Liauw Tjay.
165
djikaloe Pwe Sip soeka makan smeernja anak negri, tentoe Pwe Sip banjak mempoenjai harta banda sedari Pwe Sip mendjabat pangkat Tie Kwan sampe ia mendjabat pangkat Tie Hoe djoega Pwe Sip tiada ada poenja kekajaän, melainkan ia hidoep dengan gadjinja sadja jang di bajar oleh negri jang mana ia boeat piara anak bininja dengan setjoekoepnja. Sahabis itoe mantri bitjara, lantas ada lain mantri jang bentji sama Pwe Sip, menghadep bitjara pada Srie Baginda Keiser: Dari ini perkara misti Srie Baginda menitahken akan panggil Pwe Sip dateng di astana, soepaja mantri Hoat Soe boleh preksa Pwe Sip poenja perkara itoe. Djikaloe Pwe Sip tiada makan smeernja anak negri, mengapa ia brani lepas itoe orang jang berdosa dari dalem pemboeian? Hingga marika itoe bikin roesoeh di dalem kota, tentoe Pwe Sip soedah makan smeernja anak negri, dari itoe Srie Baginda misti panggil Pwe Sip poelang akan preksa dia poenja perkara lebi doeloe. Serta Srie Baginda Keiser Song Tjin Tjong dengar itoe mantri poenja perkataän, lantas Srie Baginda menitahken saorang mantri akan pergi panggil Pwe Sip, serta itoe mantri trima prentah dengan membawa sepoetjoek soerat dari Baginda Keiser, ia poen lantas berangkat pergi di roemahnja Pwe Sip.
Adalah di tjeritaken poela Pwe Sip lagi doedoek di dalem kantornja, serta ia dapet soeratnja Baginda Keiser, lantas ia prentah Lan Soen akan bikin betoel peti pakean dan lain-lain barang, sasoedahnja Lan Soen trima prentah maka sekoetika itoe djoega ia bikin betoel itoe peti pakean.
Maka sekoetika itoe djoega itoe mantri prentah Pwe Sip dan Lan Soen pergi di kota radja (Tong King), sasoedahnja Pwe Sip berangkat pergi, lantas boedak-boedak nja pada lari di lain tempat akan mentjari penghidoepannja.
Tempo Pwe Sip dateng di astananja Srie Baginda Keiser Song Tjin Tjong, begitoe djoega Baginda Keiser prentah mantrinja soeroe bawa Pwe Sip pergi di kantornja Taij Lie Sie, serta Pwe Sip sampe di kantor Taij Lie Sie lantas mantri Hoat Soe preksa perkaranja Pwe Sip, akan tetapi belon bisa dapet ketrangan jang betoel, maka Pwe Sip di tahan dan di masoeken di dalem pemboeian. Kerna Pwe Sip saorang jang soedah toewa, maka sekean lamanja dia ada di dalem pemboeian ia dapet sakit hingga siang dan malem ia tiada bisa makan.
Kebetoelan itoe satoe hari Lan Soen bawa nasi dan lain-lain makanan dateng di pemboeian, serta Lan Soen sampe di pintoe pemboeian, begitoe djoega Pwe Sip panggil masoek ka dalem pemboeian, apa bila Lan Soen soedah masoek dan ketemoe pada Pwe Sip, lantas Pwe Sip berkata: Ini hari kami tiada dengar anak poenja perkataän, maka dapet ini bahaja ketjilakaän, bisa kesian sama manoesia jang ada di dalem pendjara maoe minta kebaekan, kena manoesia membales djahat pada kami hingga kami di lepas dari djabatan dan perkara misti tinggal tergantoeng, kerna di sangka kami makan anak negri poenja harta banda, maka sekarang ini kami ada di dalem pemboeian
