Pembalesannja Kawanan Liangsan/Bagian ka ampat/Bab 9
IX
Deengen banjak soesa, Lie Eng dapetken
kamenangan dengen menjabrang
di soengei Hongho
Koetika Lie Eng sedeng atoer pasoekannja, satoe soldadoe Kim jang denger itoe kabar lantas boeroe-boeroe membri taoe pada Ouw Lok, Jang lantas sadja koempoelken sakalian pahlawannja aken berdami.
„Sekarang itoe brandal-brandal dari lemmatjwan telah tinggalken sarangnja, hendak poelang ka Selatan,“ kata Ouw Lok: „maka inilah ada waktoe jang baek boeat kita dapetken pahala besar. Apa poela kaloe bisa tangkep itoe Lie Eng.“
Pahlawan-pahlawan Kim semoea njataken girangnja hati dan lantas sadja maoe bersiap. Tapi Ong Pah lantas menjega sambil berkata:
„Kaloe menoeroet akoe poenja pikiran, baek kita tinggal diam sadja doeloe, djangan berlakoe terlaloe boeroe. Sebab moesoe jang dateng dari djaoe, tentoe sadja maoe dilakoeken pertempoeran dengen tjepet, soepaja begitoe tjepet marika bisa liwat. Tapi kita haroes bernanti sampe ramsoemnja ampir poetoes dan rahajatnja poenja birahan moelai linjap, baroe kita dateng menjerang.
„Dan sekarang," kata poela Ong Pah: „lekas kasi taoe pada That Gwanswe boeat minta dikirim lagi bala bantoean, soepaja sakali gebrak kita bisa dapet kamenangan dan tawan itoe Lie Eng dengen sakalian kawannja."
Ouw Lok satoedjoe dengen ini pikiran, maka sigra djoega ia toelis soerat pada That Lay dan prenta orang bawa itoe. Sedeng pada soldadoe-soldadoenja ia prenta djaga pasanggrahan biar keras, djangan ladeni tangtangannja moesoe.
Baroe sadja perdamian itoe selesih dan prenta-prenta dikaloearken, satoe pengawal dateng membri taoe, jang di loear ada moesoe dateng minta perang.
Panglima jang dateng itoe ada Ong Tjin bersama Houw-jan Tjiak. Tapi tangtangannja itoe tida diladenken. Phalawan-pahlawan Kim tinggal teroes mendjaga sadja, jang maski dimaki-maki, toch tida saorang jang kaloear.
Meliat moesoe tinggal diam sadja, sigra djoega marika menjerang dengen sengit. Tapi tida berhasil satoe apa.
Besokannja poen begitoe djoega, hingga marika balik kombali ka pasanggrahan sendiri dengen oering-oeringan.
Jan Tjeng satelah liat di fihak moesoe ada berdiam sadja, lantas njataken pikirannja, jang orang Kim tentoe ada mempoenjai maksoed laen.
„Moesoe toch ada mempoenjai soldadoe jang tida koerang dari limariboe djiwa,“ kata Jan Tjeng kamoedjan: „dan kaloe fihak kita poenja tangtangan di tinggal diam sadja, inilah boekan lantara moesoe merasa takoet, hanja tentoe ia maoe toenggoe sampe kita poenja ramsoem djadi abis dan napsoenja rahajat boeat herperang djadi linjap, jang kaloe soeda begitoe baroe ia maoe menjerang.“
„Itoelah boleh djadi,“ kata Lie Eng: „sekarang bagimana Janheng poenja pikiran, soepaja moesoe tida dapet sampeken maksoednja ?“
„Sekarang haroeslah prenta orang ronda disakiternja ini tempat, soepaja bisa tangkep moesoe poenja djoeroekabar,“ saoet itoe djoeroe pemikir: „kerna Ouw Lok tentoe ada membri taoe pada That Laij dan minta djoega itoe generaal tamba soldadoe boeat menggentjet pada kita dari moeka dan blakang.“
Lie Eng toeroet pikirannja Jan Tjeng, jang sering kali ternjata ada bener.
Tjoa Ging dan Touw Hing berdoea diprenta bawa barisan ronda, moesti pasang mata biar awas bagimana gerak-gerakannja moesoe. Djika katemoe orang-orang Kim, moesti lantas ditangkep.
Kadoeanja itoe trima prenta, lantas berlaloe. Selang satenga hari doea Hohan ini telah balik kombali dengen membawa doea soldadoe jang baroe danet ditangkeo. Badannja digledah, dan kadapetan satoe soerat dari Ouw Lok, jang minta dikirim bala bantoean.
Semoea Hohan jang ada di sitoe pada memoedji atas Jan Tjeng poenja pikiran jang tadjem, kamoedian Lie Eng prenta orang tabas itoe soldadoe Kim jang membawa soerat.
Tapi Houw-jan Tjiak ada di sitoe, lantas menjega, sebab ia liat doea orang itoe boekan seperti bangsa Kim sadjati.
Ini panglima lantas tanja soldadoe itoe poenja asal, apa marika itoe ada orang-orang Kim jang toelen
Ini laskar jang soeda djadi goemeter lantaran denger maoe ditabas, satelah denger itoe pertanjahan, lantas angkat kapala dan achirnja ia kenalin, bahoewa orang jang menoeloeng djiwanja ada Tjoetjiang sendiri.
Sigra djoega marika itoe djadi amat girang dan menjaoet, bahoewa marika berdoea ada berasal dari soldadoe Song, jang terpaksa menaloek pada Ouw Lok, lantaran berhianatnja Ong Pah, tapi hati kapingin bisa bekerdja kombali di barisan Song,
Baek, itoelah akoe nanti trima, kaloe sadja kaoe soeka mengakoe dengen sabenernja,“ kata Houw-jan Tjiak: „tapi, apa kaoe taoe, kenapa Ouw Lok tinggal berdiam sadja, dengen tida maoe kaloear perang?“
Itoe soldadoe lantas kasi taoe dengen sabener-benernja, bermoela memang Ouw Lok lantas maoe prenta pahlawannja madjoe bertempoer. Tapi Ong Pah soeda lantas menjega, dengen membri alesan jang di fihak Kim tida perloe kaloear perang boeroe-boeroe, hanja lebi baek ditoenggoe kaloe moesoe soeda moelai lelah dan ilang napsoenja.
Lebi djaoe soldadoe itoe tjeritaken djoega, jang Ong Pah kasi advies boeat Ouw Lok minta lagi soldadoe bantoean dari That Laij, soepaja bisa menggentjel dari depan dan blakang. Dan inilah ada pengakoean jang sabenernja, tida ada satoe apa jang marika tida tjeritaken.
Kamoedian ia harep dirinja soeka ditrima kombali.
„Djadi kaoe soeka menaloek dalem ini barisan?“ menanja Jan Tjeng.
„Tentoe sekali,“ saoet itoe doea soldadoe.
„Kaoe soeda menaloek pada moesoe, itoelah dosa terlaloe besar dan moesti dihoekoem mati,“ kata Jan Tjeng dengen soeara menggertak, tapi tida keras: „boeat itoe kadosahan ada satoe pahala jang kaoe dapet aken meneboes dosa, dengen dapet djoega satoe gandjaran besar, kaloe kaoe maoe lakoeken.
Itoe doea soldadoe djadi girang dan kata: marika soeka lakoeken dengen soenggoe, maski apa djoega boleh mendjadi.
Jan Tjeng djadi soeka hati dan sabelonnja laskar ini diprenta apa-apa ia soeroe orang anterin ka dalem, soegoein arak boeat ilangin kaget.
Arak bersama daging lantas disadiaken, hingga doea laskar itoe djadi girang dan minoem dengen senang hati.
„Dengen dapetnja ini doea soldadoe, ada besar sekali goenanja bagi kita,“ kata Jan Tjeng sambil tertawa.
Lie Eng djoega ada dapet pikir apa-apa jang baek boeat djalanken tipoenja. Begitoelah sasoedanja berdami, semoea Hohan lantas disoeroe meronda dan djaga hati-hati, boeat menoenggoe sampe dateng itoe hari, dimana tipoenja hendak didjalanken..
Marika toeroet itoe prenta, lantas berlaloe.
Pada hari jang katoedjoe, Jan Tjeng kaloearken kombali itoe papan gading jang doeloe ia dapet poengoet dari kolong medja. Sambil memandang itoe Bokkiap, ia berkata sembari tertawa:
„Ah, siapatah bisa doega, jang dengen ini papan boekan sadja kita bisa toeloengi djiwanja Kwanheng dengen antero koelawarganja, hanja kita poenja kamenangan di ini kali poen, ada dengen pertoeloengannja ini Bokkiap.“
Pakean soldadoe Kim jang ia dapet poengoet di medan perang dan memang ada sadia, lantas dikaloearken dan kasiken itoe pada Touw Hin, Jo Liem, Oan Swie dan Tjoa Ging, boeat menjaroe sabagi pengikoet. Sedeng ia sendiri laloe berpake seperti penggawe Kim, dengen bawa djoega bendera Radja Wali Itam.
Sasoedanja berdandan selesih, itoe doea soldadoe jang ditangkep waktoe membawa soerat dan sekarang telah menaloek pada barisan lemmatjwan, diadjarin apa moesti berkata kaloe bertemoe pada Ouw Lok.
Sasoeda itoe marika laloe kaloear dan menoedjoe ka pasanggrahan Kim. Satelah sampe, itoe doea soldadoe lantas bertemoe pada pengawal jang mendjaga, dengen membri taoe, jang That Gwanswe tida bisa kirim tentara bantoean, berhoeboeng dengen gerakan di laen fihak, jang kabarnja hendak dateng menjerang.
Tapi kendati begitoe, kata poela marika, That Lay telah prenta satoe Tjoetjiangnja dateng kamari.
Itoe pengawal lantas masoek membri taoe, tida lama marika telah berhadepan pada Ouw Lok, dimana ini soldadoe laloe toetoerken satoe persatoe, sedeng Jan Tjeng jang dioendjoek sabagi penggawenja That Lay, lantas dateng membri hormat dan bitjara dalem bahasa Kim, jang ia ada mengarti.
„That Goanswe merasa heran sekali,“ kata Jan Tjeng pada sasoedanja berdoedoek: „bagimana dalem ini pasanggrahan, jang ada mempoenjai limariboe balatentara, masi maoe minta lagi soldadoe bantoean? Goanswe tanja, apa dengen tentara sabegitoe banjak, Ouw Tjiangkoen masi merasa djeri boeat bertanding pada itoe brapa bidji brandal jang tida bergoena ?“
„Masalah moesti takoet sama segala brandal jang begitoean ?“ kata Ouw Lok dengen merasa maloe dan menjesel djoega: „dari bermoela poen akoe soeda maoe lantas prenta madjoe, soepaja begal itoe bisa rasaken bagimana kerasnja kita-orang poenja labrakan. Tapi apa maoe Ong Tjiangkoen membri advies ini dan itoe, jang dengen tida pikir lebi djaoe, akoe djadi moefakat dan toeroet pikirannja itoe,“
Ja, itoelah That Goanswe dapet taoe djoega," kata Jan Tjeng: sedeng Tjiangkoen ada begitoe pertjaja, tapi That Goanswe merasa tjoeriga pada Ong Pah."
„Apa, Goanswe ada tjoeriga ?“ tanja Ouw Lok dengen heran: „bagimana boleh begitoe?“
„Sebab Goanswe kata, maski Ong Pah soeda menaloek pada kita, tapi siapa taoe kaloe hatinja ada mempoeniai laen niatan ?“ saoet Jan Tjeng: „kerna ia itoe ada berasal orang dari Lamtiauw, dan siapa brani tanggoeng kaloe hatinja masi nget poelang ka itoe negri dan madjoeken pikiran sesat boeat menipoe kita, aken dapetken satoe pahala boeat teboes dosanja?“
Lebi djaoe Jan Tjeng berkata:
„Waktoe maoe ka mari Goanswe ada pesen: kaloe Ong Pah brani kaloearken perkatahan ini atawa itoe aken menghalangi kita poenja gerakan, tabas sadja kapalanja, soepaja itoe orang jang doeloe telah berhianat pada pasoekan sendiri, tida berhianat pada kita.“
„Gwanswe bilang begitoe?“ tanja Ouw Lok dengen soeara meneges.
Jan Tjeng memanggoet.
Maski itoe waktoe Ong Pah ada bersama-sama di sitoe, tapi ia tida mengarti apa jang orang lagi omongi, hanja tinggal berdiam sadja
Salagi Jan Tjeng dan Ouw Lok beromong-omong, satoe pengawal dateng membri taoe, bahoewa di loear ada ampat panglima moesoe jang minta perang, seraja bermaki-maki tida brentinja.
Mendenger itoe lapoeran, Ouw Lok lantas titahken orangnja sadiaken koeda dan sendjata, ia maoe kaloear boeat samboet moesoe. Ong Pah jang dari satadi ada berdiri, laloe menjega sambil berkata:
„Bala bantoean jang diminta belon dateng, maka lebi Baek Tjoetjiang bernanti sadja doeloe.“
Ouw Lok laloe deliki mata dan berkata dengen soeara keras:
„Lantaran kane, ampir sadja akoe dapet tjilaka, dan sekarang kombali kabe brani menjega?“
Mendenger itoe sentakan, Ong Pah djadi amat kaget dan tida taoe apa salanja. Sahelonnja ia bisa menjaoet, Ouw Lok lantas soeroe ia ber- pake-pake boeat toeroet melawan moesoe, kerna ia tida maoe berdiam sadja, sabagimana jang bermoela soeda ditoeroet.
Ong Pah tida brani kaloearken poela laen-laen perkatahan, hanja selaken koeda dan bawa sendjatanja.
Jan Tjeng berlima masi menoenggoe di dalem.
Sigra djoega kadoeanja ini telah sampe di loear.
Houw-jan Tjiak jang memang ada mencenggoe dari satadi, satelah liat Ong Pah lagi mendatengi, djadi amat goesar. Di sitoe ia lantas menjatji sambil menoeding, Ong Pah tida bisa menjaoet, hanja geprak koedanja dan lantas menikam.
Houw-jan Tjiak angkat kadoea roejoenenja dan timpaken itoe dikapalanja Ong Pah, hingga kadoeanja itoe berantem sengit.
Liwat sakoetika lama Ong Pah lariken koedanja, lantaran tida tahan. Ouw Lok jang liat begitoe, lantas kaloear dari dalem barisan dan pegat itoe moesoe. Tapi sabelonnja deket, djalannja telah dipegat oleh Kwan Siang, jang memang ada menoenggoe.
Bertempoer kira-kira tigapoeloe djoeroes lebi, Leng Tjin lantas boenjiken meriam pertandahan, jang tida lama kamoedian dalem pasanggrahan moesoe lantas kaliatan api berkobar-kobar. Sedeng soldadoe Kim lari kalangkaboet.
Ouw Lok jang lagi sedeng berantem, satelah denger soldadoenja kasi taoe, dalem pasanggrahan ada kabakaran, lantas tangkis sendjatanja Kwan Siang dan teroes baliki koedanja aken dateng menoeloeng ka dalem pasanggrahan.
Tapi datengnja itoe ada boeat pertjoema, kerna Jo Liem, Jan Tjeng, Oan Swie, Touw Hin dan Tjoa Ging ada mengamoek dengen heibat, jang satelah liat itoe panglima Kim, marika laloe keroeboeti dan serang dari kiri kanan.
Ouw Lok tida bisa tahan, satelah liat keadahannja ada sanget berbahaja, lantas sadja ia boeka satoe djalanan dara dan geprak koedanja aken merat.
Lima Hohan lantas hantem soldadoe-soldadoe moesoe seperti orang potong roempoet, sabagian jang masi idoep pada melariken diri, kerna tida ada kapalanja Dari dalem ini panglima menjerang kaloear, dimana sendjatanja sampe, tentoe ada moesoe jang roeboe.
Ong Pah jang denger itoe kabar, djadi kaget dan katakoetan. Ini penghianat soeda tida ada pikiran boeat melawan lebi lama, hanja geprak koedanja, boeat lari.
Tapi Houw jan Tjiak jang memang amat gemas, lantas memboeroe dan timpaken Piannja dari blakang, jang mengenaken bebokong koedanja, hingga binatang itoe mendjimprat amboel-amboelan, dimana Ong Pah lantas djato dari toenggangannja.
Rahajat lemmatjwan jang liat begitoe, lantas boeroe-boeroe dateng tangkep dan iket badannja itoe penghianat, kamoedian bawa ka pasanggrahan sendiri.
Dalem sabentaran sadja pasoekan Kim jang mendjaga soengei Hongho soeda tida ada kaliatan lagi, salaennja mait orang jang bersoesoen tindi.
Sasoedanja semoea Holian halik ka pasanggrahan, Ong Pah diprenta masoeki ka dalem kerangkengan besi.
Maski dalem ini paperangan fihak lemmatjwan dapet kamenangan besar, tapi Lie Eng kaliatan tida begitoe girang, sebab di soengei terseboet tida ada prace boeat menjebrang, hingga perdjalanan djadi soeker boeat dilandjoetken lebi djaoe.
Salagi ia maoe prenta orang potong poehoen-poehoen kajoe goena membikin getek, itoe doea soldadoe lantas dateng membri taoe, bahoewa di soeatoe tempat Ouw Lok ada semboeniken kira-kira tigaratoes boea praoe keijil dan besar, jang tjoekoep boeat dipake njebrang oleh rahajat lemmatjwan.
Mendenger ini lapoeran Lie Eng djadi girang dan lantas saeroe rahajatnja pergi ambil dengen teranter oleh itoe doea orang.
Waktoe praoe-praoe soeda sadia, orang orang prampoean lantas dititahken naek lebi doeloe, kamoedian orang-orang lelaki, dimana praoe lantas belajar dengen tida koerang soeatoe apa.
Tida lama kamoedian praoe-prace itoe telah sampe di sebrang Selatan, dimana masing-masing lantas naek, boeat landjoetken perdjalanan lebi djaoe.
Kota Leeyangshia jang masi terdjaga oleh panglima Songtiauw, dan jang balatentaranja doeloe ada di bawah prentanja Ong Tjin, satelah denger itoe warta, laloe kaloear menjamboet dan silaken semoea Hohan bersama rahajatnja masoek ka dalem kota.
Datoe panglima jang mendjaga kota Lee yanshia, Ong Tjin dapet kabar, pada boelan jang laloe Thong Soe-touw jang telah beroesia toea, telah menoetoep mata, hingga Lie Eng dan jang laen-laen, djadi sedi.
"Meninggalnja Lotjiong, soenggoe ada satoe karoegian boeat Songtiauw," kata Lie Eng: „tapi djoega tida boleh terlaloe diboeat seselan, kerna oesianja poen soeda amat toea."
Kamoedian dipanggil mengadep itoe doea soldadoe dan padanja dibriken saratoes tail mas saorangnja, dengen disoeroe poelang ka kampoeng sendiri boeat tengoki masing-masing poenja orang toea dan anak istri.
Kadoeanja itoe djadi amat girang, maka dengen berloetoet marika mengoetjap banjak trima Kasi, Kamoedian berlaloe.
Ong Pah jang tertangkep lantas dihadepken pada Lie Eng dan sadereknja, jang lantas maki dan nista sapoewasnja hati. Tapi ini penghianat tida brani angkat moeka, maka Houw-jang Tjiak dengen amat gemas laloe berkata:
„Satoe penghianat jang begini tida poenja maae loe, jang soeda baliki djoengdjoengan sendiri aken menaloek pada moesoe, dengen tida inget boedinja negri, boeat apatah dihadepken lama lama, hanja tabas sadja lehernja abis perkara!’
„Tapi hoekoeman tabas tida tjoekoep boeat ia poenja kadosahan," kata Ong Tjin dan Leng Tjin dengen soeara berbareng: „hanja baek seksa lebi doeloe. boeat gandjaran dari ia poenja perboeatan hianat jang meroesaki negri!' Semoea orang menjataken moefakat, maka Ong Pah laloe dibawa kaloear dan digantoeng di atas satoe balok, dimana beratoes soldadoe lantas lepasken pana, hingga saban-saban kadengeran soeara treak lantaran kasakitan.
Sasoeda melepasken napas dengen banjak sangsara, baroelah ma tnja ditoeroenin dan dipotong-potong, aken djadi makanannja binatang oetan.
Sorenja dari itoe hari Lie Eng adaken perdjamoean dan marika itoe makan minoem dengen senang hati. Sembari doedoek berdjamoe marika bitjaraken perkara-perkara jang berhoeboeng dengen maksoednja Kamoedian Lie Eng minta Tee Tjong berangkat lebi doeloe ka Lamkeng, boeat serepin bagimana keadahannja pasoekan Tjongtek, sedeng jang laen-laen aken menjoesoel blakangan.
Tee Tjong tocroet itoe prenta, lantas berangkat.
Lie Eng petja pasoekannja djadi tiga dan mengikoet dari blakang.
Tida lama kamoedian pasoekan itoe telah sampe di kota Tiongbokoan, dimana ada kaliatan soenji sadja.
Njalalah di waktoe terbit kakaloetan pendoedoek di sitoe telah lari ka laen tempat, hingga roema-roema djadi kosong.
„Akoe fasa baek kita berdiam sadja doeloe di sini, aken menoenggoe sampe Tee Wantiang balik kombali,“ kata Lie Eng, sasoedanja bikin papreksahan: „soepaja kita poénja tentara bisa mengaso."
Soedara-soedaranja tjoema menoeroet sadja, dan pasoekan itoe lantas masoek ka dalem kota.
Liwat doea hari, Tee Tjong jang pergi belon Kaliatan kombali. Maka boeat liwatken tempo Senggang, Jan Tjeng jatoe adjak Jo Liem bersama Tjhie Seng dan Houw-jan Giok pergi memboeroe ka dalem oetan, denges mengadjak sapoeloe liauwlo.
Poelangnja dari pemboeroehan marika djalan dengen pelahan sambil memandang tempat-tempat di sakiternja sitoe. Sasampenja di satoe djalanan besar, mendadak kaliatan doea kreta jang didoedoeki oleh ampat orang jang berpakean saderhana, sedeng di blakangnja ada berdjalan satoe penggawe jang membawa banjak soerat-soerat, dengen aia tiga pengikoet jang meimikoel barang-barang.
Jan Tjeng awasi orang jang berkandaran itoe, jang achirnja seperti merasa kenal, tapi tida inget soeda katemoe di mana. Kamoedian ia mengawasi itoe pergeawe, jang dari pakeannja njata ada djadi pengiring persakitan.
Tida lama dari itoe djoeroesan djoega ada kaliatan satoe penggawe jang membawa satoe barisan, dimana Jan Tjeng bersama kawan-kawannja lantas berdiri diam aken mengawasi. Tapi sabelonnja satoe pada laen bisa berkata apa-apa, itoe pengawe jang blakangan satelah meliat padanja, laloe berseroeh:
„Apa orang jang berdiri itoe boekan Siauw-it-ko?!”
„He, Japheng?” kata Jan Tjeng sambil melengak.
„Ja, benerlah akoe,” kata itoe penggawe dengen girang, jang lantas hamperi dan Jan Tjeng laloe perkenalken penggawe itoe pada kawannja, bahoewa ia ini ada Jap Bouw, kantoor Kayhonghoe poenja Betauwkben dan doeloe ada tinggal di deket roemanja Dji Louw Hoangwe.
Kamoedian ia tanja ka mana Jap Bouw hendak pergi, maka dandanannja seperti orang maoe pergi ka tempat djaoe.
„Ja, sasoenggoenja ada bener kaloe Janheng doega begitoe,“ saoet itoe penggawe sambil bersenjoem: „kita-orang bakal pergi ka satoe tempat jang diaoenja delapanriboe li.“
„Begitoe? Ada perloe apa?“
„Menganter itoe orang-orang.“
Sembari kata begitoe Jap Bouw menoendjoek ka djoeroesan dimana tadi kreta itoe liwat. Jan Tjeng djadi bengong sesa'at. Kemoedian menanja: siapatah adanja orang-orang itoe, ka tempat mana marika maoe pergi, ada kaperloean apa dan laen-laen poela. Achirnja ia kata: roepanja orang itoe ia Poen seperti. mérasa kenal. Siapatah sabenernja dia itoe?
„Marika itoe ada orang-orang terkoetoek," saoet Jap Bouw: „kaloe Janheng bilang ada kenal, boleh djadi kaoe pernah liat. Tjobalah inget-inget, sigra djoega kaoe nanti kenali."
„Soenggoe akoe loepa," kata Jan Tyeng.
„Marika itoe jang membikin doenia djadi kaloet, “ kata Jap Bouw dengen soeara penoeh kadjemoean. Jang kamoedian lantas kasi taoe, bahoewa orang-orang itoe ada Tjoa Keng, Ko Kioemdan Tong Koan, sedeng jang satoenja ada Tjoa Thaysoe poenja anak jang bernama Tjoa Yoe.
„Oh, oh, dia, “ kata Jan Tieng seperti orang jang baroe inget.
Lebi djaoe Jap Bouw tjeritaken, doeloean ini sakawan dorna pernah diboewang. Tapi lantaran katjerdikannja Tjoa Keng dan Ko Kioe, jang bisa ambil-ambil hatinja oppas penganter, marika dikasi kalaloewasahan di djalan. Dengen menggoenaken itoe kamerdikahan jang didapet, marika lantas merat dari djagahan dan semboeni di satoe pedoesoenan.
Tapi sadari Khong Ong doedoek mamerenta dimana Lie Kong telah diangkat djadi Tjaysiang, ini mantri jang satia dapet taoe bahoewa ampa dorna ini sabelon sampe di tempat boewangan soeda boeron. dan prenta orang tangkep kombali, Sekarang kantoor Kayhoughoe prenta ia jang menganter. ka kota Tamtjioe, soepaja dorna-dorna itoe tida bisa minggat lagi.
Lebi djaoe panglima itoe kata: lanlaran di kota Kikoan ada banjak pendjahat, maka boeat pergi ka Tamtjioe ia ambil djalanan dari sini. Kamoedian balik menanja pada Jan Tjeng, mengapa ja ada di sini.
Jan Tjeng djawab satoe persatoe, kamoedian minta Jap Bouw mampir sabentaran ka dalem kota boeat minoem satjawan arak dan berkenalan pada sakalian Hengte-hengtenja.
Jap Bouw trima ini oendangan, maka boeroe-boeroe ia menjoesoel itoe orang jang mengiring persakitan, aken masoek ka dalem kota, dengen alesan hati soeda sore dan di depan tida ada roema penginepan, maka baek brenti di dalem kota sadja.
Kamoedian bersama Jan Tjeng dan jang laen-laen paaglima ini menoedjoe ka kota Tiongbo-koean.
Sasampenja di dalem kota, Jan Tjeng lantas katemoein Lie Eng jang lagi doedoek berkoempoel, dan kasi taoe tentang pertemoeännja pada Jap Bouw, jang lagi mengiringken itoe dorna, hingga Semoea orang djadi girang. Lebi djaoe Jan Tjeng tjeritaken apa jang baroesan Jap Bouw telah toetoerken, kamoedian sasoeda panglima ini mengadep dan djalanken kahormatan, marika latoe doedoek beromong-omong tentang halnja itoe ampat mantri dorna, lang lantaran kaliwat djahatnja, masing-masing ingin djalanken hoekoeman sendiri dengen saorang sakali batjokan.
„Apa tida tjoekoep kaloe kita-orang lakoeken begitoe, sabagi penjamboetan ?“ kata itoe Hohan-hohan sambil tertawa.
„Oh, itoelah tida boleh,“ kata Jan Tjeng: „sabab dengen batjokan, sakali atawa doea kali sadja si dorna bisa lantas poetoes djiwa, hingga tida tjoekoep boeat kita-orang dan tida mamoewasken hati.“
„Bagimana Janheng rasa paling baek ?“ tanja jang laen-laen.
„Akoe pikir, baek kita bikin begini-begini,“ kata itoe djoeroe pemikir, jang lantas njataken pikirannja.
Semoea Hohan jang denger merasa soeka hati, maka niat itoe lantas ditetepken.
Tatkala itoe kreta jang moeat ampat dorna soeda masoek ka dalem kota dan ditempat di satoe roema kosong boeat djadi pondokannja, dan itoe oppas-oppas jang mengiring ditempatken di sebla loear. Lie Eng laloe adaken perdjamoean boeat Jap Bouw, jang trima ini soegoehan dengen senang hati.
Sembari minoem Jan Tjeng bitjaraken tentang itoe pertemoean jang sabentar ia aken bikin pada Tjoa Keng, Ko Kioe, Tong Koan dan Tjoa Yoe, dan itoe semoea pesenan ditoeroet oleh Jap Bouw dengen sagala senang hati.