LIAUW TJAY.
69
Tjoe Djie Tan poenja istri, sasoedah selesih pekerdjahan itoe lantas Liok Kwan Koea boengkoes koembali kepala istrinja Tjoe Djie Tan setelah itoe Liok Kwan Koea lantas djalan kloear bersama-sama Tjoe Djie Tan, sasoedahnja sampe di loear roemahnja Tjoe Djie Tan, Liok Kwan Kosa berdjalan poelang sendiri ka geredja Sip Ong Tian.
Tjerita besok paginja tempo istrinja Tjoe Djie Tan mendoesin ia merasa leernja gatel, maka ia lantas prenta dia poenja boedak prampoean soeroe ambil ajer panas, sasoedahnja itoe boedak ambil ajer panas, lantas istrinja Tjoe Djie Tan tjoetji moeka sahabisnja ia tjoetji moeka lantas di ambilnja katja dan ia katjain moekanja maka di lihatnja ia poenja moeka terlaloe amat tjakap, tetapi ia tiada tahoe apa djadinja.
Samantara itoe ia lantas masoek kasi tahoe pada soewaminja, tatkala Tjoe Djie Tan lihat tampang moeka istrinja itoe tjoemah dia djadi tertawa sadja, tetapi ia tiada boeka itoe resia maski dia dapet lihat di mana leher istrinja ada bekas tanda mera.
Adalah di tjeritaken poela, bahoea itoe kepala prampoean tjakap jang di toekar sama kepalanja Tjoe Djie Tan poenja istri ia itoe kepalanja saorang prampoean atsal anak Gouw Sie Gie jang belon kawin dia soedah mati dia itoe baroe beroemoer sembilan blas tahon, tempo dia mati belon di kiasin dari dia poenja kedosahan itoe anak prampoean mati lantaran di boenoeh oleh pendjahat kepala brandal, adapoen kedjadian pemboenoehan itoe moelanja begini, pada waktoe boelan tahon baroe Gouw Sie Gie pergi djalan-djalan melantjong di dalem geredja Sip Ong Tian, tempo Gouw Sie Gie melantjong tiada ada poenja temen, lantas ada satoe orang kepala brandal dapet lihat di roemahnja Gouw Sie Gie ada satoe anak prampoean terlaloe amat elok parasnja ia itoe anak dari Gouw Sie Gie, maka itoe kepala brandal mendjadi soeka sama anaknja Gouw Sie Gie. Maka di waktoe malem itoe kepala brandal pasang tangga naik di atas genteng roemahnja Gouw Sie Gie, serta itoe kepala brandal toeroen ka kamar troes ia boenoeh saorang boedak prampoean jang djaga pintoe kamar itoe hingga mendjadi mati, sasoedahnja itoe kepala brandal lantas masoek di dalem kamarnja Gouw Sie Gie poenja anak prampoean, itoe waktoe lantas itoe kepala brandal maoe bikin pekerdjahan resia sama itoe anak prampoean jang ada di dalem itoe kamar, serta itoe anak prampoean tiada maoe toeroet kemaoeannja itoe kepala brandal, begitoe djoega itoe kepala brandal mendjadi timboel maranja dan boenoeh mati itoe anak prampoean, sasoedahnja itoe kepala brandal lari kloear koembali meninggalken mait itoe.
Tempo Gouw Hoe Djin istrinja Gouw Sie Gie dapet dengar ada soeara begitoe riboet, sigra djoega ia lantas panggil dia poenja boedak prampoean sampe bebrapa kali tetapi itoe boedak tiada menjahoet, maka Gouw Hoe Djin lantas pergi di kamar anak prampoeannja, serta ia sampe di depan pintoe kamar di lihatnja itoe boedak prampoean soedah mati di boenoeh orang hingga Gouw Hoe Djin mendjadi kaget, dan ia troes masoek di dalem kamar maka di
