Pembalesannja Kawanan Liangsan/Bagian ka ampat/Bab 17
XVII
PAMERENTAHAN KIMGO BERDIRI LEBI TEGOE DAN KIONG TO DENGEN KAMBRATNJA ABIS DIBINASAKEN SAMA SEKALI.
Perdjamoean besar lantas diadaken boeat kahormatannja itoe Hohan-hohan jang baroe sampe. Tetaboehan dan toekang-toekang menari poen tida katinggalan boeat merameken itoe pesta. Semoea orang-orang gaga jang berkoempoel kaliatan amat girang.
Sambil minoem jaorang tjeritaken perdjalanannja ka ini poelo, sabagimana jang pembatja telah taoe dan tida perloe dioelangken poela. Sedeng Lie Tjhoen, atas pertanjahannja Lie Eng dan jang laen-laen, djoega toetoerken bagimana datengnja ka Kimgo bersama bebrapa soedara angkat jang lama dan baroe, bagimana ini poelo telah didapetken dan sabaginja.
Kamoedian Lie Eng tjeritaken bagaimana lantaran karembet dengen perkaranja Touw Hin, sampe ia naek ka Immatjwan, di ini tempat bebrapa kali ia moendoerken moesoe jang menjerang dan kamoedian tinggalken itoe goenoeng, boeat pergi menaloek pada Kong Ong. Tentang lembeknja baginda Wie-tjor g dan Kim-tjong, jang sekarang soeda ditangkep oleh negri Kimkok, bagimana kamoedian niat itoe djadi gagal dan lantas pergi ka Teng-hoen san, sedeng di djalan, lantaran toeloengi Tjoe-heng dan Song Hoangwe, djadi bikin roesoe di kota Tjitjioe dan kamoedian rampas Kim Boet-toet poenja kapal-kapal perang, baroe menoedjoe ka mari.
„Njatalah datengnja soedara-soedara, ada seperti Allah poenja kahendak boeat menoeloeng kita-orang di sini,” kata Lie Tjhoen:„doeloean soedara An To-tjwan poen telah pernah sampe ka ini tempat, sataoe ka mana perginja sekarang ini{{|...|10}}”
„la djoega ada ikoet kita-orang,” kata Lie Eng jang poetoesi perkatahannja Hoen-kang-liong dan tjeritaken bagimana An To-tjwan bersama laen-laen soedara masi ada di poela Tjingsoei boeat lindoengi kaoem prampoean jang ditinggal doeloe di sana, sebab koerang perloe waktoe geraken pasoekan boeat menjerang Sat Tauw-to, dibawa djoega orang-orang prampoean.
Lebi djaoe Lie Eng tjeritaken, bagimana di poelo Tjengsoei masi ada banjak kapal-kapal perang, hingga Lie Tjhoen jang denger begitoe djadi girang dan berkata:
„Kaloe begitoe, oh, kita-orang moesti lekas samboet adjak ka mari.” Kamoedian prenta orangnja pergi bikin sediahan boeat menjamboet itoe sakalian Huhan dan fami ie familie prampoean di poelo terseboet. Sedeng perdjamoean di astana Kimgo dilandjoetken sampe djane malem.
Besok pagi baroe orang bikin persediahan boeat menjerang Siamlo, sebab menoeroet Lie Tjhoen poenja pikiran, salagi moesoe dapet kakalahan besar dan sedeng lemahnja, moesti lantas dikedjer, djangan kasi tempo boeat dapetken lagi tenaga baroe.
Semoea soedara-soedaranja njatakan moefakat.
Hoei Po dititahken mendjaga Kimgo, sedeng Tek Seng pergi ka poelo Tjengsoei boeat samboet familienja Lie Eng. Kamoedian pasoekan dari Kimgo lantas berangkat djalan.
Itoe waktoe Sat Tauw-to jang soeda kala, bersama sama Khik Ping lantas mendarat di pelaboean Siamlo, dan prenta satoe orang pergi tjari taoe keadahannja moesoe jang lagi mengepoeng kota.
Orangnja membri taoe, Tong Wie dan Tong Beng satiap hari poekoel kota tida brentinja, hingga dari dalem tida ada jang brani keloear melawan.
Mendenger itoe kabar, Sat Tauw to lantas berkata:
„Kaloe begitoe, tjilakalah kita ini, sebab di depan ada moesoe jang lagi menjerang kita poenja tempat, sedeng di blakang ada Lie Tjhoen jang mengedjer, hingga moendoer tida bisa, madjoe poen bakal soesa.”
„Kaloe begitoe, baeklah kita berperang sadja mati-matian,” kata Khik Ping.
„Oh, itoelah tida boleh,” saoet Sat Tauw-to: „paling baek kita moesti pindjem lagi tentara, brangkali masi bisa lawan pada moesoe.”
Kamoedian Hos ang ini kasi taoe maksoednja, ìa niat pindjem soldadoe pada negri Djitpoen, dengen bikin perdjandjian, kaloe bisa rampas Kimgo dan Siamlo poenja keadahan tida djadi terganggoe, nanti dibagi tempat-tempat atawa barang moestika. Kamoedian pergi ka laen-laen poelo jang memang soeda lama ada menaloek pada Sia mlo boeat ambil tentara, soepaja bisa digoenaken tjoekoep boeat menangkis serangannja Lie Tjhoen.
„Melinken begitoe sadja, baroe kita-orang bisa lawan kombali kakoeatannja moesoe,” kata Sat Tauw-to kamoedaian.
Khik Ping njataken moefakat, maka sigra djoega ia berangkat ka tempat jang terseboet boeat koempoelken rahajat.
Itoe waktoe kadatengannja Sat Tauw-to ada jang kasi taoe pada Tong Beng, maka ini orang gaga laloe berdami pada soedaranja, soepaja diatoer pendjagahan lebi tegoe, djangan sampe dari laoet dateng menjerang.
Koetika dipreksa, baroelah ini doea soedara dapet liat, bahoewa pasoekannja Sat Tauw-to jang dateng itoe, soeda tida karoean matjem. Tapi maski begitoe Tong Wie masi tida brani geraken tentara dengen gegaba, sebab soeda taoe jang Hosiang itoe poenja ilmoe ada amat djahat dan tida bisa dilawan dengen sawadjarnja.
Kamoedian besokannja Sat Tauw-to tarik antero pasoekannja jang sisa mati masoek ka dalem kota, dan Tong Beng jang liat itoe tida brani menjerang, sedeng dari fihak moesoe poen tida ada bikin gerak gerakan jang mengoeatirken.
,,Kaloe diliat matjemnja Sat Tauw-to soeda dapet serangan keras dari kita poenja Twako," kata itoe doea soedara dengen girang: ,,oh, soekoer sekali kaloe betoel begitoe, sekarang biarkenlah marika masoek dan kita boleh lantas koeroeng kombali."
Lantaran begitoe, maka Hosiang ini soeda masoek ka dalem kota dengen tida ada halangan. Datengnja disamboet oleh Kiong To, jang tanjaken bagimana paperangan di Kimgo, maka bisa dapet karoesakan begitoe besar.
,,Soenggoe tida doega sekali Koksoe bakal menampak bahaja begitoe heibat," kata Kiong To dengen penoeh rasa koeatir: ,,ada siapatah jang telah bantoe pada Lie Tjhoen, maka Koksoe soeda dapetken itoe kakalahan besar?"
,,Troesa Tay-ong djadi koeatir," kata itoe siang jang masi djoega maoe oendjoek kasombongannja: ,,ini semoea ada dari lantaran Khik Khoen koerang hati-hati, hingga djiwanja djadi binasa; tjoba kaloe ia toeroet betoel akoe poenja prenta, masatah boleh djadi begini roepa. Tapi sekarang troesa salempang, kerna Khik Ping akoe soeda prenta pergi koempoelken tentara boeat menjerang kombali pada Lie Tjhoen."
Kamoedian ia kasi taoe bagimana Khik Ping telah diprenta ka negri Djitpoen dan ka tiga poelo taloekan boeat ambil rahajat jang ada di sana, kaloe pasoekan perangnja soeda tegoe kombali, ia nanti geraken poela tentara boeat poekoel Kimgo.
Kiong To jang tadinja soeda merasa keder, djadi girang kombali dan sekali-kali tida taoe, jang ilmoenja ini Hosiang soeda dipoenaken oleh moesoe, ia kira bener jang dalem ini kakalahan ada dari lantaran salanja Khik Khoen, jang sekarang telah binasa."
,,Boeat ini oeroesan, akoe salaloe mengandel Koksoe poenja kasaktian dan kapandean," kata Kiong To: ,,maka hareplah Koksoe berlakoe soenggoe-soenggoe, boeat bantoean mana akoe tentoe tida aken loepa."
,,Taij ong troesa koeatir jang akoe tida berkoeat atawa nanti tinggal satenga djalan," kata ini Hosiang kaparat, jang koenjoeng-koenjoeng dapet satoe ingetan boeat dapetken maksoednja: „kaloe sadja kahendakkoe ditoeroet betoel, pastilah akoe nanti belaken dengen sagenepnja tenaga dan hati."
,,Boeat sampeken Koksoe poenja kahendak, tida ada satoe apa jang akoe nanti toelak, katakenlah apa adanja itoe?"
,,Doeloe waktoe Ma Kok-tjoe kena dikoeroeng oleh Lie Tjhoen poenja angkatan perang, radja Siamlo soeda ambil Hoa Hong-tjoen mendjadi Hoema, sagala kasoesahan lantas mendjadi linjap. Nah sekarang boeat goena Taij-ong poenja kadoedoekan dan kapentingan, apa Taij-ong aken berat ambil saorang pande boeat didjadiken Hoema dan dibriken kakoeasahan besar boeat melawan moesoe? Akoe kira tida, boekan?"
,,Boeat ambil saorang pande mendjadi Hoema?"
,,Bener, begitoelah jang akoe tanja."
,,Tapi siapa adanja orang pande itoe? Apa Koksoe sendiri boekan ada saorang jang pande dan sakti jang tentoe bisa moendoerken moesoe?"
Maski moeloetnja kata begitoe. tapi Kiong To tida sekali bisa doega, kaloe Sat Tauw-to ada niatan soeka pada gadisnja. Dalem hatinja tjoema kira jang Koksoe maoe poedjiken laen orang jang djadi sobatnja.
,,Benerlah sabagimana Taij-ong kataken," djawab Sat Tauw-to, jang lantas mengakoe bahoewa ialah, boekan laen orang.
Kiong To djadi kamekmak dan ampir tida bisa berkata-kata. Bermoela ia tida bisa pertjaja kaloe ini orang alim ada mempoenjai ha i ingin beristri. Tapi sekarang toch soeda njata dari omongannja itoe.
„Apa sekarang akoe moesti bikin?“ tanja Kiong To dalem hati, sambil bengong terlongong-longong.
Kerna sasoenggoenja dalem ini oeroesan Kiong To tjoema mengandel atas kadjahatan Sat Tauw to, jang kaloe Hosiang ini pergi atawa tida maoe membantoe dirinja boleh djadi berbahaja, maski dalem hati ada mendongkol, tapi ia tida brani njataken itoe, hanja berkata sadja dengen sabar: bahoewa permintahannja nanti diloeloesken, kaloe sadja Kimgo soeda dapet dan Lie Tjhoen dengen antero pasoekannja telah dibinasaken.
Tapi Sat Tauw-to tida maoe dibikin ini perdjandjian, hanja sambil berbangkit ia kata: kaloe dirinja maoe dibikin sabagi koeli, jang kaloe pakerdjahan berhasil baroe dibri oepah, itoelah banjak trima kasi, dan sekarang djoega ia hendak pergi.
Kamoedian ia kaloear.
Kiong To djadi kaget dan boeroe-boeroe pegang tangannja itoe Hosiang kaparat sambil berkata:
„Ah, mengapatah Koksoe boleh dapet pikiran begitoe, apa sasoenggoenja Koksoe nanti tega boeat tinggalken akoe poenja pekerdjahan jang belon berhasil, jang sabenernja ada atas Koksoe djoega poenja andjoeran?“ ,,Boekan begitoe, Taij-ong tida mengatahoei atoeran-atoeran di atas langit," kata si kaparat jang tjoba mendjoesta: ,,akoe poenja ilmoe dan kasaktian tjoema boleh digoenaken boeat diri sendiri. Djika Taij-ong pada akoe tida terkena familie atawa sanak, apatah akoe tida jadi berdosa besar boeka pemboenoehan djiwa begitoe banjak, tjoema sakedar boeat laen orang jang tida teritoeng koelawargakoe?"
„Akoe toeroet semoea Koksoe poenja perkatahan dan kahendak," kata Kiong To jang katakoetan ditinggal pergi.
Sat Tauw-to djadi amat girang dan lantas oeroengken berangkatnja.
Maski dengen roepa menjesel, toch Kiong To masoek dalem kraton, dimana ia tjeritaken pada istrinja apa jang baroesan soeda ditetepken.
Sang istri bermoela tida bisa satoedjoe, kaloe anaknja jang prampoean dikawiri pada itoe Ho-siang, jang boekan sadja soeda toea, tapi djoega amat djelek dan tida berbanding boeat djadi pasangannja anak gadis. Sasoeda dikasi katerangan- katerangan pandjang lebar dan diboedjoek dengen soesa, baroelah perkara jang dimaksoed dapet dibikin beres.
Atas katerangannja Sat Tauw-to, ini hari poen ada amat baek, maka kawinan boleh dibikin sabentar sore sadja.
Begitoelah orang lantas bersedia-sedia dengen repot, dalem sepa djang bikin persediahan, Kiong To berkata dalem hati sendiri:
„Sabelon dapetken laen orang poenja istri dan familie, anak sendiri moesti diserahken pada orang! Ah, soenggoe! tapi apatah maoe dikata, kerna akoe tida mempoenjai laen andelan dari dia sendiri.”
.................................................................
Sabagimana pembatja telah taoe, sadari brapa hari jang laloe Ko Tjeng soeda ada dalem kraton dan lagi berdaja boeat bikin pergerakan dari dalem poekoel kaloear dan dari loear nanti poekoel ka dalem.
Bersama Ho Hap-dji iaorang bermoefakatan pada mantri-mantri jang masi bersatia pada Kokbo dan bentji pada Kiong To.
Tapi sabelon maksoed ini kasampean, dateng warta jang Kiong To boeka pintoe menjamboet poelangnja Sat Tauw-to, sekarang itoe Hosiang ada di dalem kota dan pasoekannja jang dari Kimgo masi ada di pelaboean.
„He, apa artinja ini semnea?” pikir Ko Tjeng dengen kaget dan heran: „Sat Tauw-to soeda balik ka Siamlo, apa ada dalem kakalahan atawakah dapet kala?”
Ko Tjeng tida brani mendoega lebi djaoe. Menoeroet ia poenja taoe, Hosiang itoe poenja ilmoe amat djahat. Apa brangkali Kimgo soeda dapet dipoekoel petja, maka sekarang Sat Tauw-to djadi poelang kombali? Kaloe bener begitoe, tjilakalah soedara soedaranja jang ada disana.
Tapi kaloe maoe doega jang Hosiang itoe soeda kala dan dapet dipoekoel moendoer, djoega amat soesa boeat dipertjaja! Boekantah ia sendiri telah liat, jang Lie Tjhoen tida bisa menangin dan saban-saban pasoekan Kimgo dipoekoel moendoer?
Hatinja djadi bingoeng. Tapi boeat me bikin enak hati, ia ambil alesan aken mendoega, brangkali sala satoe Hengtenja di Kimgo soeda bisa poenaken ilmoenja itoe Hoantjeng jang djahat, hingga sekarang ia poelang ka Siamlo dengen kakalahan.
Kamoedian persediahan-persediahan jang lagi diatoer lantas dibrentiken boeat samantara waktoe, jang sasoedanja berdami, ia lantas toelis satne soerat dan prenta Ho Hap-dji pana ken ka pasanggrahannja Tong Beng.
Sampe itoe waktoe Ko Tjeng masi belon taoe, jang pasoekan Kimgo djoega soeda sampe ka pelaboean Siamlo.
Hap-dji toeroet prenta dan pada malemnja salagi banjak orang makan minoem di gedongnja Kiong To, ia iket soerat itoe di oedjoeng pana dan lantas panaken ka loear tembok kota, jang kabetoelan dapet diliat oleh soldadoenja Tong Wie, maka itoe soldadoe laloe poengoet dan bawa pada kapalanja. Dalem itoe soerat dikasi taoe, bahoewa persediahan-persediahan jang lagi diatoer aken ditoenda doeloe berhoeboeng dengen poelangnja Sat Tauw-to, sebab koeatir nanti kataoean dan kapiran. Tapi kaloe ia bisa dapet kabar jang soedara-soedaranja di sebla loear soeda bersedia sampe tegoe, ia nanti moelai lagi.
Tong Wie pada waktoe dapet itoe soerat, djadi amat girang dan lantas bawa ka kapalnja Lie Tjhoen jang baroe sampe tadi siang. Pada ini Twako dikasi liat boenjinja Ko Tjeng poenja soerat itoe, kamoedian diambil poetoesan, moesti lantas kasi balesan soepaja dari dalem bikin teroes persediahan troesa koeatir. Kaloe soeda beres, boeat membantoe moesti kasi tanda api.
Djoega diseboet jang pasoekan Kimgo soeda sampe boeat poekoel ka dalem.
Ko Tjeng djadi girang trima itoe kabar, maka hatinja poen besar sekali.
Sigra djoega apa jang perloe lantas diadaken.
Maleman dari itoe hari jang ditetepken, bener sadja di oedjoeng sebla Barat poenja oetan telah kabakar dan apinja naek ka atas langit dengen bersorot mera, hingga djaoe-djaoe orang bisa liat itoe tanda.
Itoe waktoe pasoekan Kimgo jang sadari trima soerat tjoema toenggoe waktoenja sadja boeat menjerang, satelah liat api berkobar-kobar, lantas geraken tentaranja madjoe menjerang ka pintoe kota.
Barisan itoe ada dipimpin oleh Hoa Hong- tjoen, Houw-jan Giok dan Tjhie Seng, jang satelah sampe lantas hantem kalangkaboet, tida lama kamoedian pintoe kota djadi petja dan rahajat Kimgo laloe masoek berobosan.
,,Djangan ganggoe anak negri!" berseroeh panglima-panglimanja jang pimpin itoe soldadoe: ,,siapa jang tida denger prenta dan bikin soesa pada rahajat, aken dapet hoekoeman berat!”
Sasoedanja semoea soldadoe ada di dalem kota, pasoekan ini lantas ambil djalan jang menoedjoe ka gedongnja penghianat Kiong To, jang itoe waktoe masi belon taoe bahaja apa lagi mendatengi.
Tida lama kamoedian kotanja ini penghianat soeda terkoeroeng rapet, maka satoe pengawal jang liat datengnja moesoe begitoe banjak, lantas boeroe-boeroe membri kabar, katanja:
,,Oh, Tay-ong! tjilaka, tjilakalah | moesoe poenja tiga panglima jang dikapalaken oleh Hoema soeda sampe depan kota dan lagi djalan menghamperi ka ini astana.”
Kiong To djadi bergoemeter sakoedjoer badannja. Itoe waktoe maoe lari, tapi tida kaboeroe, kerna di sana sini soeda banjak soldadoe dan tida lama kamoedian Hoema bersama laen-laen soeda masoek dalem kratonnja, boeat menangkep.
Kiong To bersama anak istrinja dan orang~ orangnja, semoea telah kabekoek.
Tapi Sat Tauw-to tida kaliatan dateng menoeloeng, salaloe ka mana perginja.
Sasoeda kawan penghianat itoe ditangkep, Hong-tjoen prenta orang bawa ka pendjara-boeat menoenggoe sampe dipreksa dan didjatoken hoekoeman tabas,
Dari sitoe baroe ia pergi ka kraton, katemoeken Kokbo dan semoea koelawarganja, jang samboet kadatengannja dengen girang, sambil menangis.
Sabelon berkata apa-apa, Kiongtjoe dan Kokbo begitoe poen iboe dan kohnja, lantas menanjaken ini itoe, jang berhoeboeng dengen kadatengannja, dan bagimana keadahan di Kimgo sekarang; apa Hoema dateng ka mari dengen bawa pasoekan besar dan laen-Jaen poela.
Hoema djawab: sekarang troesa koeatir, Kiong To dengen orang-orang saroema tangganja soeda ditangkep dan dibawa ka pendjara, tjoema tinggal tabas sadja. Datengnja ka mari ada membawa pasoekan besar, jang di-ikoet oleh bebrapa Siok-hoe dan Pekhoe; tapi Sat Tauw-to belon katangkep dan sekarang ia maoe tjari dan tangkep itoe Hosiang.
,,Sekarang belon ada tempo boeat kita bitjara-bitjara lebi djaoe, Boetjin,” kata Hoema: ,,kaloe kambrat-kambratnja itoe penghianat soeda terbekoek, akoe nanti tjeritaken satoe persatoe sadari berangkat dari Siamlo ka Kimgo, dan apa jang kamoedian terdjadi di itoe poelo dalem sapandjang waktoe, sampe sekarang”
Begitoe poen pada Kokbo dan Kiongtjoe ia ambil slamat tinggal, teroes kaloear dari kraton aken menoedjoe ka pintoe Timoer. Datengnja ini dipegat oleh Khik Tiauw, jang lantas atoer barisannja.
Hong-tjoen tida bernanti lama-lama, hanja sasoeda taoe moesoe itoe poenja nama, lantas sadja ia menjerang.
Khik tiauw menangkis dan bales poekoel dengen sendjata. Tapi dalem ini paperangan Hoema jang menang, kerna liwat sedikit waktoe moesoenja kena ditoesoek oleh Tiankeknja dan binasa di sitoe djoega.
Sigra djoega Hong-tjoen baliki tentaranja dan membri kabar pada Lie Tjhoen, jang lantas dateng bikin katentreman.
Tapi heran betoel, sampe itoe waktoe orang tida dapet liat ka mana perginja Sat Tauw-to. Pada orang-orangnja Kiong To jang ditawan, satoe persatoe ditanja ka mana perginja itoe Hosiang kaparat, tapi tida saorang jang taoe ka mana. Lie Tjhoen laloe bagi-bagi tentaranja boeat mendjaga.
Ko Tjeng djadi amat girang satelah katemoe Twakonja dan laen-laen soedara. Tida oesah ditjeritaken bagimana satoe pada laen djadi amat girang, dan satoe medja perdjamoean laloe diadaken boeat itoe soedara-soedarà.
Besoknja Lie Tjhoen pergi ka kraton boeat katemoeken pada Kokbo, dengen teranter oleh Hoema. Permisoeri satelah denger Hoen-kang-liong dateng, lantas prenta orang boeka pintoe besar dan samboet dengen sagala kahormatan.
Sasoeda pada djalanken kahormatan, baroelah Lie Tjhoen kasi taoe apa sebabnja maka pertoeloengan jang dateng ka mari djadi begitoe telaat, dan boeat ini harep Kokbo tida djadi ketjil hati.
Kokbo oetjapken banjak trima kasi, dan bilang: salamanja memang ia tida poetoes harepan boeat dapet Lie Taytjiangkoen poenja pertoeloengan. Achirnja dengen sedi baroe ditjeritaken kamatiannja Ma Kok-tjoe.
„Kok tjoe bener amat tida beroentoeng,” kata poela iboesoeri: „kerna ia telah mati djadi korbannja penghianat negri. Pastilah kita-orang semoea jang ada dalem krat n djoega menampak bahaja saroepa itoe, kaloe tida kaboeroe Lie Tay-tjiangkoen dan laen-laen Tjiangkoen poenja kagagahan, jang soeda lantas dateng membri toeloengan. Maka boeat itoe boedi jang amat besar, soenggoe kami tida loepaken.”
„Itoelah tida lebi dari pantes,” saoet Lie Tjhoen: „maka Kokbo boleh senangken sadja hati, kerna sekarang penghianat soeda tersapoe abis.” „Oh, Taytjiangkoen dan sakalian Tjiongtjiang poenja pertoeloengan, sasoenggoenja ada besar seperti langit. maka itoe tida boleh tida di-inget,” kata poela Kokbo: „apapoela Ko Tjiangkoen, jang dengen sendirinja soeda masoek ka dalem kota boeat atoer pendjagahan dan samboet sakalian Tjiongtjiang dari loear, gandjaran itoe besar sekali.”
Kamoedian Kokbo kata: gedungnja Kiong To jang besar dan bagoes boleh dirombak sadja djadi Gwanswe Hoe (gedong djendraal), dan boeat samantara waktoe biarlah semoea panglima dari Kim-go berdiam di sitoe sadja doeloe.
Lie Tjhoen oetjapken banjak trima kasi dan lantas berlaloe.
Kamoedian, waktoe itoe Hoa Kiongdjin dan Tjin Kiongdjin, djoega Kiongtjoe pada dateng katemoeken Lie Tjhoen, boeat hatoerken trima kasinja.
Selang brapa hari kamoedian Louw Andjin, Lu Siotjia dan laen-laen orang prampoean familienja Hohan jang baroe dateng dari poelo Tjingsoei, telah sampe, maka oleh Lie Tjhoen marika ditempatken doeloe pada Hoa Kiongdjin Ramsoem dan alat perang diserahken pada Tong Wie dan Tong Beng.
Sasoeda beres atoer semoea oeroesan, lantas Lie Tjhoen koerniaken pangkat pada seinoea mantri dan hoeloebalangnja negri Siamlo jang bersatia, sedeng soldadoe poen mendapet persen oewang. Ho Hap-dji jang mempoenjai pahala besar, lantas dipakerdjaken sabagi kapala dari pengawal kraton, samantara roema-roemanja rahajat negri jang roesak salamanja ada paperangan, dibikin betoel kombali dengen ongkosnja negri,
Kamoedian dikaloearken prenta, siapa jang dapet tangkep Sat Tauw-to aken dibriken persenan besar.
Sasoeda itoe lantas diadaken perdjamoean boeat panglima dan soldadoe-soldadoe, hingga rahajat negri poen toeroet soeka hati.
Di golongan panglima, lantaran itoe waktoe Hoei Po ada di Kimgo dan Tek Seng masi tetep mendjaga poelo Tjingsoei, maka Hohan-hohan jang berkoempoel dalem itoe pesta besar, tjoema ada ampatpoeloe doea orang sadja djoemblanja.
Sembari minoem, Hoen-kang-liong berkata:
„Ini kali poenja pesta boleh dianggap sabagi ampat roepa kagirangan, pertama: lantaran Siamlo dan Kimgo jang soeda ada dalem bahaja, bisa tetep kombali sabagimana biasa, ja malah lebi mahmoer dari jang soeda.
„Kadoea Ong Tjiangkoen, Loan Tongtjhi, Boen Tjambouw dan Houw Djinheng, jang maski boekan kita poenja soedara lama, toch dengen sagenepnja hati telah bantoe kita poenja gerakan hingga tida bedah seperti soedara angkat jang laen-laen.
„Katiga kita-orang jang doeloe waktoe masi di Liangsan djadi tertjere bere, sekarang bisa berkoempoel kombali, soeatoe perkara jang sasoenggoenja lebi doeloe tida sekali bisa di loega bakal alamken ini kagirangan.
„Keampat kita-orang haroes merasa girang meliat ampat tjoetjoe poenja kagagahan dan katabahan hati, jang bisa diharep nanti membangoenken kombali orang toeanja poenja nama dan gerakan jang doeloe hari telah djadi gagal, dan itoe semoea hal-hal jang baroesan diseboet, soenggoel ada satoe kagirangan besar.”
Semoea Hohan jang berkoempoel dalem itoe perdjamoean, benerken perkatahannja Lie Tjhoen, tjoema itoe ampat crang moeda, seperti Houw-jan Giok, Tjhie Seng, Song An-peng dan Hoa Hong-fjoen, oetjapken bebrapa perkatahan merendaken diri.
Kamoedian orang bersoerak dan tepok tangan.
Sedeng di Gwanswe Hoe orang makan minoem dengen sagala soeka hati, di laen-laen pasanggrahan poen, semoea soldadoe dan laskar perang lagi minoem-minoem dengen satoeroenja, jang memang disadiaken makanan dan arak.
Begitoelah sampe djaoe malem baroe pesta kagirangan itoe moelai boebar. Pada besok pagi waktoe orang doedoek berkoempoel, Gak Ho njataken pikirannja, berhoeboeng dengen meratnja Sat Tauw-to, baeklah dikaloearken laen-laen prenta, soepaja Hosiang jang djahat itoe lekas dapet katawan.
„Sat Tauw-to itoe maski soeda kala, tapi ia ada mempoenjai ilmoe iblis jang amat djahat,” kata poela Gak Ho: „maka tida boleh kita tinggal dengen tida perloeken lagi, sebab siapa taoe di kamoedian hari ia menerbitken laen-laen kadjahatan boeat bales sakit hati atas kakalahannja jang sekarang.
„Prenta-prenta boeat tangkep itoe Hoantjeng memang sadari kita-orang sampe di ini tempat, soeda. dikaloearken,” saoet Lie Tjhoen: „tapi sampe sekarang belon kataoean ka mana perginja. Tapi maski bagimana djahat djoega ilmoenja itoe Ho-siang, boeat sekarang kita orang troesa terlaloe koeatir, sebab Kong-soen Heng ada di sini.”
„Maski begitoe, toch lebi baek kaloe kita bisa tangkep padanja, boekan?” kata poela Gak Ho, jang kamoedian minta permisi boeat pergi ka koeliling kota boeat tjari itoe iman jang merat.
Permoehoenan ini diloeloesken dengen senang hati, maka sasoedanja bermoefakatan, Gak Ho lantas adjak Jan Tjeng, Houw-jan Giok dan Tjhie Seng, bersama anan pengikoet, pergi di koeliling kota.
Dalem perdjalanan itoe, tida saorang bisa mendoega lebi doeloe. Maka waktoe sampe di gredja Tjin-haij-si, keadahannja itoe klenteng jang bagoes soeda membikin hatinja Gak Ho djadi katarik.
„Oh, inilah satoe gredja jang amat bagoes,” kata Gak Ho dan kawan-kawannja jang waktoe liat menaranja itoe klenteng: „liatlah, menaranja ada toedjoe tingkat, jang ampir menjamboeng dengen awan.”
Jan Tjeng dan jang laen-laen poen amat kapingin boeat memandang bagoesnja itoe roema berhala, maka iaorang laloe herdami boeat brenti sabentaran aken liat-liat bagimana keadahan di dalemnja.
„Baeklah,” kata Gak Ho, jang lantas adjak kawan itoe masoek ka dalem.
Pengawal gredja jang meliat ada banjak tetamoe, lantas samboet dengen hormat dan silaken masoek ka dalem. Kamoedian ambilin thee boeat disoegoeken pada marika itoe.
Sambil minoem thee iaorang memandang koeliling tempat. Sasoeda itoe Gak Ho djalan-djalan dan hamperi ka satoe podjok, dimana koenjoeng-koenjoeng ada kaliatan boeroeng prendjak jang masoek di oedjoengnja itoe menara sambil berDoenji tida soedanja.
Sambil memandang itoe boeroeng, Gak Ho berkata pada Jan Tjeng:
„Siauw-it-ko, tjobalah kaoe djepret itoe boeroeng, jang akoe kira kaoe ada pande sekali menggoenaken djepretan, boekan?” Dengen tida oetjapken satoe perkatahan, Jan Tjeng lantas samboeti djepretan jang Gak Ho briken padanja; kamoedian tarik itoe pesawat, tapi sabelon batoenja melajang ka atas, boeroeng itoe soeda terbang.
Batoe dari itoe djepretan lantas masoek ka lobang djendela, dimana lantas kadengeran soeara orang mendjerit, hingga Jan Tjeng berdoea Gak Ho djadi terkedjoet tertiampoer rasa koeatir.
,,Ah, tjilakalah," kata Jan Tjeng dengen soeara menjesel: „kaloe begitoe ada orangnja di atas ini menara."
Kamoedian ia tanja pada pendjaga itoe gredja, siapa jang tinggal di atas ini. Pendjaga itoe djawab: satoe padri bersama saorang prampoean moeda, jang katanja baroe dateng dari sehoan dan boeat samantara waktoe noempang doeloe di sini.
,,He, satoe padri ?" kata Gak Ho dengen heran: ,,bagimanatah satoe padri boleh dateng bersama-sama saorang prampoean?"
,,Itoe prampoean katanja saorang melarat," saoet itoe pendjaga: „jang itoe padri maoe toeloeng anterken pada familienja. Tapi lantaran itoe familie belon katemoe, sedeng maoe djalan lebi djaoe, ini waktoe Siamlo dan Kimgo lagi dimaloemken paperangan, maka Hosiang itoe minta menoempang di sini."
Maski penjanetan itoe tida menerbitken rasa tjoeriga, tapi itoe soeara treakan jang menjataken kasakitan, lantaran kena didjepret, membikin Gak Ho dan Jan Tjeng merasa perloe boeat pergi liat dan toeloeng. Begitoelah kadoeanja itoe lantas naek ka lotengnja menara, dimana kaliatan ada saorang jang berpakean padri soeda pangsan dengen kapala bendjol bekas telanggar batoenja itoe pesawat jang baroesan dilepas.
Salagi Jan Tjeng merasa kasian, Gak Ho lantas dapet kenalin bahoewa orang itoe boekannja laen dari Sat Tauw-to, maka dengen girang ia lantas treaki pengikoetnja boeat iket ini orang jang pangsan.
,,He, mengapatah ?" tanja Jan Tjeng dengen goegoep: ,,kita toch......."
,,Dialah ada itoe orang jang kita lagi tjari, soedara," kata Gak Ho jang poetoesi bitjaranja Jan Tjeng: ,,dia ini boekan laen dari Sat Tauw-to, ― oh, bagimana beroentoeng kita ini, jang dengen tida disengadja soeda bisa katemoeken padanja dalem ini gredja, boleh bilang ini semoea ada Allah poenja pengoendjoekan."
Kamoedian badannja Sat Tauw-to lantas diiket, sedeng papreksahan lebi djaoe ada didapeti satoe koffer dari koelit kerbo, dalem mana ada berisi pokiam dan holouw, barang-barang ini menjataken terang siapa jang poenja.
Dengen tida banjak soesa anak prampoeannja Kiong To jang djadi istrinja ini iman kaparat poen didapetken salagi menangis, maka ia poen lantas di-iket.
Sat Tauw-to lantas tersedar dan tjoba berontak-rontak, tapi pertjoema sadja. Sasoedanja membri sedikit persen pada itoe pendjaga gredja, ini orang tawanan lantas dibawa balik ka kota dan serahken pada Lie Tjhoen.
Hoen-kang-liong djadi amat girang denger itoe kabar, maka kadoeanja itoe laloe dimasoeki ka dalam pendjara, boeat dikasi hoekoeman bersama-sama Kiong To. Atas pertanjahannja Lie Tjhoen, Gak Ho lantas tjeritaken satoe persatoe bagimana dengen tida disengadja iaorang bisa katemoe ini padri kaparat.
,,Ini semoea ada atas kahendaknja Allah,“ kata Lie Tjhoen: „maka mendadak soedara boleh dapet liat itoe boeroeng dan hendak djepret padanja.“
Kamoedian Hoen-kang-liong kasi taoe pada Kokbo, jang sadari wates ini hari troesa koeatir apa-apa lagi, sebab salaennja Kiong To, Sat Tauw-to poen jang djadi andelannja itoe penghianat, soeda dapet ditangkep.
Kokbo hatoerken banjak trima kasi, jang katanja: ini semoea ada Lie Tjhoen dengen soedara-soedaranja poenja pahala. Kamoedian dibitjaraken pengoeboerannja Ma Kok-tjoe, Lie Tjhoen kata: sekarang keamanan soeda baek kombali, maka pengoeboeran itoe boleh ditetepken harinja, dengen pake oepatjara radja-radja.
„Ini semoea kami serahken pada Taytjiangkoen poenja oeroesan,“ begitoe Kokbo toeloep bitjaranja: „apa jang mendjadi Taytjiangkoen poenja kahendak, ada mendjadi djoega kahendak kami, maka boleh dilakoeken maski djoega zonder perkenannja kami.”
Lie Tjhoen hatoerken trima kasi atas itoe kakoeasahan besar jang iboesoeri, briken padanja.
Sigra djoega diberdiriken satoe panggoeng boeat sembajang Tjokongtek, saban hari dibikin sembajangan boeat mintaken soepaja rohnja Koktjoe dan Sitjoe dapet tempat jang santausa dalem sorga. Ini sembajangan ada pake doeapoeloe delapan Tosoe jang dikapalaken oleh Kong-soen Sin.
Koetika pagi-pagi dari harian mengoeboer, di lapangan ada penoeh dengen anak negri jang menonton dan semoea pada memake pakean poeti. Peti dinasatnja Koktjoe ada dirias bagoes, mengadepi medja sembajang jang samsengnja ada berdiri di kiri kanan. Di kanan ada berdiri Sat Tauw-to, di kiri berdiri Kiongto, masing-masing pake tjelana dan badjoe poeti, tangannja diborgol ka blakang, sedeng familie dan orang-orang jang berfihak padanja, dibarisken kiri kanan sambil berloetoet.
Kokbo bersama Kiongtjoe dan Hoema lantas sembajang, kamoedian baroe mantri-mantri dari Siamlo dan Lie Tjhoen dengen sadereknja, rahajat negri djoega toeroet pasang hio, hingga dari pagi sampe matahari naek tinggi baroe abisan.
Algodjo lantas potong kapalanja Kiong To dan Sat Tauw-to, ditaro di atas piring sabagi samseng, isi peroetnja poen dikaloearken, dan sembari taro itoe, Hoa Hong-tjoen berkata dengen soeara njaring di hadepan itoe medja sembajang, jang maksoednja membri taoe pada rohnja Koktjoe dan Sitjoe, soepaja ditrima ini barang-barang hidangan jang dihadiaken.
Satoe persatoe persakitan lantas dipotong, tapi waktoe algodjo maoe tabas lehernja itoe prampoean moeda jang djadi istrinja Sat Tauw-to, Houw-jan Giok laloe menjega.
Banjak orang djadi heran dan Lie Tjhoen laloe menanja: apa maksoednja Kiong To poenja anak dimintaken ampoen.
Hauw-jak Giok tida bitjara banjak, hanja bilang sadja: jang prampoean ini satoe tempo ada bergoena, maka harep biar ditaro doeloe dalem pendjara, djangan diboenoe. Menginget jang itoe anak prampoean tida ada berbahaja boeat dikasi tinggal idoep, maka Lie Tjhoen tida ada kaberatan boeat kasi Kiong Siotjia tinggal idoep lagi sakean lama.
Kamoedian terdenger soearanja meriam tiga kali, dimana peti dinasat lantas diangkat dan dikoeboer di goenoeng Ban sioe-san; sampe sore baroelah orang-orang jang menganter poelang kombali ka dalem kota.
Selang tiga hari Kokbo boeka perhimpoenan, dengen dihadlirken oleh sakalian mantri-mantrinja, antara mana Lie Tjhoen poen ada toeroet.
Dalem ini permoesjawaratan ada dibitjaraken oeroesan negri, dimana dengen sedi Kokbo toetoerken, bagimana dengen tida beroentoeng Ma Kok-tjoe jang soeda trima warisan dari laloehoer boeat teroesken ini oesaha, djadi binasa begitoe roepa. Sekarang toeroenan Ma soeda abis dan tida taoe pada siapa ini karadjahan haroes ditoeroenken.
Atas voorstelnja mantri-mantri, maka apa tida baek kaloe Hoema dinobatken djadi radja aken pegang pamerentahan di Siamlo.
Sabelonnja Kokbo njataken satoedjoe atawa tida, Hoa Hong-tjoen lantas berloetoet aken menampik; ia kata dirinja salaen ada terlaloe moeda, djoega tida mempoenjai kapandean. Di sini ia toetoerken bagimana pengidoepannja jang tjilaka, hingga saroema tangga masoek ka dalem boei, beroentoeng ada Gak Ho jang membri toeloengan sampe tinggal sama Lie Tjhoen; kamoedian toeroet berangkat ka Kimgo dan achirnja dalem satoe paperangan pada Siamlo, ia bertemoe djodo di ini negri.
Tentang kabintjanaän jang menimpa pada ini negri poen, kaloe boekannja Lie Tjhoen jang dateng menoeloeng, belon taoe apa djadinja. Lebi djaoe Hoe na tjeritaken djoega, kaloe dalem waktoe jang blakangan Siamlo djadi terindah dan dipandang oleh laen-laen poelo taloekan, itoelah semoea ada menjender pada Hoen-kang-liong poenja keangkeran. Kaloe menoeroet pikirannja, orang jang bisa pegang pamerentahan boekan laen dari Lie Tjhoen sendiri, jang pasti nanti bikin Siamlo djadi lebi mahmoer dan familienja Ma Kok-tjoe bisalah pelihara Sintjinja itoe radja almarhoem dan sataon tiga kali bisa disembajangi dengen sapantesnja.
Begitoelah ia poenja pikiran, belon taoe bagimana iboesoeri poenja pendapetan, satoedjoe atawa tida.
Laen-laen mantri banjak jang satoedjoe dengen ini pikiran. Marika bilang: Lie Tjhoen ada pantes boeat doedoek mamerenta di Siamlo, kerna Hoen-kang-liong boekan sadja ada gaga dan pinter, tapi djoega adil dan bahaja besar jang mengantjem Siamlo, soeda djadi terindar oleh kerna kagagahannja.
Mendenger jang semoea orang poedjiken dirinja, Lie Tjhoen djadi kaget dan boeroe-boeroe menjega sambil berkata:
„Oh, tida! tida! itoelah tida baek sekali!
„Dirikoe ini tida lebi dari saorang biasa toekang penangkep ikan di soengei Sim-yang. jang kamoedian ikoet Song Kong beng naek di Liang-san dan sampe trima oendangan dari Keizer Tay Song, tapi sebab taoe diri sendiri tida mempoenjai kapandean, maka tida lama kamoedian letaken djabatan bersemboeni di Tay ouw.
„Dalem samantara itoe, dengen mengikoeti perobahannja alam bersama-sama sakalian Hengte laloe menjebrang laoetan dan pindjem Kimgo boeat tempat menoempang, boeat rasaken sedikit kasenangan, dan itoelah olehkoe dirasa soeda tjoekoep.
„Samantara boeat mengoeroes pamerentahan di Siamlo, ada Tjiongwie poenja kawadjiban jang bila dioeroes dengen djoedjoer dan satia, tida boleh tida kamadjoeannja ini poelo aken djadi bertamba.
„Dirikoe jang tida berdjasa, manatah boleh trima tjap karadjahan? Tidakah itoe boleh djadi boea toetoer dan seboetan orang tida abisnja? Kaloe sampe Hoema sendiri tetep menoelak dan tida maoe trima itoe keangkatan, haroeslah dipili di antara Tjiongwi jang ada di sini, siapa di antaranja jang paling djoedjoer dan mempoenjai kapandean tinggi, padanja itoelah jang haroes diserahken itoe kadoedoekan, sedeng kita berame bersama sakalian Hengte, nanti merasa senang dapet menoempang di Kimgo,“
Sahabis oetjapken itoe perkatahan, Lie Tjhoen moendoer ka tempatnja; dari roepanja itoe, njatalah ia boekan saorang jang temaha pada kabesaran dan kamoeliahan, maka ini kadoedoekan tinggi jang orang hendak briken padanja ia tampik beroelang-oelang dengen merendaken diri.
Kokbo jang liat begitoe djadi katarik hati dan berkata:
„Oh, Taytjiangkoen, djanganlah kaoe merendaken diri sampe begitoe. Apa jang dibilang oleh semoea mantri-mantri, itoelah ada dengen beralesan. Djika boekannja Tjiangkoen, siapatah lagi jang brani trima ini kadoedoekan? Bener ada Hoema, tapi Hoema masi terlaloe moeda dan djoega tida brani trima ini tjap karadjahan.”
Laen-laen mantri benerken perkatahannja Kokbo, Hoa Hong-tjoen djoega memaksa, tapi Lie Tjhoen tetep menoelak, dengen bilang: tida mempoenjai itoe pahala boeat doedoek sabagi radja di ini negri.
Satelah semoea orang njataken Lie Tjhoen djoega moesti trima itoe kadoedoekkan, tapi masi djoega ditoelak, Jan Tjeng laloe madjoe ka depan sam- bil berkata:
„Sasoenggoe Kokbo, Hoema dan sakalian mantri-mantri poenja pikiran ada bener sekali, bahoewa tida ada orang jang bisa trima ini kadoedoekan salaen dari pada Lie Twako, jang soeda bikin santausa lagi ini poelo. Maka Twako, djanganlah ilangken Kokbo dan orang banjak poenja pengharepan. Sebab kaloe Twako sendiri tida brani trima, siapatah lagi jang brani doedoek di korsi karadjahan?"
Kokbo benerken bitjaranja Jan Tjeng, jang disamboet oleh orang banjak boeat Lie Tjhoen poenja keangkatan. ―— Lebi djaoe iboesoeri berkata:
„Ini semoea ada dengen kahendaknja Allah, maka semoea pilihan ada satoedjoe pada Taytjiangkoen saorang, sekarang djanganlah menampik lagi, sedeng kami dengen anak mantoe dan familie, harep dapet menoempang di bawah Taytjiangkoen poenja perlindoengan.”
Lie Tjhoen tida bisa membantah, maka dengen hormat ia berkata:
„Menerima Kokbo poenja pembrian dan Tjiongwi poenja desekan, Lie Tjhoen jang renda tida brani membanta poela. Tapi maski sekarang soeda trima ini tanggoengan berat, toch kapandeankoe tida tjoekoep boeat berkoeasa sendiri, maka dalem ini harep dapet Tjiongwi poenja bantoean dan masing-masing soeka ambil taoe sagenepnja tenaga, jang boeat sasoeatoe oeroesan harep soeka minta djoega perkenannja Kokbo.”
„Ah, itoelah tida bisa djadi!²’ treak Jan Tjeng: „kerna negri oemoemnja tjoema mempoenjai satoe djoengdjoengan, dan pamerentahan tjoema dikendaliken oleh satoe orang, baroelah ada oedjoednja negri teroes ka roema tangga. ―― Liat sadja bagimana keadahan Liangsan doeloe hari, waktoe Tiauw Thian Ong binasa Song Kong-beng diangkat djadi Tjoeswe, sagala titah dan oeroesan ada dipegang olehnja sendiri, sedeng oeroesan-oeroesan di pasanggrahan ada diatoer begitoe roepa. Sekarang Siamlo poenja oeroesan pamerentahan atawa keadahan-keadahan jang penting dengen rahajat, apa boleh diatoer seperti sapoeloe domba dioeroes oleh sembilan gombala? Kaloe terdjadi demikian, pastilah sagala apa nanti mendjadi kaloet. Nah begitoe djoega kaloe mengadep di kere menantiken perkenan, itoelah ada berarti tida merdika. Djika radja tida laloewasa dalem sagala oeroesan dan gerakan, mana sanggoep mengoeroes sagala mantri dan orang-orang sabawahannja?”
„Tjoba liat,” begitoe Jan Tjeng teroesken bitjaranja: „bagimana Lu Thay-houw dan Boe Tjek-tian, jang di ini djaman tjoema djadi sadja boea toetoernja orang banjak. Pendeknja Taytjiangkoen belon pernah djadi rahajat atawa mantri dari ini negri, maka tida boleh dibilang ada kaoeroek boedinja negri, hingga tida oesah terlaloe merenda atawa maloe-maloe hati, apapoela doenia boekannja saorang jang poenja. ―― Doeloe poen pada djamannja Giauw dan Soen, tida warisken poesaken itoe pada poetra, hanja pada orang bidjaksana jang bisa mengadaken katentreman di ampat pendjoeroe doenia.”
Nah kaloe begitoe,“ kata Lie Tjhoen kamoedian: „biarlali kita orang atoer sadja menoeroet sabagimana tjaranja pamerenta Tay Song, dari negri mana kita ada berasal. Sedeng kita-orang bersama sakalian Hengte biar tinggal tetep menjeboet soedara" sabagimana pada waktoe masi ada di Liangsan; sedeng Kokbo dan Kiongtjoe, Hoema dengen kadoea Kiongdjin biar tinggal tetep dalem kraton, samantara kita jang tida membawa familie biar tinggal sadja doeloe di Gwan-swe Hoe.“
Semoea mantri dari karadjahan Siamlo, maoe. poen soedara soedaranja Hoen-kang-liong, satelah denger begitoe, mendjadi girang.
Begitoelah orang lantas pili hari jang baek boeat angkat Lie Tjhoen doedoek di atas tachta karadjahan Siamlo, boeat bikin tetep pamerentahan sakiternja poelo-poelo di sitoe.
Kamoedian masing-masing pada boebar dari itoe persidangan.