— 1339 —
Tjo Goanswe tiada berkata-kata lagi, hanja lantas geraken toembaknja menoesoek peroetnja Hoei Liong, hingga kaloe itoe panglima begal tiada bisa berlakoe sedikit sebet, tentoe djoega sendjata itoe aken menemboes sampe ka blakang.
Ka doea orang jang lantas bertempoer.
Sasoenggoenja Hoei Liong itoe ada sanget gaga, kerna Tjo Goanswe sendiri jang terkenal pande dalem ilmoe silat, merasa kewalahan aken bertempoer padanja.
Lima poeloe djoeroesan soeda berlaloe, tapi doea-doea masi tinggal tegoe, ia orang kaliatan masi sanggoep landjoetken itoe pertandingan sampe bebrapa poeloe djoeroesan poela. Tjo Goanswe pikir, kaloe dalem ini perklaian tiada di goenaken tipoe, nistjaja soeker aken dapet kamenangan.
Begitoelah sasoedanja bertempoer lagi kira-kira doea poeloe djoeroesan, koenjoeng-koenjoeng ia bikin sala sendjatanja, berbareng dengen itoe koedanja lantas di biloekin dan teroes lari.
„Ha, ha, ha, tiada sala sebagimana akoe doega!“ kata Hoei Liong sembari tertawa. „Sasoenggoenja angkau sanget brani mati, tiada ada poenja kepandean brani dateng ka mari!“
Hoei Liong sama sekali tiada doega kaloe dengen berboeat begitoe moesoenja ada menggoenaken tipoe, maka dengen tiada merasa kwatir
