LIAUW TJAY.
67
pil sian tan soepaja Tjoe Siang Kong boleh simpen itoe pil Sa- soedahnja itoe melekat Liok Kwan Koea habis bitjara, lantas ia bangoene dari krosi kloear dari itoe kamar berdjalan poelang ka geredja Sip Ong Tian. Itoe waktoe soedah siang maka Tjoe Djie Tan bangoen dari randjangnja, serta ia lihat di badannja tiada ada satoe apa, dan lantas ia poenja pikiran bertambah lebi madjoe. Telah liwat bebrapa hari, itoe Tjoe Djie Tan dateng di geredja Sip Ong Tian di mana ia lantas toelis sekeping soerat boeat kasi suma melekat Liok Kwau Koea, sasoedahnja Tjoe Djie Tan toelis itoe soerat, ia lantas taroh di depan gambarnja Liok Kwan Koea, dan Tjoe Djie Tan lantas balik poelang ka roemahnja.
Kemoedian pada malemnja Liok Kwan Koea dateng lagi di roemahnja Tjoe Djie Tan, serta Liok Kwan Koea ketemoe sama Tjoenali Djie Tan, lantas Liok Kwan Koea berkata: Sekarang Tjoe Siang Kong poenja peladjaran sampe tamat boleh terpake, akan tetapi Tjoe Siang Kong poenja djaja redjeki ada tipis tiada bisa djadi orang berpangkat besar, tjoemah bisa dapet pegang pangkat ketjil sadja.
Lantas Tjoe Djie Tan menanja: Kapan jang saja poenja peroentoengan boleh dapet itoe pangkat?
Lantas melekat Liok Kwan Koea berkata: Ini tahon di boelan Pee Gwee, waktoe maoe bikin eksamen di sitoe Tjoe Siang Kong boleh pergi eksamen tentoe boleh dapet pangkat eksamen djadi Kaij Goan. Sasoedahnja melekat Liok Kwan Koea habis bitjara, lantas ia balik koembali poelang di tempat geredja Sip Ong Tian.
Pada besok paginja Tjoe Djie Tan ketemoe sama dia poenja sobat-sobat, serta marika itoe lihat Tjoe Djie Tan poenja kepinteran, masing-masing mendjadi heran lantas marika itoe menanja pada Tjoe Djie Tan: Begimana ini hari sobat poenja kepinteran bisa meliwatin dari lain orang? Ada apa sobat poenja peladjaran jang baek?
Lantas Tjoe Djie Tan berkata: Saja ada ambil sobat sama melekat Liok Kwan Koea.
Serta sobat-sobatnja Tjoe Djie Tan dengar Tjoe Djie Tan kata begitoe, lantas marika itoe berkata: Saja djoega maoe ambil sobat sama itoe melekat Liok Kwan Koea.
Lantas Tjoe Djie Tan berkata: Djikaloe sobat maoe ambil sobat sama itoe Liok Kwan Koea, nanti saja kasi tahoe lebi doeloe sama itoe melekat Liok Kwan Koea. Sasoedahnja Tjoe Djie Tan habis bitjara lantas ia berangkat pergi di geredja Sip Ong Tian di sitoe ia toelis sekeping soerat jang mana ia lantas taroh soerat itoe di depan gambarnja melekat Liok Kwan Koea, sasoedahnja lantas Tjoe Djie Tan berdjalan poelang ka roemahnja.
Kemoedian di waktoe malemnja itoe melekat Liok Kwan Koea dateng di roemahnja Tjoe Djie Tan di mana ia lantas ketemoe pada Tjoe Djie Tan itoe, maka Tjoe Djie Tan kasi tahoe pada melekat Liok Kwan Koea satoe persatoe dan hal jang ia poenja sobat-sobat hendak bersobat pada Liok Kwan Koea itoe. Sasoedahnja Liok
