— 1377 —
radja telah di adaken oedjian boeat tjari orang-orang gaga aken mengapalken pasoekan prang ka Oetara, maka bersama Tjeng Bwe akoe berpamitan sama Tio Siokhoe dan brangkat ka sana.
Dengen berkanja Toehan jang Maha moelia, dalem itoe oedjian akoe soeda beroentoeng bisa dapet reboet Goanswe-In.
Lu Kok Tjaij akoe taoe ada dorna besar dalem diwan karadja'an; ia soeda bitjaraken akoe poenja perdjodoan sama anaknja. Akoe trima baek ia poenja perminta'an. Dalem satoe perdjamoean itoe dorna jang terkoetoek soeda mengatjo, mengakoe jang ia soeda menggoenaken daja oepaja aken mengeniaja pada ajahkoe; sekarang haroes di kata sebenernja ajahkoe: tiada berdosa soeatoe apa. Song Si jang di bikin sebagi saksi dalem itoe perkara, jalah ada prentanja itoe dorna jang terkoetoek.
Sekarang akoe ada mengapalaken pasoekan prang aken tindes gerakannja Pak An Ong jang telah berontak poela dan soeda menjerang kota Gan Boen Kaon, atas berkanja ajahkoe harep sadja akoe bisa dapet kalaken moesoe, di mana sapoelangnja dari sana, baroe akoe nanti bikin peritoengan sama itoe doerna, serta sabisa-bisa akoe nanti angkat ajahkoe dari ini kasoesahan
