— 1193 —
biar betoel, apa soeda terdjadi dengen kau poenja Siangkong?"
Atas ini pertanja'an Bauw Hian lantas toetoerken begimana soeda terdjadi dalem perdjalanan ka Kang Lam: ia kasi taoe, bermoela betoel Hok Tjoen soeda bli soetra-soetra dan didjoeal dengen kaoentoengan besar di Djin Ho, tapi kamoedian hal itoe djadi beroba dan dengen sadjelas-djelasnja ia bertaoeken, begimana Hok Tjoen soeda bli satoe nona dalem satoe roema hina di sana, dan begimana itoe nona soeda dipaksa dan tipoe begimana bisa dibawa sampe kemari. Lebi djaoe ia terangken, Hok Tjoen prenta padanja boeat ambil kandaran ka gedong Tin Kok Hoe dan minta djoega itoe perkara dipegang resia, dan laen-laen tjerita lagi.
„Oh, oh, begitoe matjem kelakoeannja itoe lelaki kedji!" treak Bauw Si dengen kelakoean sebagi orang kalap. Njatalah ia maoe bikin akoe djadi mati berdiri! Dengen tjaranja jang begitoe manis ia bilang padakoe maoe berdagang, akoe soeda kasi líma ratoes tail padanja, tapi itoe oewang boekan boeat berniaga, hanja diboeat bli prempoean gladak!"
Dji Hoa kaliatan betoel maranja, laen dari perkata'an di atas, djoega ia soeda menista dengen roepa-roepa perkataän kedji jang tiada pantes didenger.
