Tao Teh King/Bab 32

XXXII.

KABEDJIKANNJA KAPANDEAN

1. Tao sebagi sifat jang kekel tida mempoenjai nama.
2. Maskipoen kaliatannja tida berarti dalem kasaderhana'annja jang aseli, doenia tida brani pandang rendah padanja,
3. Djikaloe satoe Radja atawa Keizer bisa poenjaken Tao, segala apa jang tertjipta di doenia nanti menaloek dan menghormat.
4. Langit dan Boemi aken bersatoe dalem hal membri tenaga kahidoepan padanja.
5. Dengen tida menggoenaken paksa'an rahajat nanti lakoeken masing-masing poenja kawadjiban dengen soeka sendiri.
6. Djikaloe itoe Keizer atawa Radja bikin rahajatnja merasa poeas dengen pangkat atawa gelaran kahormatan, ia poen bisa bikin dirinja sendiri djadi terpoedji dan dapet nama termashoer.
7. Tapi ada lebih bidjak djikaloe ia tida tjoba dapetken nama dengen ini djalan, soepaja bisa singkirken kadjahatan jang timboel dari mem­beda -bedaken.
8. Tao boeat doenia ada seperti itoe soengei-soengei besar dan laoetan, jang menerima djatonja aer dari soengei-soengei ketjil dan tanah-tanah lembah.

⁂

Di bagian ajat 7 dan 8, salinan dari Gorn Old ada berbeda djaoe dengen Lionel Giles, Oleh jang belakangan disalin begini : „Begitoe lekas Tao tjiptaken kaberesan di doenia, ia bisa dibriken nama. Kaloe satoe kalih ia soedah mempoenjai nama, manoesia aken taoe bagimana moesti berdiam di dalemnja. Sasoedah taoe bagimana moesti berdiam di dalemnja, marika tida aken hadepken bahaja."

Ini salinan kita sangsiken kabenerannja, sebab Lao Tze selaloe bilang, maski Tao berada di segala tempat dan meiipoeti segala apa, ia tida mempoenjai nama dan tida bisa dikasih nama, sebab jang bisa diseboet namanja boekan lagi Tao adanja. Maka itoe kita pilih salinan dari Gorn Old jang dalem ini hal kaliatan ada lebih baek.

Dalem ini fatsal kombali Lao Tze bitjaraken kaberesan dan kafaedahannja Tao, jang kapan dipegang oleh satoe Keizer atawa Radja — jaitoe kapan ia memerentah dengen mengikoeti kasaderhana'an satjara natuur — segala machloek dalem doenia aken bertaloek dan menghormat, dan natuur poen aken membri kaberkahan dan tenaga kahidoepan padanja, sedeng sekalian rahajatnja nanti djalanken kawadjiban dengen soeka sendiri zonder diprentah lagi

Ini peta'an bergoemilang jang Lao Tze tondjolin beroelang-oelang tentang kafaedahannja Tao kapan digoenaken dalem pamerentahan, maskipoen boeat di djeman sekarang kaliatan soeker atawa tida bisa didjalanken dalem doenia jang soedah djadi begitoe roewet dan kaloet, tetapi di dalem azas itoe angen-angen tida bisa dibantah kabenerannja. Toedjoean dari peladjarannja Lao Tze ada •boeat briken manoesia katentreman pikiran dan kapoeasan aken hidoep saderhana, Ini matjem katentreman masih bisa tertampak antara orang desa di tanah pagoenoengan dalem mana-mana negri, jang toentoet kahidoepan satjara koeno, tida kenal kabagoesan, kabesaran dan kamoelja'an tetapi hatinja merasa poeas dan tentrem, kerna kainginannja jang tjoemah sedikit tida perna terganggoe oleh se­gala matjem penarik jang membikin kaloet penghidoepannja orang orang modern jang soedah „madjoe." Itoe kakaloetan economie jang se­karang doenia sedeng alamken, nistjaja mendjadi lebih saderhana dan lebih gampang diberesin kapan manoesia insjaf kafaedahannja hidoep saderhana dan watesken kainginannja jang selaloe hendak dapet kadoedoekan lebih tinggi atawa lebih senang dari tetangganja zonder perdoeliken nasif laen-Iaen orang.

Jang rahajat masing-masing dengen soeka sendiri nanti lakoeken kawadjibannja zonder disoeroe lagi, itoe poen ada sadjamaknja ka­pan dari fihak jang pegang prentah tida dilakoeken pemeresan atawa penindesan. Rahajat jang hidoep saderhana dan tida soeka bikin banjak rewel, biasanja ada amat menoeroet dan denger kata, hingga tida soesah diprentah kapan jang djadi kepala selaloe berlakoe pantes, adil dan menaoein. Khong Tjoe poenja plan aken adaken kaberesan negri boekan dapet bantahan dari fihak rahajat jang bodo dan saderhana, hanja selaloe dirintangin oleh ke­pala-kepala pamerentah dan pembesar-pembesar„pinter," jang koeatir dapet roegi apabila didjalanken pemerentahan beres dan adil. Maka kapan moentjoel satoe kepala pamerentah jang betoel-betoel pande, tida oesah diboeat heran djikaloe dibilang antero doenia nanti menaloek dan menghormat, kerna maskipoen ia tida pegang prentah atas antero doenia, dimana-mana negri orang taro endah dan ambil tjonto iapoenja tjara memerentah jang beres (Ajat 1-5).

Pertjoba'an boeat briken kapoeasan pada manoesia dengen membangkitken kainginannja pada kabesaran atawa kamoelja'an, memang bisa djoega bikin satoe Radja atawa Keizer djadi terpoedji, sebab dengen begitoe di sapoeternja ada berdiri hamba-hamba jang setia lantaran merasa soekoer boeat itoe gandjaran dan kahormatan jang marika telah trima Tetapi Lao Tze membri inget, ada lebih betoel djikaloe itoe kepala pamerentah tida tjoba dapetken nama tjara begitoe, sebab dengen adaken itoe tanda-tanda kahormatan moelja, jang membikin satoe orang djadi kaliatan berbeda dari jang laen, ia tjoemah timboelken manoesia poenja hati sirik, mengiri dan temaha aken kedjer kahormatan, hal mana ada bertentangan dengen itoe kasaderhana'an dari Tao. (Ajat 6-7).

Jang itoe Tao ada disamaken sabagi soengei besar atawa laoetan jang trima djatohnja aer dari soengei-soengei ketjil dan tanah-tanah lem­bah, ini poen ada mengoendjoek bahoea segala peratoeran hidoep dari manoesia, dalem oeroesan besar sampe pada perkara ketjil, semoea berdasar atas itoe sifat atawa azas dari Tao, dan pertjoba'an aken menjimpang dari itoe toedjoean boekan sadja nanti menimboelken segala kakaloetan, malah boleh dipastiken achirnja aken gagal. Kasopanan manoesia jang ditoedjoeken pada karojalan, kabesaran dan kagoemilangan, jaitoe bertentangan dengen sifatnja Tao jang saderhana menoeroet natuur, selamanja tida bisa kekel, dan satoe waktoe aken ambrek kombali, (Ajat 8).