LIAUW TJAY.
85
Ong Tjoo Hok, kenapa ini hari Ong Tjoe Hok bawa poelang satoe tjoetjoe prampoean. Sasoedahnja Gouw Sie habis berpikir lantas ia menanja sama itoe anak prampoean: Kaoe siapa poenja anak?
Eng Leng berkata: Itoe waktoe saja di boentingin sama saja poenja iboe apa Ie soedah loepa?
Lantas Gouw Sie berkata: Betoel kami poenja intji Tjin Sie, tapi soedah lama dia mati, kenapa ini hari masi ada dia poenja anak barangkali boleh djadi djoega, sekarang kaoe boleh masoek di dalem ini roemah.
Sasoedahnja Eng Leng masoek, lantas Gouw Sie menanja sama Gouw Seng: Barangkali itoe anak prampoean tjoetjoe boleh dapet tahoe.
Lantas Gouw Seng berkata: Ko Tjin Sie soedah meninggal doenia sedari itoe Kothio tinggal sendiri di dalem roemahnja, tetapi di belakangkali Kothio dapet di ganggoe sama siloeman rase, itoe siloeman rase saban hari bikin plesiran sama Kothio sampe Kothio dapet sakiet losoen mendjadi mati, itoe siloeman rase beranak sa anak prampoean di kasi nama Eng Leng tinggal di dalem itoe roemah, di belakang hari tetangga-tetangga dan sanak koelawarga lihat Kothio soedah mati lantaran di goda sama itoe siloeman rase, mintain hoe sama Thio Tian Soe, begitoe djoega itoe Thio Tian Soe kasi hoe boeat tempel di dalam itoe roemah, tempo itoe hoe soedah ditempel di dalem itoe roemah, maka itoe siloeman rase tiada boleh tahan lantas lari bawa dia poenja anak prampoean, djadi di dalem itoe roemah tjoemah kedengaran soewaranja Eng Leng tertawa. Lagi saja tiada tahoe apa dia ataoe boekan itoe anak prampoean.
Lantas Gouw Sie berkata : Itoe anak prampoean masa dia bisa hidoep koembali.
Gouw Seng berkata : Djikaloe Ko kata begitoe, nanti saja minta boeat ketemoe sendiri sama itoe anak prampoean. Sasoedahnja Gouw Seng kata begitoe, lantas Gouw Sie masoek ka dalem roemahnja prenta itoe anak prampoean soeroe kloear, serta itoe anak prampoean soedah kloear, Gouw Seng lihat dia poenja roman tertawa sadja, djadi Gouw Seng tiada bisa kenalin betoel, melainkan Gouw Song tinggal tarik napas sadja. lantas Gouw Sie tjoeriga jang itoe anak prampoean boekannja manoesia, sebab dia djadi orang tiada ada dia poenja sedi, djadi Gouw Sie apa boleh boeat tinggal diam sadja tiada bisa bitjara satoe apa.
Kemoedian pada satoe hari Gouw Sio lantas bikin pesta mengawinken dia poenja anak Ong Tjoe Hok, tempo Gouw Sie bikin pesta kawin itoe ia poen masi tjoeriga jang itoe anak prampoean boekannja manoesia. Dan orang-orang kamjweng sitoe banjak jang dateng menonton penganten baroe, maka marika itoe lihat jang itoe penganten prampoean tertawa tiada bisa soedah, sehingga Gouw Sie mendjadi mara sama itoe anak prampoean (si penganten) dan Gouw Sie soeroe boedaknja kasi tahoe sama itoe anak prampoean djangan dia tertawa sadja.
