184
harep biar tjari lain toenangan, sebab Wan Gwee rasa jang dia poenja anak laki Sim Siang Khing tida ada oentoeng soedah meninggal doenia.
Kemoedian Tio Ing Lim menjahoet: Dari itoe perkara goegoerin kawin saija tida bisa toeroet, sebab moelain doeloe sampe sekarang toeroenan orang Seh Tio, belon ada prampoean jang kawin doea kali, kaloe kawin sekali laki mati dan tinggal djanda selamanja, tetapi Tio Ing Lin berempoek pada dia poenja bini dan tepaksa djoega dia toeroetin Sim Wan Gwee poenja maoe, lantas dia kombali-in oewang lamar dengan King Tiap (soerat jang tertoelis hari klahirannja Sim Siang Khing) djoega.
Satelah Pian Boen Ké poelang dan Hoa Ting San soeroean orang dateng di roema Tio Ing Lim, dengan bawa soerat jang mana tertoelis kaloe Tio Ing Lim soeka hati, di harep akan dateng di roemanja.
Tio Ing Lim lantas berangkat serenta sampe di roemanja Hoa Ting San, lantas dia tersamboet. dengan girang hati, lantas bersama doedoek pada Hoa Ting San, beromong-omong, tida antara lama lantas pada minoem arak, serenta minoem sampe 3 rambahan, Tio Ing Lim lantas menanja: Lao Pék panggil saija, ada pesenan apa?
