— 1278 —
berbeda'an dengen laen-laen orang jang akoe soeda liat. Itoe orang jang sekarang soeda beroentoeng dapetken itoe pangkat besar, njatalah tiada meleset barang sedikit dari apa jang akoe telah doega.”
Boen Pa tertawa, kamodian ia menanja: „Apa kau bisa kasi ketrangan, begimana ada di tetepken dalem sasoeatoe oedjian jang di bikin di sini?”
„Akoe denger atoeran itoe ada di bikin 3 tingkat dari keada'an orang jang moesti toeroet ambil oedjian,” saoet Tiam Siauw Dji. Ka satoe, orang jang gaga pande atoer barisan, pikirannja tadjem dan laen-laen poela, baroe ada harepan boeat bisa dapet itoe pangkat Goanswe; ka doea, orang jang tjoema gaga sadja, tapi tiada ada poenja kepandean laen, orang itoe tjoema bisa dapet pangkat panglima biasa sadja; dan katiga, orang jang pande berpikir, bisa atoer daja oepaja di dalem peprangan, orang itoe ada harepan bisa mendjabat pakerdja'an Tjam Bouw atawa Koensoe.”
„Kaloe menoeroet sebagimana sobat ampoenja ketrangan, sasoenggoenja boekan perkara gampang bisa dapetken itoe pangkat besar, kerna terlebi doeloe kita moesti oendjoek berbagi-bagi kepandean,” kata Boen Pa kamodian. „Tapi sekarang akoe djadi ingin taoe, siapatah adanja itoe orang jang soeda dapet itoe pangkat Peng-Pak Taij Goanswe?”
