Liauw Tjay.
157
Serta Kim Tjin Sian Seng dengar sembari tertawa troes berkata: Djikaloe saja timbang Taij Djin poenja pikiran ada sala, dari doeloe sampe sekarang djikaloe orang berharta oewang tentoe hak orang jang kesasar ketoempangan sama orang, maka itoe orang boleh mendjadi kaja, djikaloe tiada ada hak orang jang kesasar boeat ketoempangan sama itoe orang, kendatinja bisa kaja djoega tiada sebrapa. Sekarang Taj Djin saorang jang berharta oewang di mana Taij Djin boleh tahoe atsal oesoelnja itoe harta, sebab Taij Djin trima harta itoe toeroenan dari orang toewa, banjak sedikit tentoe ada hak orang jang kesasar, djikaloe tiada begimana Taij Djin boleh djadi begini kaja besar. Djikaloe Taij Djin sendiri pegang atoeran dengan adil boeat mentjari di dalem doenia, tentoe Taij Djin tiada bisa berharta banda mendjadi orang kaja, memang dari doeloe sampe sekarang djikaloe orang pegang atoeran jang betoel boeat mentjari ka hidoepannja di doenia, tjoemah sampe boeat piara dia poenja anak bini sadja hidoep senang di dalem doenia, kendatinja Taij Djin sekarang ini pake hati baek dengan berboedi sama anak negri jang dapet soesa, saja slempang djangan tiada bisa teboes perkara jang dhoeloe-dhoeloe poenja kesalaän, melainkan sekarang Taij Djin misti pake hati sendiri poenja peringattan berboedi sama orang jang dapet kesoesaän ataoe jang dapet kemalaratan, apa djoega dhoeloe-dhoeloe anak negri di sitoe poenja oetang sama Taij Djin poenja orang toewa ataoe kaki mojang misti Taj Djin pereksa jang betoel djangan pertjaja dari itoe toelisan sadja jang ada di dalem boekoe, djikaloe Taij Djin bisa pake itoe hati, baroe bisa dapet banjak oentoeng dan tambah oemoer, moedah-moedahan bisa dapet anak laki-laki jang akan samboeng Taij Djin poenja toeroenan.
Apa bila Lauw Goan Tjin dengar Kim Tjin Sian Seng poenja perkataän, ia berpikir dengan tiada bisa soedah dan sekoetika itoe djoega ia lantas keloearin oewang perak sepoeloe tail maoe kasi persent pada Kim Tjin Sian Seng, tetapi Kim Tjin Sian Seng tiada maoe trima, hanja ia lantas membri trima kasi dan troes ia keloear dari itoe roemah bersama-sama Lauw Goan Tjin, setelah sampe di loear roemah itoe Kim Tjin Sian Seng lantas hilang tiada ketahoean kemana perginja. Lantas Lauw Goan Tjin bersama dia poenja boedak berdjalan poelang ka roemahnja. Sasoedahnja Lauw Goan Tjin sampe di roemahnja lantas ia panggil Ong Ben Jong di soeroe bawa keloear boekoe-boekoe orang oetang, sasoedahnja Ong Boen Jong bawa keloear itoe boekoe, lantas Lauw Goan Tjin pereksa satoe persatoe di dalem itoe boekoe sekalian Lauw Goan Tjin soeroe panggil orang kampoeng jang ada beroetang padanja, setelah itoe orang kampoeng samoeanja soedah datang, maka Lauw Goan Tjin lantas tanja satoe persatoe dari masing-masing orang itoe poenja oetang sampe trang, maka ada lah jang masi bisa bajar dan ada djoega jang tiada bisa bajar, djikaloe jang masi bisa bajar di dalem seratoes di soeroe bajar doea poeloe, maka itoe orang kampoeng samoeanja djadi soeka hati troes bajar bikin loenas dari dia orang poenja oetang, sasoedahnja
