Tao Teh King/Bab 18

XVIII.

ALAT BOEAT MENAMBAL.

1. Kapan itoe Tao jang besar soedah tida digoenaken, orang lantes kamoekaken pri kamoerahan hati dan pegang kawadjiban bener pada tetangganja.
2. Kapan priboedi dan katjerdikan dihormati orang, doenia lantes penoeh dengen kalakoean palsoe dan poera-poera.
3. Kapan tali persanakan soedah terpoetoes di sana-sini, baroelah soeal kabaktian dan katjintaän antara anak dan orang toeanja moelai moentjoel.
4. Kapan satoe negri soedah mendjadi kaloet, timboel hoeroe-hara dan pembrontakan, baroelah berbangkit orang-orang jang seboet dirinja patriot (penjinta negri).

⁂

Dari boenjinja fatsal di atas orang bisa mendoega, di taon kapan Tao Teh King telah ditoelis, sebab disitoe Lao Tze ada bitjaraken apa jang ia soedah perna roendingin bersama Khong Tjoe. Pertemoean antara ini doea Nabi Besar soedah terdjadi koetika Khong Tjoe beroesia 34 taon, jaitoe di taon 517 sablonnja Kristus.

Dalem pembitjaraännja dengen itoe Goeroe Toea katanja Khong Tjoe telah kamoekaken soeal kawadjiban pada tetangga, jaitoe atoeran moraal aken berlakoe moerah, djoedjoer, pegang peradaban, berbakti dan sabaginja lagi, jang perloe oentoek kaberesannja perhoeboengan antara sesama manoesia, seperti anak dengen iboe-bapa, jang perna moeda pada jang toea, antara sobat-sobat, soeami istri, mantri dengen radja, dan sabaginja lagi. Katanja Lao Tze soedah tertawain Khong Tjoe poenja sijsteem peladjaran, jang ia anggep tida bergoena, sambil oetjapken djoega sindiran pedes (Batja Lao Tze dan Peladjarannja, pagina 81-82). Dan dalem fatsal di atas itoe Goeroe Toea telah briken alesan-alesan lebih djaoe kenapa itoe Pri Dermawan dan Kawadjiban pada Tetangga ia pandang tida bergoena.

Menginget oedjar-oedjar dari fatsal di atas ada samboengan dari Lao Tze poenja kritiek atas peladjarannja Khong Tjoe, dan sedikit tempo sasoedah dibikin itoe pertemoean Lao Tze letakken djabatannja sabagi pengoeroes bibliotheek karadja'an Chow aken pergi ka pagoenoengan sablah Barat, maka teranglah itoe kitab Tao Teh King soedah ditoelis dalem taon 517 sablonnja Kristus atawa sedikit tempo sasoedahnja itoe taon.

Lao Tze namaken Khong Tjoe poenja atoeran-atoeran moraal sabagi „alat boeat menambal," kerna ia anggep moentjoelnja itoe berbagi-bagi atoeran tjoemah mendjadi boekti atas roesaknja tabeat manoesia lantaran telah tinggalken Tao. Kapan manoesia masih mengenal atawa hidoep menoeroet Tao, tida perloe diadjarin lagi dalem hal saling menjinta dan berlakoe bener. Itoe pengharga'an pada orang-orang jang dianggep berboedi, pande dan tjerdik, blon tentoe bisa bikin manoesia sasoenggoehnja djadi mengenal boedi, djadi pande dan pinter, tapi soedah pasti nanti mengandjoerin aken orang berlakoe palsoe, poera-poera soetji, melaga berboedi, taoe adat, tapi itoe semoea tjoemah sepoean, sedeng batinnja jang di sablah dalem tinggal tetep boeroek.

Kapan iboe-bapa dengen anak-anaknja berlakoe menoeroet Tao, tida perloe dibitjaraken lagi soeal katjintaän dari iboe-bapa dan kabaktian dari fihak anak; kapan negri ada di dalem tentrem, tida perloe sama itoe segala patriot. Maka kapan sekarang diadaken satoe atoeran atawa perwatesan jang membedaken itoe berbagi-bagi sikep, kaädaän doenia boekan mendjadi beres hanja semingkin kaloet, kerna manoesia lantes tinggalkan sifat jang sawadjarnja menoeroet natuur dan berbalik kedjer barang bikinan jang gampang dipalsoein, kerna apa jang tida bisa dipoenjain atawa dimengarti sapenoehnja, orang lantes djambret aken pake di sablah loear sabagi perhiasan, jaitoe poera-poera djadi koentjoe, oehauw, aykok, enz. jang tida berbeda sabagi penipoean, hingga kasoedahannja manoesia boekan djadi baek hanja semingkin djahat.

Fatsal jang berikoet ada samboengan dari peroendingan di atas.