— 1519 —
doedoekan sebagi kepala pamerenta? la tjoema poenja poetra satoe-satoenja, kaloe ada doea tiga anak dengen tiada banjak tjerewet tentoe Goan- swe poenja poetoesan begitoe lantas di trima."
Seabisnja kata begitoe Poet Hoa menangis, perboeatan mana di toeroet djoega oleh Ang Kokkioe.
„Pamerenta Tiong Goan ada sampe pertjaja pada kau poenja radja tapi sebaliknja radjamoe tiada bisa pegang pakerdja'an, berkepala batoe dan laen-laen lagi jang akoe tiada oesa seboetken di sini," kata Bong Loan. Angkau toch taoe, Tin Kok Ong soeda tangkep Ya Loet Tong dan di bikin sebagi orang tanggoengan, tapi kamodian radjamoe berdaja oepaja goenaken akal kedji, ambil poelang familienja, dan tempo soedaranja poelang, ia lantas terbitken pembrontakan poela. Baginda soeda djadi sanget poesing dengen tjaranja radjamoe poenja kebandelan; ini waktoe dalem segala perkara akoe moesti pegang kakerasan. Kaloe kau trima baek itoe tiga perminta'an akoe trima aken di bikin perdamian, sebaliknja kaloe tiada, akoe silaken kau poelang, madjoeken an- tero kau poenja pasoekan prang, boeat bertaroeng terlebi djaoe."
Kombali itoe doea orang berloetoet dan menangis, sabole-bole ia minta di bebasken itoe perminta'an jang katiga.
