144
Liauw Tjay.
Serta itoe anak prampoean dengar lantas ia djadi tertawa kerna ia lihat Siang Seng poenja pikiran seperti orang gila, di waktoe Siang Seng lagi bitjara sama itoe anak prampoean, samentara itoe dateng Ouw Sie Nio jang lantas ketemoeken ia poenja intji Ouw Sam Nio, sembari menanja: Intji seboet-seboet saja ada apa perkara?
Apa bila Ouw Sam Nio dengar adenja poenja pertanjaän, lantas ia djadi tertawa sembari berkata: Ini Siang Sioe Tjaij pikirannja amat gila sama ade, hareplah ade boleh toenggoe di sini sebentaran boeat temenin sama Siang Sioe Tjaij. Sahabis Ouw Sam Nio kata begitoe ia berangkat pergi. Sasoedahnja Ouw Sam Nio berlaloe dari sitoe, maka Siang Sioe Tjaij bersama Ouw Sie Nio mendjadi soeka hati lantas masing-masing keloearin dia poenja resia. Kerna Ouw Sie Nio lihat Siang Seng saorang jang baek, maka koetika itoe djoega Ouw Sie Nio lantas kasi tahoe pada Siang Seng demikian katanja: Sebetoel-betoelnja saja ini atsal siloeman rase boekannja manoesia, lantaran Sioe Tjaij pandang saja poenja roepa tjakap sampe Sioe Tjaij djatoh hati pada saja, djoega Sioe Tjaij djangan mendjadi mara, sebetoelnja saja poenja intji atsal siloeman lowak, selama ini dia soedah bikin djoesta sama manoesia hingga dia soedah boenoeh tiga orang laki-laki dan ia isep dara djantoeng hatinja orang itoe. Sebetoelnja saja lihat Sioe Tjaij amat tjinta dari itoe saja djoega tiada tega hati pada Sioe Tjaij kaloe sampe dapet ketjilakaän, baeklah sekarang Sioe Tjaij poenja pikiran lekas-lekas poetoesin sobat ande dengan saja poenja intji, soepaja djangan sampe saja poenja intji kena keniaja Sioe Tjaij poenja djiwa, sebab saja poenja intji boekannja manoesia, atsal siloeman lowak, kendatinja dia poenja boedi bahasa manis dan baek, djoega ia soeka boeat bikin soesah sama manoesia di dalem doenia.
Serta Siang Seng dengar Ouw Sie Nio poenja perkataän, lantas ia djadi ketakoetan sembari ia minta-minta akan Ouw Sie Nio poenja toeloengan.
Demikian djoega Ouw Sie Nio berkata: Saja kendatinja atsal siloeman rase peladjaran saja inget mendjadi dewa toelen. Nanti saja kasi satoe djimat soepaja Siang Sioe Tjaij boleh tempel di moeka pintoe, djikaloe Sioe Tjaij soedah tempel itoe djimat, intji saja dateng tentoe ia tiada brani keniaja Sioe Tjaij poenja djiwa. Sasoedahnja Ouw Sie Nio kata begitoe, lantas ia bikin satoe djimat jang mana ia lantas kasi pada Siang Seng, maka Siang Seng lantas tempel itoe djimat di moeka pintoe roemahnja. Tempo Ouw Sam Nio dateng di sitoe ia libat ada itoe djimat lantas ia moendoer kombali sembari berkata: Betoel saja poenja ade bikin djoesta sama saja, ia soedah dapet laki jang baroe, ia tiada inget sama soedara, dari itoe kaoe doea orang ada di dalem roemah dengan soeka hati bikin pelesiran sama satoe orang lelaki tjakap, djoega kita tiada maoe djadi berbantahan, melainkan kaoe poenja oentoeng sendiri. Sahabisnja Ouw Sam Nio kata begitoe, lantas ia berlaloe dari sitoe pergi ka lain tempat.
