LIAUW TJAY.
59
Kebetoelan itoe sore itoe anak pergi semboeni di kebonnja Ho Wan Gwee, waktoe boelan maoe moelain terang, itoe anak dapet dengar ada soewaranja orang lagi bitjara, lantas itoe anak lihat ada doea orang lelaki lagi doedoek minoem, jang satoe bitjara besok pagi saja maoe pergi mentjoeri arak, dan jang saorang tinggal tidoer di atas batoe. Adapoen itoe doea orang poenja kaki dan tangan seperti manoesia akan tetapi di mana belakanguja berboentoet, sasoedahnja itoe anak lihat itoe doea siloeman rase, lantas ia poelang kasi taoe sama dia poenja orang toewa Khe Hang, lantas Khe Hang menanja. padanja: Semalem angkau menginep di mana?
Lantas itoe anak berkata: Saja menginep di roemahnja Ho Wan Gwee. Sekarang saja maoe ikoet tia-tia pergi berdagang.
Tempo itoe malem saja dengar itoe siloeman rase bitjara dia maoe pergi tjolong arak di roemah inkoe, nanti saja tinggal di roemahnja inkoe dan saja maoe minta soepaja inkoe temenin iboe poenja sakit. Inkoe memang soeka pergi memboeroe di hoetan, nanti saja maoe minta obat sama inkoe, akan keniaja itoe doea siloeman rase.
Serta Khe Hang dengar dia poenja anak kata begitoe, lantas ia adjak bersama-sama pergi berdagang di pasar. Serta itoe anak sampe di roemah inkoenja lantas ia masoek ka dalem itoe roemah, kasi tahoe sama dia poenja inkim dari itoe perkara satoe persatoe, tempo inkimnja dapet tahoe, begitoe djoega ia sedia ratjoen dan kasi sama itoe anak, sasoedalınja itoe anak trima itoe ratjoen, lantas ia masoekan di dalem tempajan arak.
Kebetoelan itoe malem kedatengan itoe siloeman tjolong itoe arak dan lantas ia ambil itoe arak akan bawa poelang ka goanja. Tempo itoe siloeman djalan baroe sampe di pasar, ia ketemoe sama itoe anak jang lantas belaga tanja sama itoe siloeman, katanja: Empe dari mana ini?
Tempo itoe siloeman lihat itoe anak, ia poen mendjadi kaget lantas ia menanja: Angkaoe anak di mana, siapa poenja anak, orang she apa Lantas itoe anak berkata saja orang she Ouw, sering kali saja lihat empe doea orang ada di kebon Ho Wan Gwee, kenapa empe boleh loepa sama saja, djikaloe empe tjemboeroean bati sama saja, saja djoega ada boentoet.
Lantas itoe empe lihat itoe anak betoel dia ada poenja boentoet, boekannja manoesia, tiada tahoe itoe boentoet palsoe. Lantas itoe siloeman berkata: Empe ada doea soedara, empe sendiri soeka sama istrinja orang she Ong dan empe poenja ade soeka istrinja orang she Khe, tetapi itoe anaknja orang she Khe terlaloe djahat dan dia soedah bikin poetoes empe poenja soedara poenja boentoet. Di dalem sepoeloe hari ini empe maoe pergi lagi akan membales sama itoe anak poenja kedjahatan.
Lantas itoe anak berkata: Saja ada sedikit doeit empe boleh beli makanan di dalem ini pasar, nanti kaloe saja ada tempo saja. dateng di roemah empe bersama-sama plesir Sasoedahnja itoe siloeman trima itoe doeit membri trima kasi pada itoe anak lantas ia berangkat djalan pergi di kebon kembangnja Ho Wan Gwee.
