— 1271 —
„Menoesia-menoesia jang sematjem angkau ini, soenggoe sajang sekali Allah soeda kasi idoep begitoe lama!" kata poela itoe pemoeda, jang sekarang dengen pedangnja lantas tabas lehernja Lo Tji, hingga terpisa dari badannja. Ia menabas poela broentoen doea kali, di mana kombali soeda mengambil korban atas djiwanja itoe doea Niko.
Apa jang di perboeat oleh Tjo Kongtjoe njatalah ada satoe pembalesan jang sanget sampoerna. Itoe doea Niko soeda berboeat djahat pada dirinja Kou Kongtjoe, itoe semoea soeda dibales oleh Boen Pa sebagimana moestinja.
Lebi djaoe itoe orang moeda lantas koempoelken oempan api, njalakan itoe di deket pager, kamodian ia lantas toentoen tiga koedanja berlaloe dari itoe tempat.
Ia pergi belon lama, itoe api soeda menjala besar, bakar itoe bio sampe djadi laoetan api.
Di waktoe paginja baroe Tjo Kongtjoe sampe di roema penginepan, pengoeroes roema meninep poen djadi sanget girang koetika liat itoe orang moeda soeda dapetken kombali koedanja. Ia menghamperi membri slamet tapi dengen berkata: Kongtjoe beroentoeng soeda dapetken itoe koeda, tapi sekarang baroe ketaoean, akoe poen ada kailangan apa-apa........"
„Kau ilang apa?" menanja Tjo Kongtjoe sambil potong orang poenja bitjara. Brangkali kau kailangan bebrapa ekor babi?"
