— 652 —
sampe di masa ini masi terpoedji orang. Dengen sasoenggoenja djoega perdjalanannja itoe gadis haroes diboeat toeladan oleh semoea orang prampoean, kerna boekan sadja kakajaan dan kamoeliaän soeda tida bisa roba ia poenja kasoetjian hati, malahan dengen itoe perboeatan jang brani ia soeda kedja nama sendiri dan nama orang-toeanja begitoe lama tinggal dihormat orang. Akoe poen, lantaran terkenang pada perdjalanannja jang poeti bersi, maka akoe toelis ia poenja gambar, soepaja siang dan malem ia boleh dijadi temenkoe di ini kamar.”
Soen Nio djadi bengong mendenger anaknja poenja tjerita, sedeng dalem hatinja ada berkata: „Ini boedak haroes diseboet satoe malaekat idoep! Kerna sablonnja akoe boeka moeloet, ia soeda dapet tebak lebi doeloe apa jang akoe hendak bilang. Sekarang, maskipoen akoe bitjara, tentoe tida bergoena, sebab itoe sedikit katerangan soeda tjoekoep boeat menjataken, begimana adanja ia poenja pikiran. Sabentar, apabila akoe soeda balik ka kamar sendiri, akoe nanti bilang teroes terang pada Hok Tjoen, lebi baek ia singkirken itoe harepan gila-gila, sebab maski begimana djoega, tentoe harepan itoe tida bisa kasampean.”
