162
Liauw Tjay.
boeng saja poenja toeroenan, dari itoe saja boeat seselan tiada bisa soedah.
Lantas Ong Hoe Djin berkata : Telah brapa kali saja boedjoek Siang Kong boeat ambil satoe goendik, tetapi Siang Kong tiada maoe dengar saja poenja moeloet. Sekarang Siang Kong tjari anaknja orang jang baek boleh ambil bakal goendik.
Serta Lauw Goan Tjin dengar istrinja poenja perkataan itoe, lantas ia berkata : Hoe Djin traoesa bitjara begitoe, sebab saja poenja oemoer seperti mata hari soedah maoe silem, djikaloe saja masi stengah oemoer patoet djoega ambil goendik boleh mendjadi, djikaloe orang toewa ambil goendik jang moeda kendatinja di kasi harta banda beratoes riboe doedoek senang di dalem roemah, djoega itoe prampoean moeda tiada trima misti tjari laki jang moeda, saja maoe inget senang, djadi sangsara, dari dhoeloe sampe sekarang djoega ada itoe peroentoengan. Djikaloe Toehan Allah maoe bikin habis saja poenja toeroenan orang she Lauw, kendatinja saja ambil seratoes goendik djoega tiada bergoena satoe apa, itoe pribahasaan di doenia orang poenja perkataan maoe piara bini moeda soepaja bisa dapet toeroenan, sebetoelnja itoe orang maoe bikin plesiran sadja di dalem dia poenja hati mentjari enak boekannja mentjari anak, djikaloe perkara anak itoe samoeanja dari Toehan Allah tetapi kita poenja toeroenan boeat samboeng kita poenja nama, tiada boleh manoesia sendiri poenja bisa boeat mentjari, maka saja tiada maoe dengar Hoe Djin poenja perkataan kerna tiada bergoena satoe apa. Sasoedahnja Lauw Goan Tjin habis bitjara lantas ia djalan keloear.
Tempo Ong Hoe Djin lihat soewaminja soedah keloear, begitoe djoega Ong Hoe Djin dapet ingetan boeat soeroeh orang pergi panggil mah tjomblang, apa bila itoe mah tjomblang Sie Po dateng ia lantas menanja pada Ong Hoe Djin, jang mana Ong Hoe Djin lantas kasi tahoe pada Sie Po itoe akan tjari anak orang jang baek boeat goendiknja Lauw Goan Tjin. Maka sekoetika itoe djoega Sie Po lantas keloear pergi tjari anak prawan di dalem kota Lok Jang Kwan. Kebetoelan itoe satoe hari Sie Po dapet satoe anak prampoean jang amat tjakap roepanja di bilangan kota Pok Liang. Sigra djoega Sie Po kasi tahoe pada Ong Hoe Djin: Djikaloe Hoe Djin soeka boleh pergi lihat itoe anak prampoean
Setelah Ong Hoe Djin dengar itoe kabar, ia poen mendjadi soeka hatinja, lantas ia prentah Ong Boen Liong ambil seratoes tail oewang mas soeroe kasi sama Sie Po boeat pergi beli itoe anak prampoean, sasoedahnja Sie Po trima itoe oewang mas seratoes tail lantas ia berangkat pergi di kota Pok Liang.
Sjahadan terseboet tjerita saorang jang berpangkat eksamen Tjin Soe bernama Pwe Sip beroemoer lima poeloe tahon di waktoe ia pegang pangkat Tie Kwan di bilangan Jang Hoe Kwan. Pwe Sip poenja istri bernama The Sie soedah lama meninggal doenia dengan tinggalin satoe anak prampoean bernama Lan Soen jang roepanja terlaloe amat tjakep serta haloes tingka lakoenja.
