72
LIAUW TJAY.
doenia soedah di pastiken sama Toehan Allah dari masing-masing manoesia poenja peroentoengan, di mana manoesia boleh roba lagi prentahnja Toehan Allah, apa lagi Tjoe Siang Kong saorang jang pinter serta mengarti segala soerat, mati dan hidoep djoega satoe djalanan, apa hidoep di doenia mistinja mendjadi soeka hati, sasoedahnja mati ada di achirat mendjadi soesah bati, lain perkara saja boleh toeloeng, ini perkara mati dan hidoep saja tiada boleh toeloeng, sebab toelisan dari Toehan Allah jang bikin tetap itoe prentah, djoega Tjoe Siang Kong djangan mendjadi goesar hati. Sasoedahnja Liok Kwan Koea habis bitjara, lantas ia balik poelang di geredja Sip Ong Tian.
Tjerita Tjoe Djie Tan sasoedahnja ia dapet tahoe dari dia poenja hari mati, maka ia lantas bikin sedia peti mati dan pakean mati, setelah sedia itoe barang-barang lantas Tjoe Djie Tan berpake-pakean itoe dan ia lantas masoek di dalem dia poenja kamar di sitoe ia mendjadi mati,
Tempo istrinja lihat jang ianja (Tjoe Djie Tan) soedah mati, hingga ia djadi menangis dengan amat sedinja dan sekoetika itoe djoega ia angkat maitnja Tjoe Djie Tan di masoeken di dalem peti mati, samantara itoe Tjoe Djie Tan poenja setan dari loewar masoek ka dalem roemahnja dan tatkala istrinja lihat djadi ketakoetan, begitoe djoega Tjoe Djie Tan poenja setan berkata sama istrinja: Betoel saja soedah mendjadi setan tiada beda seperti manoesia, traoesa nona boeat takoet sama saja, sebab saja inget nona soedah djadi djanda djaga anak terlaloe soesah maka seringkali saja nanti dateng tengokin.
Lantas istrinja berkata: Djikaloe Siang Kong poenja aloes masi ada kenapa tiada maoe masoek djadi manoesia lagi.
Lantas Tjoe Djie Tan berkata: Toelisan dari Toehan Allah tiada boleh di robah lagi, kaloe mistinja toelisan mati di mana boleh hidoep koembali.
Lantas istrinja menanja:Sekarang Siang Kong ada di acherat pegang pekerdjahan apa?
Tjoe Djie Tan berkata: Melekat Liok Kwan Koea kasi saja pekerdjahan djadi pembesar di achirat djoega saja tiada soesah bekerdja tinggal senang di dalem tempatnja Sip Ong Tian. Sasoedahnja Tjoe Djie Tan poenja aloes habis bitjara, lantas ia poelang di geredja Sip Ong Tian.
Tjerita Tjoe Djie Tan poenja anak lelaki baroe beroemoer lima tahon, nama Tjoe Hoei, kemoedian Tjoe Hoei soedah beroemoer lima blas tahon ia masoek di eksaman di mana ia lantas dapet pangkat Tjin Soe, sampe Tjoe Hoei beroemoer doea poeloe lima tahon Keiser kasi pangkat padanja djadi Taij Hoa Keng, itoe waktoe Tjoe Hoei kasi tahoe sama dia poenja iboe, jang ianja soedah begitoe besar ia belon tahoe ketemoe sama dia poenja bapa satoe kali.
Lantas iboenja berkata: Djikaloe maoe tahoe anak poenja orang toewa, anak boleh pergi sembahjang maka anak boleh dapet ketemoe sama anak poenja bapa.
