TJOE BO KIM SO
1165
itoe waktoe soeda djaoeh malem, kadoewa ia mendapet loeka jang tida enteng, tetapi moesti berdjalan begitoe djaoeh, maka ia liwatin Song-sie-kee dan sampe di Thung-kee-lang, perloe memake tempo doewa djam lebih. Tatkala ia maoe berlompat ka atas genteng, sabagimana pada waktoe ia brangkat dari roemah, ternjata ia soeda tida ada itoe kamampoean lagi, terpaksa ia mengetok pintoe dengen goenaken pedangnja.
Kim Ong sedari madjikan prampoewannja brangkat pergi, tida berbeda seperti ajam jang maoe bertelor, masoek sala, kaloewar tida bener, doedoek tida enak djalan poen tida karoewan rasanja. Beroelang-oelang ia melongok ka roemah blakang, maoe liat apa sang madjikan prampoewan soeda balik poelang atawa belon. Tengah malem soeda liwat, tetapi sang madjikan prampoewan masi belon djoega balik poelang; beroentoeng Siao Tiap tidoer dengen njenjak, tida mendoesin mentjari iboenja. Tinggal Kim Ong berdoewa sama baboe, iaorang bingoeng dan goegoep tida taoe apa jang moesti diperboewat, sedeng itoe baboe lantaran anggep madjikan prampoewan pergi mentjari moesoeh jang binasaken madjikan lelakinja, banjakan tjilakanja dari pada selamatnja, maka teroes meneroes ia koetjoerken aer mata terlebih lagi pada sasoedanja liwat tengah malem, sang madjikan prampoewan masi belon kaliatan poelang djoega. Itoe baboe bernjali ketjil, roemah begitoe besar, itoe waktoe tjoema tinggal ia bersama Siao Tiap jang soeda tidoer, sang madjikan prampoewan tida ada, sedeng Kim Ong berdiam di loewar, tambahan di pertengahan roemah ada dikoeboer maitnja sang madjikan lelaki, iapoenja pengrasahan takoet djadi bertambah, maka pada waktoe Kim Ong masoek ia tida kasiken itoe boedjang toewa jang setia pergi kaloewar lagi. Satelah berselang sakoetika