Tao Teh King/Bab 8

1. Kabedjikan jang paling besar sifatnja seperti aer jang sanget berfaedah boeat hidoepnja segala benda dan ia tida perna bergoelet.
   
2. Aer selaloe mentjari tempat jang paling rendah sendiri, maka ia ada mirip seperti Tao.
   
3. Aer selaloe bisa tjotjokin diri pada iapoenja tempat, hingga ka'ada'annja seperti kabedji­kan dari manoesia jang pengartiannja dalem, seperti kabedjikannja omongan jang djoedjoer, pamerentahan jang beres, pegawe jang pande dan pakerdja'an jang dilakoeken dalem temponja jang betoel.
   
4. Sebab ia tida perna bergoelet maka tida ada jang moesoehin.
   

⁂

Dalem soeal kabatinan memang aer sring didjadiken peroepama'an boeat loekisken ilmoe jang tinggi, lantaran boekan sadja amat besar kafaedahannja tapi djoega dari sifatnja jang tida soeka membantah, hanja pilih sadja tempat jang paling rendah, satoe sifat soeka mengalah jang kabanjakan manoesia tida mempoenjai. Itoe matjem sifat, mentjari kadoedoekan rendah dan soeka mengalah, ada tjotjok seperti apa jang Lao Tze sering bitjaraken dari wateknja Tao, kerna maskipoen itoe aer toeroen, sabagi oedjan, dari atas oedara jang lebih tinggi dari segala goenoeng jang paling tinggi, tapi sasoedahnja djatoh ka boemi ia selaloe pilih tempat jang paling rendah boeat kadiamannja. Lantaran ini sikep jang merendah, maka ia mengambil tempat jang paling loeas dari moeka boemi, dan brapa dalemnja tida ada jang bisa taksir. Ia trima segala apa jang dateng padanja dengen sikep tida berobah, tida perdoeli bangkè, nadjis atawa poen moetiara. Lantaran ia selaloe pilih djalanan jang paling gampang diliwatin, maka mengalirnja ada paling tetep.

Kabedjikan jang bisa dipetik dari Tao ada amat banjak, begitoe poen kafaedahannja aer. Natuur tida bisa bekerdja zonder aer, seperti djoega Thian tida bisa berdaja zonder Tao. Demikian poen manoesia, jang mempoenjai perhoeboengan dengen Toehan dan Natuur, ada perloe sama aer dan Tao. (Ajat 1,2).

Orang jang bergoelet aken tjari kadoedoekan tinggi, itoelah menandaken pengartiannjá masih tjètèk, tida mengenal Tao. Begitoe poen omongan jang tida djoedjoer, pamerentahan jang tida beres atawa sembarangan, pegawe jang tida tjakep dan pakerdja'an jang dilakoeken boekan dalem tempat atawa temponja jang betoel, semoea ada bertentangan sama pri kabedjikan, jaitoe sama Tao. (Ajat 3).

Saorang boediman jang selaloe merendahken diri, jang bisa memilih tempat lebih bawah dari laen orang, nanti dapet kahormatan besar dengen tida ada jang moesoehin. Ka'ada'annja seperti itoe aer jang, maski berada dalem soemoer jang amat dalem, orang jang kaäoesan dari mana-mana tempat dateng mentjari boeat timba ia kaloear zonder ada saorang poen jang merasa sirik, dengki dan sakit hati padanja. (Ajat 4).