjingkir dari itoe roemah di itoe saät djoega, boeat ia tida ada arti dan rasanja apa-apa, lantaran soedah kabiasaän. Laen dari itoe, ia boekan istri kawin, hanja piaraan, jang toeroet pada Tan Tjo Lat koetika soedah djanda dalem kaädaän sanget melarat, dengen mempoeniai bebrapa anak jang masih ketjil. Banjak taon ia soedah ikoetin Tan Tjo Lat sadari koetika ia masih memboeaja sampe sekarang ia soedah djadi Eerste Wijkmeester. Maskipoen diperlakoeken begitoe kasar hingga tida berbeda dari satoe boedjang prampoean, tapi ia teroes tinggal bersabar, boekan sadja lantaran soedah biasa ia trima itoe tjatjian dan hinaän, hanja kerna ini njonja, sabagi djoega kabanjakan orang-orang prampoean jang tjoepet, ada poenja kabanggaän boeat dapet panggilan „Njonja Bek”, apalagi kaloe di roemahnja kadatengan istri dari orang politie dan prijaie-prijaie, jang briken kahormatan padanja seperti jang wadjib didapet oleh satoe njonja roemah dan istri dari satoe Eerste Wijkmeester. Kaloe sekarang ia tinggalkan Tan Tjo Lat, penghidoepannja bakal djadi soeker sekali, kerna familienja ada miskin dan boeat dapet soeami lagi tiada gampang kerna sekarang ia soedah moelai toea. Seperti satoe istri piaraän ia tida ada hak aken minta bagian apa-apa dari barang milik soeaminja. Maka itoe, maskipoen terkadang ia meresa djengkel kaloe diperlakoeken katerlaloean, ia terpaksa trima nasib, paling banjak ia tjoemah bisa koetjoerken aer matanja dan harep biar anak-anaknja — jang didapet dari soeaminja jang doeloe — lekas besar dan djadi orang baek, soepaja ada tempat boeat ia toempangken diri.
Tan Tjo Lat poenja adat memang sanget djelek, apalagi pada orang-orang dalem roemahnja. Tapi ini pagi ada bebrapa lantaran jang membikin ia djadi moengsang-mangsing atawa oering-oeringan. Samalem ia poelang ka roemah dalem kaädaän djengkel. Tan Tjo Lat, jang biasa melajap satiap malem, katanja boeat „meronda dan tangkep pendjahat“, soedah koendjoengin satoe roemah perdjoedian gelap dimana ia ada poenja hoen-gia dan dapetken disana satoe rombongan orang jang lagi asik maen baccarat. Tadinja ia tjoemah hendak mampir sabentaran aken tenggak bebrapa glas brendy ang memang ada tersedia disitoe speciaal boeat angetin peroetnja Engko Bek kaloe ia dateng mampir di waktoe malem boeat mengobrol aken agoelin dirinja sendiri dan boesoekin orang-orang jang ia bentji. Tapi ini sekali, koetika ia menongkrong di samping medja djoedi, hatinja merasa ketarik meliat apesnja orang jang djadi bandar, jang saban-saban kartoe dibalik selaloe mati, hingga toempoekan oewang kertasnja jang tadi begitoe tebel, sekarang perlahan-perlahan moelai tipis. Tan Tjo Lat mengiler koetika meliat orang-orang kantongin oewangnja bandar begitoe gampang. Satjara automatisch, dengen zonder merasa lagi, djari tangannja merogoh ka dalem sakoe, dan tjaboet kaloear salembar oewang kertas dari ƒ 10 jang lantes di lempar ka atas medja boeat toeroet pasang salah satoe kartoe di bagian jang kaliatan sedeng moedjoer.
„Ini pasangan soedah sampe tjoekoep, panggilannja tjoema lima poeloeh“, kata salah satoe pendjoedi.
„Tida perdoeli, goea maoe toeroet pasang!“ kata itoe Engko Bek.
Salah satoe pendjoedi laloe angkat oewang pasangannja, soepaja Tan Tjo Lat bisa toeroet maen. Kartoe-kartoe diïntip dengen perlahan, dan achirnja dengen moeka bersorot girang itoe bandar balikin kartoenja sambil treak „sembilan!“ dan teroes garoek antero oewang jang ada di medja.
Tan Tjo Lat menggêrêng sedikit koetika meliat oewangnja anjoet. Ia rogo lagi sakoenja, dan toeroet pasang lagi ƒ 10, tapi ini pasangan poen mati.
Tan Tjo Lat garoek-garoek idoengnja jang berwarna merah lantaran terlaloe banjak tenggak alkohol. Koetika kartoe moelai dibagi, ia lemparken lagi salembar oewang kertas dari ƒ 25, jang djoega kena digaroek oleh bandar.
Dengen menggrendeng dan menjoempain, sedeng djidatnja bertjoetjoeran kringet, ia ambil dompet oewangnja dan toewang antero isinja, jang terdiri dari oewang perakan, tengahan, talènan dan pitjisan, sama sekali kira berdjoembla ƒ 15, jaitoe sisa dari oewang jang masih katinggalan dalem sakoenja. Ini oewang djoega achirnja kena digaroek oleh bandar.
Dengen banting kaki ia menghamperi medja tempat botol brendy, minoem tiga glas dengen tjepet, lantes balik kombali ka medja djoedi, tinggal menongkrong disitoe liatin orang maen.
Bandar apes kombali; tiga kalih kartoenja mati. Koetika kartoe dibagi poela, Tan Tjo Lat lemparken satoe doos korek api ka atas medja, sambil treak dengen soeara sember: „Lima poeloeh!”
Sang bandar mengawasin sabentaran.
— „Betoel-betoel lima poeloe, engko Bek?”
— „Apa loe kira goea maen gila? Lima poeloe perak goea pasang!”
Kartoe-kartoe dibalik, dan itoe pasangan mati.
Tan Tjo Lat lemparken sigaretnja maski baroe diïsep sedikit, dan koetika kartoe dibagi poela, ia gebrak medja dengen tangannja sambil treak: „saratoes!”
Si bandar merandek dan mengawasin. Ia brenti membagi kartoe, dan berkata: „Owe minta dipasang sama oewang contant”.
„Apa loe kira goea nanti angglap? apa loe kaga pertjaja sama goea?” menjeratak Tan Tjo Lat sambil delikin matanja.
„Boekan begitoe, boekan owe koerang pertjaja sama engko Bek”, saoet itoe bandar, „tapi koerang enak kaloe orang pasang sama omongan sadja, sedeng owe moesti bajar sama oewang contant”.
Tan Tjo Lat dengen tekoek moeka asem, tarik tangan badjoenja saorang tinggi koeroes jang berdiri di sablahnja, sambil berkata: „Beng, kasih goea pake doeloe no-pè!“
„Mana ada, owe soedah kala banjak“, saoet itoe orang dengen roepa koeatir.
— „Kaloe kaga ada loe sadja, Soei, kasih doeloe tje-pé“, kata Tan Tjo Lat pada satoe orang moeda jang berdiri di sebrangnja.
— „Owe-poenja doeit semoeanja blon ada si-tjap“, saoet itoe pamoeda sambil moendoer sedikit.
Tan Tjo Lat berlaloe sabentaran, masoek ka dalem aken samperin toean roemah jang lagi dongeng sama bebrapa orang jang rebah isep madat di satoe kamar. „Piang, loe ada doeit? kasih goea pake tje-pé lebih doeloe“.
— „Mana ada, soedah bebrapa malem disini sepi sadja lantaran oedjan, baroe ini sore ada ramean sedikit“.
— „Tapi goea perloe pake doeit boeat poelangin goea poenja kekalahan“.
— „Allah! boeat apa Engko Bek toeroet maen, anggoeran kita lim disini. Apakah Engko Bek maoe so djoega sedikit? kemaren baroe dateng sapoeloe tail, kiriman jang paling blakang dari Singapore, lebih enak dari jang doeloean, ampir tida berbeda dengen madat kong-pan-gè. Atawa apa brangkali Enko Bek maoe tja-bo? Ma Enok baroe trima sienhwe dari Soekaboemi, nanti owe soeroe panggil“.
Tan Tjo Lat tida menjaoet, hanja balik lagi ka tempat orang berdjoedi dan bertreak: „Kaloe loe kaga kasih goea pasang, nanti goea adoek-adoek ini medja“.
„Memang djoega owe maoe brenti“, saoet si bandar jang lagi beresin kartoe kerna gilirannja soedah abis.
„Goea kaga maoe bajar itoe jang lima poeloe!“ kata Tan Tjo Lat.
„Tida kenapa, owe nanti bikin peritoengan laen kalih sama enko Bek”, saoet si bandar jang lantes ambil topinja, berdjalan ka loear, di-ikoetin oleh bebrapa kawannja. Tan Tjo Lat toeroet ia kaloear, sambil berkata: „Besok loe dateng di roemah, nanti goea bajar”.
Itoe bandar ada satoe pamoeda jang soedah perna dihoekoem boeang lantaran loekain orang sampe pajah. Djadi ia teritoeng satoe „tjabang atas“ jang tida boleh diboeat gegabah. Maski tabeatnja sanget sombong dan pande menggertak, tapi sabetoelnja Tan Tjo Lat merasa djeri aken tjari perkara pada ini satoe orang jang selamanja ada sorèn piso blati di pinggangnja. Dan seperti biasanja semoea orang jang sombong dan besar moeloet, Tan Tjo Lat ada sanget pengetjoet: ia tjoemah galak sama orang jang lemah dan takoet padanja, tapi kaloe dapetken saorang brani, jang brangasan dan nekat, tingkanja lantes koentjoep dan ia sedia aken mengalah.
Koetika itoe bandar soedah pergi, ia masoek ka dalem, tenggak lagi bebrapa glas brendy, dan dengen djalan sempojongan serta tangannja dipegangin oleh iapoenja serean, Tan Tjo Lat poelang ka roemah, di mana ia kasih satoe tendangan pada istrinja jang lambat memboeka pintoe kamar.
Ini kadjadian dari semalam ada djadi sebab jang membikin ini hari, koetika bangoen tidoer, Tan Tjo Lat oering-oeringan. Tapi itoe kekalahan dalem perdjoedian ada oeroesan sanget ketjil dan tida berarti kaloe dibanding sama satoe hal lagi jang sadari kemaren sore sanget mengganggoe pikirannja.
Commissaris politie di X. jang djadi iapoenja sobat kêntêl soedah dipindah ka laen tempat, dan penggantinja, de Stijf, kaliatan ada saorang jang tida gampang didjinekin. Baroe doea minggoe ia pegang itoe djabatan, dan Tan Tjo Lat soedah moesti denger apa-apa jang koerang enak dari moeloetnja. Begitoe lekas mendenger kabar Commissaris politie jang baroe soedah dateng, moesoeh-moesoehnja Tan Tjo Lat lantes goenaken ini koetika bagoes aken bèbèr segala kaboesoekannja itoe Wijkmeester, hingga soerat boedek jang ditrima oleh de Stijf, aken toetoerken kadjahatannja Tan Tjo Lat, ada poeloean banjaknja. Ini comimissaris politie, jang blon kena pengaroeh dari kanan kiri, djadi merasa heran sekali koetika membatja itoe soerat-soerat jang moeat toedoean-toedoean begitoe heibat hingga ia moelai pasang mata aken selidikin lakoenja itoe Wijkmeester jang, menoeroet itoe soerat-soerat boedek, ada djadi soember dari segala kaboesoekan di kampoeng Tionghoa.
Salah satoe prijaie, iapoenja sobat rapet, jang perna diminta katerangan oleh itoe commissaris politie, soedah boeka ini resia pada Tan Tjo Lat jang tadinja tida mendoesin dirinja ditjoerigaken. Kemaren sore dengen tergoepoeh-goepoeh ia ketemoeken itoe commissaris di roemahnja aken menanja apa betoel ia ada trima soerat-soerat kaleng jang memboesoekin padanja.
„Sablon saja menjaoet“, saoet de Stijf, „saja ingin taoe lebih doeloe, dari mana Wijkmeester dapet itoe katerangan jang saja ada trima soerat-soerat anoniem jang boesoekin pada toean”.
Tan Tjo Lat djadi glagapan, sebab ia tida brani seboet namanja itoe prijaie jang kasih itoe katerangan padanja. Achirnja ia menjaoet sadja, ia ada taro doegahan tentoe itoe commissaris ada trima itoe soerat-soerat, sebab ia ada dimoesoein oleh orang-orang djahat jang sring ganggoe kasantosaän di kampoeng Tionghoa, jang merasa sakit hati kerna ia selaloe basmi segala perboeatan jang tida baek.
„Saja heran”, saoet itoe commissaris, „laen-laen pegawe politie, jang djoega bekerdja dengen radjin seperti Wijkmeester, tida koeatir pada fitenahannja orang-orang djahat”.
Ini perkataän ada sabagi satoe djotosan jang membikin Tan Tjo Lat poenja badan koetjoerken kringet dingin. Ia paksa dirinja aken tertawa, dan berkata:
„Saja djoega tida takaoet apa-apa, tjoemah saja minta toean djangan lantes pertjaja segala pengadoean jang boekan-boekan, sablonnja denger djoega saja poenja keterangan. Saja nanti terangken resianja orang-orang jang toelis itoe pengadoean“.
Komoedian Tan Tjo Lat, moelai seboet nama-namanja iapoenja bebrapa moesoeh jang ia boesoekin sabagi toekang smokel, toekang tadah barang gelap, boeka roemah djoedi gelap, tjitak oewang palsoe dan laen-laen lagi. Tapi itoe commissaris politie tida maoe tanggap iapoenja obrolan, hanja lantas poetoesken dengen ini perkataän:
„Itoe semoea saja nanti preksa dan selidikin, tapi saja tida soeka denger kabar angin; saja maoe liat boekti Kaloe wijkmeester bisa kasih oendjoek boekti dari kadjahatannja itoe orang-orang, tiada soesah boeat kita tangkep padanja. Tjoemah hati-hati, kaloe saja dapet kanjataän wijkmeester satoe kalih berdjoesta, saja tida bisa pertjaja lagi boeat selama-lamanja.”
Ini omongan tadjem membikin Tan Tjo Lat poenja idoeng jang merah mendjadi berobah poetih. Hatinja baroe merasa senangan koetika commissaris bitjara dari laen-laen oeroesan jang boekan bersifat pakerdjaän, seperti brapa lama ia djadi wijkmeester, brapa oemoer, brapa iapoenja anak dan laen-laen lagi. Tan Tjo Lat merasa sanget girang koetika mendapet taoe, itoe commissaris poenja istri ada satoe njonja Tionghoa, beratsal dari Solo, dimana doeloe ia perna bekerdja. Ia lebih girang lagi koetika de Stijf kasih ia ketemoe aken adjar kenal pada istrinja itoe.
„Apakah njonja soedah perna dateng disini?” tanja Tan Tjo Lat sambil menjengir sasoedahnja kasih tangan pada itoe njonja commissaris.
„Bloen, saja baroe sekarang tinggal sini,” saoet itoe njonja jang pondong satoe anak kira beroesia satoe, jang sabentar bentar menangis.
— “Owe harep, kapan sempet dan senang hati, nanti njonja soeka djalan-djalan di owe poenja roemah.”
— „Sekarang n’da bisa, ini anak misih sakitan sadja.”
— „Apakah sakitnja?”
Oleh de Stijf dibri katerangan, itoe anak ada dapet sakit di peroet, jang sring penoeh angin, dan obat jang dikasih oleh doktor tida kaliatan faedahnja.
— „Kaloe begitoe, tjobalah toean kasih minoem obat Tjina. Saja kenal bebrapa obat jang mandjoer sekali boeat anak-anak jang peroetnja penoeh angin. Kaloe toean maoe tjoba, nanti saja kirimin saroepa obat namanja Tjoe Pek San, mandjoer sekali boeat semboehken ini matjem penjakit.”
— „Trima kasih. Sekarang kita lagi pake obat doktor, kaloe tida maoein, nanti saja tjoba pake itoe obat Tjina, sebab saja poenja mertoea djoega sring bilang obat Tjina ada banjak jang mandjoer.“
— „Kaloe begitoe, nanti besok saja kirim; kaloe toean blon maoe pake, tida kenapa, boleh simpen sadja.“
— „Ach, saja tida soeka bikin wijkmeester banjak soesah, kaloe saja maoe nanti saja bli sendiri, kaloe sadja saja taoe roemah obat Tjina jang mana ada djoeal itoe.“
— „Jang paling baek ada kaloearan dari dari roemah obat Gwo Po Tong, bikinannja sienshe Ang Pauw Sian. Di ini roemah obat ada didjoeal djoega arak obat jang mandjoer sekali. Saja liat toean poenja njonja moekanja poetjet. Kaloe toean kasih minoem arak obat Hong Hiang Tjioe, saja tanggoeng dalem satoe boelan badannja seger dan moekanja bertjahaja merah. Itoe arak obat ada baek djoega boeat orang jang kakinja pegel, badan mengiloe, orang djato atawa kapoekoel, kapan digosokin lantes baek. Saja sendiri selaloe minoem ini arak obat, maka saja poenja moeka merah, badan koeat, saban malem bisa djalan meronda teroes meneroes sampe pagi dengen tida merasa tjape.“ — „Kaloe betoel ada begitoe mandjoer, nanti saja maoe tjoba djoega.“
— „Besok saja nanti kirimken itoe arak obat satoe botol.“
—„Oh, djangan, kaloe saja maoe nanti saja bli sendiri, toeloeng kasih sadja adresnja itoe roemah obat dan namanja itoe obat dan arak jang tadi toean poedjiken.“
Tan Tjo Lat ambil iapoenja boekoe notitie, robek satoe lembarannja, jang lantes ditoelisken adresnja itoe roemah obat, perkataän Tjoe Pek San (boeat anak ketjil sakit peroet) dan arak obat Hong Hiang Tjioe. Sasoedahnja beres ia srahken itoe tjatetan pada de Stijf jang mengoetjap trima kasih.
Tan Tjo Lat, jang masih tjoba berdaja teroes aken tèmpèl, dan oendjoek boedi pada ini commissaris, tida maoe berlaloe, hanja adjak ia mengobrol teroes.
„Saja tida kira toean, jang berpangkat tinggi, poenja njonja saorang Tionghoa. Mengapakah toean tida ambil toean poenja bangsa sendiri?” ia menanja sambil memesem.
„Laen orang laen pikiran”, saoet de Stijf, „dan boeat saja, saja merasa takoet kawin dengen bangsa saja sendiri“.
„Kenapa takoet?“ Tan Tjo Lat bersikep seperti kaget,
„Terlaloe besar ongkosnja“, kata de Stijf sambil bermesem. „Njonja Blanda djeman sekarang ada terlaloe lojar, hingga lelaki jang koerang koeat, sringkali djato lantaran kabratan pikoel ongkos dalem roemah tangga. Toean brangkali denger halnja satoe hoofdcommissaris jang doeloe dihoekoem lantaran bikin tekort dan knoei oewang kas, dan blon lama ada lagi satoe notaris di Batavia jang djoega menipoe oewang poeloean riboe roepia hingga masoek pendjara. Kenapa iaorang berboeat begitoe? soerat-soerat kabar tida toelis, tapi sebabnja jang betoel tiada laen, hanja kerna iaorang poenja njonja ada terlaloe boros, maoe idoep lebih dari kakoeatan soeaminja. Istrinja itoe notaris, sablonnja soeaminja ditangkep, ada diam di Cairo, Egypte, seperti satoe Prinses, dengen tida perdoeli soeaminja disini toetoep lobang gali lobang sampe achirnja ia terdjeroemoes ka dalemnja“.
— „Oh, begitoe!“
— „Ja! Dan doeloe, waktoe saja masih djadi politie opziener, saja ada kenal satoe sobat jang djoega djadi politie opziener, orangnja tjakep, pinter, hati baek dan tabeatnja manis, hingga pasti sekali ia bakal naek tinggi dalem djabatannja, sebab semoea orang soeka sama dia. Tapi, tjilaka betoel! ia dapetin satoe bini jang moestinja kawin sama satoe millionair, boekan sama opziener politie jang gadjinja baroe doea ratoes roepia. Itoe njonja tida bisa tinggal di roemah; saban sore pergi plesier mengider di toko-toko, makan dan minoem di café atawa restaurant, atawa pergi nonton bioscoop, lapoenja rok ada penoehin ampat lemari, spatoenja bilang poeloe pasang, topinja lebih satoe dozijn, jang semoea ia dapet dengen djalan bikin oetang sema toko-toko. Itoe njonja ramboetnja di-bob dengen di krul, dan saban anem boelan satoe kalih itoe krul moesti dibikin baroe, dan satoe kalih krul moesti bajar ampat poeloe lima roepia! Pikir sadja, apa lakinja bisa pikoel ongkos begitoe besar? Boeat bajar satoe rekening dari satoe ringgit, sringkali ia toenda berboelan-boelan, sebab oewangnja moesti dipake naek taxi poeterin toko-toko, pergi di café atawa restaurant dan pergi nonton bioscoop. Pengabisannja, kasian sekali ia djato failliet, dan dilepas dari pakerdjaän gouvernement sebab dipandang tida bisa dipertjaja lagi“.
— „Tapi itoe lelaki jang bodo, toeroetin sadja kamaoean istrinja“.
— „Kaloe begitoe wijkmeester tida taoe kabiasaän dari orang Blanda, jang kaloe hatinja koerang keras, kabanjakan bertaloek sama bininja, atawa moesti tjektjok dan berklai saban hari. Itoe sebab saja lebih soeka tjari bini nona Tionghoa jang kalakoeannja saderhana, oeroes betoel roemah tangga, maoe masak dan mendjait sendiri. Bini Blanda modern tjoemah bagoes boeat didjadiken tontonan, aken djalan brendeng di straat dengen pakean netjis, doedoek sama sama batja koran atawa minoem thee di pekarangan soepaja diliatnja oleh orang loear bagoes dan rapih. Tapi apakah goena ini semoea kaloe kita poenja kantong kosong? Tempo saja poenja gadji masih ketjil dan saja poenja anak jang besaran dapet sakit moesti di-operatie hingga saja banjak abis oewang dan gadji saja tida tjoekoep, saja poenja njonja kasi lepas semoea boedjang, ia masak, tjoetji piring, tjoetji pakean dan menjapoe sendiri. Kaloe tida begitoe tentoe saja soedah terdjeblos di soemoer oetang“.
— „Toean poenja njonja tentoe pande masak“.
—„Oh, tida sabrapa, ia bisa djoega masak makanan jang saderhana“.
— „Toch ia pande masak makanan Tjina?“
— „Ja, nasi goreng, bami, ia sring bikin djoega, tapi tida bisa sama enaknja seperti jang dari restaurant“.
— „Oh, toean sring djoega makan di restaurant Tjina?“
— „Tempo-tempo saja soeka pesen makanan dari sitoe“.
— „Kaloe begitoe, nanti saja kirimken roepa-roepa makanan Tjina jang enak boeat toean tjobain masakan sini“.
— „Trima kasih, saja nanti bli sendiri kapan saja maoe. Wijkmeester djangan bikin banjak soesah; saja soedah bilang tadi, jang saja tida soeka trima kiriman apa-apa. Saja merasa girang kaloe Wijkmeesters bisa toeloeng oendjoekin di mana ada restaurant Tjina jang baek, soepaja kapan perloe saja boleh soeroe bli“.
— „Jang paling baek ada restaurant Soedi Mampir di Klentengstraat, eigenaarnja Tjia Be Liauw“.
— „Makanan apa jang paling bagoes jang ia ada ada djoeal?“
— „Bami, tjaptjay, foeyonghay, heewantja dan laen-laen semoea ada sedia tjoekoep“.
— „Bami dan tjaptjay saja soedah kenal, tapi itoe jang laen saja blon perna tjobain“,
— „Ach, gampang, nanti saja toelisken“.
Tan Tjo Lat lantes ambil lagi iapoenja notitie-boek, toelis namanja restaurant Soedi Mampir dan nama eigenaarnja, berikoet He Wan Tja, Fu Yong Hay, Mi Shoa Tauw dan laen-laen lagi makanan jang ia anggep enak.
Sasoedahnja srahken itoe tjatetan pada de Stijf, ia mengobrol sedikit dari laen-laen oeroesan, dari hawa boemi, penjakit dan sabaginja, kamoedian ia lantes berlaloe dengen dianter oleh itoe commissaris sampe di tangga depan.
Koetika berdjabat tangan aken ambil slamet berpisah, Tan Tjo Lat berkata lagi: „Apakah saja boleh mengandel atas toean poenja pertoeloengan aken lawan itoe segala fitenahan pada saja poenja diri?“
„Saja tida bisa berdjandji satoe apa“, saoet de Stijf dengen soeara dan roepa soenggoe-soenggoe. „Itoe ada bergantoeng pada boekti-boekti jang kaliatan. Kapan wijkmeester tida berboeat sabagimana jang orang toedoeh djangan takoet satoe apa. Tapi kaloe saja dapet kenjataän itoe semoea ada betoel . . . . . wel, wijkmeester moesti mengarti sendiri, jang di dalem dienst tida ada sobat atawa moesoeh!“