Pembalesannja Kawanan Liangsan/Bagian kadoea/Bab 7
VII
Lie Tjhoen dengen anam soedara bikin plesiran, dapet batoe menggeraken niatan doeloe.
Tapi sabelonnja itoe kandaran aer sampe katempatnja Tong Wie, baek kita moendoer sedikit dalem tjerita, soepaja bisa mengatahoei siapa adanja itoe badjak soengei, jang sekarang silaken Gak Ho mampir ka goenoengnja.
Di antara kawan-kawaneja Tong Wie ada terdapet djoega Lie Tjhoen, saorang gaga jang diseboet Hoenkangliong.
Dan kerna dalem ini fatsal jang hendak ditoetoerken, Lie Tjoen ada ambil bagian penting, maka lebi doeloe, biarlah kita tjeritaken halnja ini orang gaga, jang bermoela tjoema lakoeken sadja pakerdjahan penangkepan ikan di soengei Simyangkang, dan blakangan mengikoet pada Song Kang ka Liangsan dan waktoe Song Kongbeng mahloemken perang pada bangsa Poeilah, ia poen ada toeroet bersama-sama.
Tapi blakangan, pada sasoedanja paperangan itoe salesih, lantaran tida soeka mendjabat pakernjahan negri, ini Hoenkangliong bersama doea sobatnja laloe berpisa pada Song Kang.
Sobatnja Lie Tjhoen itoe ada bernama Tong Beng dan Tong Wie, djoega orang-orang gaga jang djarang ada bandingannja. Pada itoe doea kawan Lie Tjhoen kasi taoe maksoednja, bahoewa sekarang, sasoedanja tida memegang pakerdjahan negri, ia niat tjari ampat kawannja jang sakean lama ada asingken diri dari oeroesan negri. Tong Beng dan Tong Wie menjataken moefakat, maka sigra djoega tiga orang itoe laloe berangkat djalan.
Ampat sobat jang diseboet itoe jalah Djisiliong Hoei Po, Kwanmoho Lie Hoen, Thayohkauw Ko Tjeng dan Sioeliamhiong Tek Seng, jang menoeroet katerangan jang didapet, itoe waktoe ada tinggal di soeatoe desa deket telaga Thayouw.
Sigra djoega Lie Tjhoen bersama doea sobatnja telah sampe ka itoe tempat jang terseboet, dan kadatengannja ini tiga orang, disamboet oleh itoe ampat orang gaga dengen girang hati, dan masing-masing laloe menanjaken bagimana marika poenja kawarasan dan prikeadahan dalem waktoe-waktoe jang laloe.
Sasoedanja masing-masing dapet taoe iaorang poenja keadahan, moelai dari itoe waktoe Lie Tjhoen bersama Tong Beng dan Tong Wie laloe tinggal di itoe tempat, dan telaga Thayouw itoe djadi didiami toedjoe orang gaga, jang satiap hari liwatken temponja dengen makan minoem dan omong-omong boeat senangkeji hati.
Kerna Lie Tjhoen ada dipandang lebi tinggi dari itoe a am orang, maka ia diangkat sabagi kapala, atawa orang jang paling toea di antara sadereknja. Bermoela ini angkatan ditolak, tapi sebab masing-masing memaksa dengen sanget, maka achirnja Hoenkangliong trima djoega itoe angkatan sabagi Iwako atas dirinja.
Brapa lama telah berlaloe.
Pada soeatoe hari Lie Tjhoen rasa, bahoewa tempat kadiamannja jang sekarang ada terletak di soeatoe tempat jang koerang bagoes, kerna tananja tida bisa mengaloearken hasil apa-apa. Dan hal ini ia laloe njataken pada anam soedaranja dan tanja pada marika itoe, apa sala satoe dari itoe soedara-soedara ada dapet taoe, bahoewa di deket ini tempat ada tana jang bagoes boeat didiami.
Hoei Po jang ada taoe soeatoe tempat bagoes dan mahmoer, laloe kasi taoe, bahoewa di ini doea poentjak Goenoeng pertama letaknja di sebla wetan dan jarg laen di sebla koelon. Tapi doea-doea ada penoeh dengen pendoedoeknja, jang masing-masing ada mempoenjai pentjarian laen. Dan menoeroet pendapetan jang ia telah preksa, itoe goenoeng jang sebla welan pendoedoeknja semoea ada orang-orang jang mampoe, jang melakoeken pakerdjahan derdagang ka laen-laen tempat. Sedang goenoeng jang sebla Koelon, pendoedoeknja lakoeken pakerdjahan tani dan menangkep ikan.
Lebi djaoe Hoei Po kasi taoe, bahoewa di itoe goenoeng jang terseboet blakangan ada ditanem banjak roepa poehoen kembang, baboeahan dan sabaginja. Djadi tegesnja itoe ada satoe tempat jang mahmoer.
Mandenger ini katerangan Lie Tjhoen djadi amat girang, dan atas pertanjatahannja lebi djaoe, Hoei Po djawab:
„Laen dari begitoe, di itoe goenoeng Koeloen ada terdapet djoega satoe moeara jang diseboet Siauwhewan dan ada membri hawa amat sedjoek. Dan tida ujaoe dari itoe moeara, ada terdapet satoe gowa jang diseboet Liemohtong. Dan di loear dari itoe gowa orang bisa memandang ka koeliling tempat dengen njata sekali. Pemandangan alam di sitoe ada indah, betoel sabagi dewa-dewa poenja tempat kadiaman. Dan di laen tempat lagi, jang tida sabrapa djaoe dari sitoe, ada terdapet satoe tana bagoes, jang perna ditinggalken oleh Kak Lie sianseng, saorang pande jang termasoehoer di Djaman Hantiauw."
Boekan sadja Lie Tjhoen, hauja laen-laea soedaranja poen djadi amat girang sasoedanja mendenger ini tjerita. Maka hari boeat berangkat ka itoe tempat jang Hoe: Po seboet, lantas ditetepken, dan satoe praoe besar lantas disadiaken dengen membawa djoega barang-barang bekelan goena itoe perdjalanan.
Esoknja ini toedjoe orang gaga laloe toeroen praoe dan kandaran itoe ditoedjoeken, ka goenoeng Koelon.
Selang brapa hari praoe itoe telah sampe, maka katoedjoe orang gaga itoe lantas naek ka darat, dimana dia dapetken, bener sadja sabagimana katanja Hoei Po. Pemandangan-pemandangan ka tempat djaoe ada kaliatan indah, teroetama letaknja Siauwhewan ada begitoe bagocs. Pada ampat per djoercenja ada dikoelilingi dengen goenoeng-goenoeng jang kaliatan idjo, hingga pemandangan itoe seperti di gamlar.
Djoega ada kaliatan satoe rawa besar, jang di tenga-tengaja ada satoe lana dalar seperti poelo. Dan di itoe iana bisa d diriken beratoes-ratoes rooma dengen pekarangan jang loewas; di sakiter pinggirannja poelo itoe ada toemboe banjak poehoen-poehoen jang soeboer, hingga kaloe ada angin, aernja rawa itoe membri pemandangan bagoes sekali.
Dan waktoe ini toedjoe orang gaga dateng ka itoe, poelo jang tadi dipandang dari djaoe, kadapetan, jang antara itoe poehoen-poehoen ada banjak djoega poehoen baboowahan, seperti djeroek, boeacli dan banjak djoega poehoen bamboe. Brapa hari iaorang telah preksa itoe tempat, jang sasoedanja selesih Lie Thoen laloe balik kombali ka tempat sendiri dan berdami pada itoe anam soedara boeat bisa poenjaken itoe tempat jang mahmoer. Scedara-soedaranja semoea menjataken satoedjoe, dan dengen ichtiarnja marika itoe, laen harinja Lie Tjhoen soeda dapet beli itoe tana-tana jang terletak di tepi rawa terseboet.
Sasoeda tana-tana itoe djadi kapoenjahannja, Lie Tjhoen laloe panggilin toekang-toekang jang pande boeat diriken doeapoeloe roema. Kerna pakerdjahan dilakoeken dengen giat, maka selang bebrapa boelan, roema jang bagoes dan tegoe itoe telah berdiri.
Perabot-perabot jang perloe laloe disadiaken salengkapnja. Dan sasoedanja semoea barang-barang diatoer beres, Lie Tjhoen laloe adjak anam soedaranja pinda ka roema baroe, bersama sekalian masing-masing poenja familie, jang terdiri dari orang-orang lelaki, prampoean dan anak-anak.
Sabagi tanda kagirangan boeat itoe kapindahan di roema baroe, Hoei Po dan Lie Hoen laloe bikin perdjamoeran besar dan oendang sakalian tetangga-tetangga pendoedoek itoe tempat, jang trima oendangan itoe dengen girang dan makan minoem dengen sagala soeka hati.
Kerna orang-orang jang tinggal di laen kampoeng, deket itoe tempat, djoega ada dioendang, maka datengnja tetamoe boekan sedikit. Masing- masing laloe membri hormat pada Lie Tjhoen dan bahasaken dengen panggilan Lie Lokhwa, jaitoe soeatoe seboetan jang boeat di itoe tempat, ada sampe moelia.
Pendoedoek di kampoe: g-kampoeng jang berdeketan dengen itoe rawa, ampir semoea ada melak eken pakerdjalan tangkep ikan atawa djaring oedang, jang pengasilan ada tjoekoep boeat dipake mamelihara marika poenja familie dan koelawarga. Tapi bagi orang-orang jang ada mempoenjai kakoeatan tjoekoep, lakoeken pentjarian itoe dengen goenaken praoe besar jang memake anam lajar dan di bawahnja itoe praoe ada dipasangin djaring.
Dan praoe penangkep ikan begini diseboet kauwjoan, jang dalem satoe hari satoe malem, ikan jang diperoleh ada bilang riboe kati banjaknja.
Meliat, jang dengen goenaken kauwtjoan, pengasilan bisa didapet lebi besar, maka sasoedanja satoe orang jang mengarti kasi tjerita begitoe, selang sedikit waktoe kamoedian Lie Tjhoen soeda mempoenjani ampat kauwtjoan, dan boeat kerdjahan ini dipertjajaken pada bebrapa pengawe boeat mengoeroes
Tapi pakerdjahan ini joema bisa membri hasil jang bagoes di doea moesin, jaitoe di moesin Tjhioe dan thang, pada waktoe ada angin Oetara barat, dan dengen pertoeloengannja ini angini itoe anam lajar jang dipasang bisa dapetkan tenaga tjoekoep.
Pada soeatoe hari, betoel di pertengahan moesin Thang, waktoe angin Oetara-barat oendjoek pengaroenja, Lie Tjhoen adjak anam soedaranja berkandaran praoe boeat menjaksiken pengawe-pengawenja mendjaring ikan.
Praoe jang didoedoeki itoe toedjoe orang ada menoedjoe ka djoeroesan Oetara. Pemandangan di itoe telaga ada bagoes sekali, dan dalem plesiran ini, tentoe sadja arak jang baek dan makanan-makanan jang enak tida kaloepahan. Maka sambil minoem, praoe didjalanken teroes, dan kendati siang soeda moelai terganti malem, tapi ini orang jang bersenang-senang belon djoega balik poelang.
Kerna kaenakan berontong-omong, maka datengnja sang malem tida dirasaken. Begitoelah waktoe hari soeda djadi tengahmalem, koenjoeng-koenjoeng angin djadi berenti, hingga praoenja tida bisa ladjoe lagi dan terpaksa ini toedjoe soedara brenti di bawanja Biauwbiohong, aken bernanti datengnja fadjar, kaloe dateng angin baroe belajar poela.
Tapi sabelonnja waktoe jang ditoenggoe itoe dateng, saldjoe ada toeroen amat lebat, hingga dalem samantara waktoe sadja pemandangan di itoe tempat-tempat djadi beroba poeti. Meliat toeroennja saldjoe samingkin lama djadi samingkin keras, Lie Tjhoen laloe adjaki anam soedaranja itoe naek sadja di Biauwbiohong, dimana iaorang boleh landjoetken plesiran minoe-minoem sembari memandang ka bawah, jang tentoe pemandang ada bagoes sekali.
„Bagimana sakalian Hiante poenja pikiran ?“ demikianlah menanja itoe Twako, „di atas poentjaknja Biauwbiohong akoe rasa kita-orang bisa dapet kasenangan, jang di sini kita-orang ida aken dapetken?“
Sémoea soedaranja menjataken moefakat.
Sigra djoega orang-orang gaga itoe prenta peng koetnja bawa naek itoe barang-barang bekelan, seperti arak, makanan dah baboeahan, begitoe djoega thee dan koewe-koewe tida katinggalan.
Dari bawa naek ka itoe poentjak, dengen liwatken djalanan jang blengkak-blengkok, ada saperbjalanan kira-kira ampir tiga li. Dan sasampenja di atas marika laloe hampirken satoe poehoen Siong jang besar, di bawah mana ada satoe batoe besar ada rata, dan di sinilah itoe toedjoe orang gaga brenti.
Itoe batoe jang penoeh saldjoe laloe dibersiken, kamoedian diatoer gelas-gelas. Sedeng jang laen poengoetin tjabang-tjabangnja itoe poehoen jang djato katioep angin dan bakar itoe, boeat panasin arak dan barang-barang hidangan. Lie Tjoe dengen an am spedaranja soeda doedoek mengadepi barang makanan di sapoeternja itoe hatoe jang seperti medja, sambil memandang dan beromong-omong dengen senang.
Brapa saät telah berlaloe,
Koenjoeng-koenjoeng itoe Tw ako menoedjo k ka satoe djoeroesan dan berkata pada sakalian suedaranja:
„Tjobalah Tjiongwie Hengte liat itoe aer jang begitoe anteng dan diam, apa tida bagoes, seperti tana darat? Sedeng itoe saderek goenoeng-goenoeg jang diselipoeti saldjoe, ada seperti goenoeng perak dan kalialannja lebi tinggi dari biasa ?“
„Ja, sasoenggoenja djoega pemandangan alam jang terdapet di ini tempat, memang ada bagoes sekali," saoet Hoei Po sambil berpaling ka djoeroesan jang ditoendjoek oleh itue Twako: „, maka djoega, banjak orang-orang soetji jang soeka berdiam di ini pagoenoengan. Dan sadari doeloe, pemandangan di sini ada paling indah.“
„Sasoenge oenja moesti diakoeh,“ kata Lie Tjhoen sambil tertawa: „dalem sabegitoe banjak kali kita orang telah bikin plesiran, adalah ini kali jang paling menjenangken, hingga maski orang-orang jang bagimana hartawan dan berpangkat besar sekali poen, pastilah tida bisa saingin kasenangan kita di ini waktoe.“ Baroe sadja itoe Twako abis oetjapken perkatahan terseboet, dan sabelonnja ada satoe soedara jang menjaoet, mendadak di djoeroesan Oetara-barat ada kadengeran soeara membeledoer seperti petjanja goenoeng, hingga Lie Tjhoen dan sakalian soedaranja djadi terkedjoet dan menengok.
Di oedara dari djoeroesan dimana baroesan itoe soeara terdenger, ada kaliatan api berkobar-kobar jang toeroen ka goonoeng, hingga dalem sasaät itoe, sakoeliling tempat djadi bersinar terang.
„He, apatah itoe ?„ berkata Tong Beng dan Tong Wie dengen soeara berbareng: „itoelah boekan perboeatan manoesia.“
„Sasoenggoenja api itoe toeroen dari langit,“ kata Hoei Po dengen merasa heran sambil mengawasi pada Lie Tjhoen.
„Kaloe begitoe, tentoelah itoe ada soeatoe alamat“ kata satoe soedara jang laen: „satoe alamat apa adanja itoe ?“
„Tapi itoe api moedjidjat ada kaliatan dari oedara,“ saoet soedara jang laen sambil menoendjoek ka itoe djoeroesan: „tapi itoe soeara meledoek, seperti terdenger dari tana atawa petjanja goenoeng.“
„Sabelonja meliat, kita tentoe tida bisa dapet taoe apa adanja itoe,“ kata Lie Tjhoen: „maka akoe pikir, baeklah sekalian Hengte mari ikoet akoe pegi liat ka itoe tempat, baroe bisa dapet taoe terang”.
Semoea soedaranja menjataken satoedjoe. Begitoelah iaorang berbangkit dari tempatnja doedoek dan toenda samantara waktoe itoe plesiran. Tida lama kamoedian, sigra djoega itoe toedjoe soedara soeda sampe ka tempat terseboet.
Apatah jang terliat di sitoe?
Marika dapetken, tana jang tertoetoep saldjoe, telah djadi antjoer dan roesak kira-kira satoembak lebi lebarnja. Di tenga-tenga itoe ada terletak sapotong batoe jang seperti papan, pandjangnja batoe itoe satoe kaki dan lebarnja kira- kira lima dim, roepanja ampir seperti poewalam.
Tong Wie boeroe-boeroe poengoet batoe itoe dan kamoedian kasiken pada soedara-soedaranja boeat diliat. Sasoeatoe orang memandang batoe itoe dengen heran dan kagoem, dengen menanja pada hati sendiri: apatah itoe sorot api jang tadi toeroen dari oedara, ada bersama-sama dengen ini batoe.
Sasoedanja dipreksa dengen teliti, achirnja orang dapet liat jang di itoe batoe ada terloekis bebrapa hoeroef seperti ditatah. Tapi itoe anam soedara tida begitoe kenal mata soerat, katjoeali Lie Tjhoen jang ada mengarti djoega sedikit.
Meliat jang batoe itoe bener-bener ada terloekis soerat, Lie Tjhoen laloe memandang lebi teliti, tapi sakoetika lama tida berkata-kata.
Anam soedaranja itoe bernanti boeat denger apa boenjinja itoe hoeroef-hoeroef jang terloekis di batoc terseboet. Tapi lantaran liat Twako masi berdiam sadja sembari memandang, maka soedara-soedara itoe djadi tida sabaran dan berkata:
„Hajoelah terangken apa boenjinja itoe hoeroef- hoeroef jang terloekis, Twako, mengapatah kaoe berdiam sadja?“
Lie Tjhoen tjoema memanggoet-manggoet, sambil memandang teroes. „Apa goerat-goerat itoe boekannja soerat?“ menanja sala satoe dari itoe. anam soedara sambil memandang Twakonja, sebab liat itoe Twako berdiam sadja: tapi toch memang bener seperti hoeroef boekan?“
„Ja, memang soerat, jang semoea ada berdjoem- bla anambelas hoeroef,“ saoet Lie Tjhoen.
„Nah kaloe begitoe, terangkenlah pada kita orang, apa boenjinja soerat itoe,“ kata anam l soedara itoe dengen soeara ampir berbareng.
„Toenggoe,“ kata Lie Tjhoen: „tapi ini anambelas hoeroef, ja maski tjoema anambelas hoeroef, artinja amat loewas dan akoe lagi tjoba boeat artiken, tapi belon djoega bisa mengarti.“
„Troesa diartiken,“ kata Tong Beng jang soeda kapingin denger: „batja sadja, batja sadja, kita orang nanti dengerin.“
„Tapi kaoe tentoe tida mengarti,“ kata Lie Tjhoen sambil tertawa.
„Biar! biar! hajoe batja sadja, Twako,“ saoet jang laen-laen.
Kaloe tida sala, ini anamblas hoeroef ada satoe sairan jang ada berarti loewas. Dan kaloe dibatja, boenjinja, begini: Tjan Thian Heng To, Kioe Tjhoen Tiong Gie, Kiem Gho Pie Siang, Piat Joe Thian Tee. Nah tjobalah kaoe pikir, apa artinja begitoe?"
Bener-bener soesa,“ saoet itoe soedara-soedara jang tida mengenal soerat, dan tida mengarti sekali-kali bagimana moesti diartiken. Tapi lantaran soeda dibatjaken, marika merasa poewas djoega.
Tapi,.... eh!“ kata Lie Tjhoen sembari pegang-pegang leher sendiri: „ini..... ini..,. ada seperti......„
Seperti apatah, Twako?" menanja itoe anam soedara ampir dengen soeara berbareng: „mengapa?“
Ini ampat hoeroef jang berboenji: Tjan Thian Heng To,“ kata Lie Tjhoen: „akoe inget! ja, akoe inget,“
„Inget artinja?“ tanja itoe semoea soedara.
„Boekan,“ djawab itoe Twako: „hanja ada itoe hoeroef djoega, jang seperti doeloe ada terloekis di kaen bendera depan Tionggitong di Liangsan.“
„Benerlah: Benerlah; Tapi....“
„Dengen ini perkatahan, kaloe menoeroet akoe poenja doegahan dan djoega kaloe tida sala boleh djadi dengen adanja ini batoe dari langit, Allah maoe soepaja itoe pakerdjahan jang doeloe tertoenda, sekarang dilandjoetken oleh kita.“
„Boleh djadi bener ada begitoe roepa! Boleh djadi sekali, Twako!“
„Kaloe begitoe, baeklah kita simpen ini batoe," kata poela soedara jang laen-laen: „dan kaloe bener demikian, di kamoedian hari nanti bisa didapet kanjatahan.“
Lie Tjhoen moefakat dengen perkatahan soedara-soedaranja itoe: Kamoedian iaorang prenta pengikoetnja bena-benaken itoe perabotan minoem dan lantas balik kombali ka praoenja kerna itoe waktoe poen hari telah moelai pagi.
Di tenga telaga dimana praoe itoe berdjalan, Lie Tjoen dan sekalian soedara-soedaranja merasa amat girang. Marika pertjaja, bahoewa ini ada koernianja Allah jang soeda toeroenken itoe batoe adjaib.
„Sasoenggoenja kaloe dipikir betoel-betoel aneh sekali.“ kata Tong Beng. „jang di waktoe tida disengadja kita bisa sampe ka itoe tempat dan kamoedian dapetken ini batoe adjaib. Tidakalı bener begitoe Liatwie Hengtiang?“
„Ja, sasoenggoenja djoega ini ada satoe kagaiban,“ kata Hoei Po: „dan akoe moefakat bener dengen pendapetannja Twako, jang bilang, boleh djadi batoe ini telah ditoeroenken oleh Allah, boeat peringetken kita berame aken lakoeken poela itoe pakerdjahan jang doeloe dilakoeken oleh Song Kong-beng satenga djalan. Dan kaloe sasoedanja didapet kanjatahan bener begitoe adanja, haroeslah kita djangan ajal lagi."
Semoea orang ada merasa girang, dan sigra djoega dalem itoe praoe diatoer lagi gelas-gelas, dimana itoe toedjoe soedara kombali berminoem-minoem sambil tjeritaken halnja itoe batoe moedjidjat. Di waktoe pagi begini, pemandangan di sakiter itoe telaga ada amat bagoes. Di sana sini kaliatan daonnja papoehoenan djadi poeti seperti perak, lantaran bekas teroeroek saldjoe jang djato samalem.
Goenoeng-goenoeng poen kaliatan poeti meletak, hingga pemandangan alam di sitoe bener- bener tida ada saingannja.
Tapi waktoe matahari moelai naek dan sinar panas moelai pentjarken tjahajanja, sigra djoega saldjoe itoe djadi loemer kombali, dan pelahan-pelahan poehoen-poehoen djadi kaliatan idjo kombali.
Tida lama kamoedian sigra ini toedjoe soedara telah sampe di tempat sendiri. Marika laloe bawa itoe batoe ka dalem roema dan taro di atas medja jang bresi, dengen dihormatken seperti patoeng berhala. Sanak koelawarga dari itoe toedjoe orang gaga poen, semoea pada dateng meliat itoe batoe moedjidat, dan waktoe denger bagimana Lie Tjhoen dengen sadereknja toetoerken djatonja itoe batoe, masing-masing kaliatan djadi amat kagoem dan pandang lebi soetji dari jang soeda-soeda.
„Sekarang bagimanatah kita moesti berboeat, soedara-soedara?“ tanja Lie Tjhoen pada itoe anam soedara angkat.
„Sekarang biarlah kita berichtiar, boeat toenggoe sampe dateng temponja, saoet itoe soedara.
Lie Tjhoen rasa bitjara itoe ada bener. Begitoelah moelai dari itoe waktoe, tida brentinja iaorang roendingken perkara-perkara jang berhoeboeng dengen keadilan dan bersifat Tionggi, sabagimana doeloe waktoe masi di Liangsan telah dilakoeken oleh Song Kang dengen sadereknja.
Tapi sabelon ini pakerdjahan jang dimaksoed blakangan moelai dilakoeken, pakerdjahan tangkep ikan masi teroes sadja, kerna pakerdjahan itoe poen ada mendatengken kaoentoengån besar.
Demikianlah, lantaran dapetnja itoe batoe moedjidjat. jang sampe di itoe waktoe mas belon bisa diterangken apa boenjinja, marika poenja hati jang dingin dan tawar boeat Tjampoer dalem, oeroesan negri, sekarang telah timboel kombali.