— 631 —
,,Kabar apatah itoe? Dan dari manatah datengnja?" tanja Ko Siotjia jang merasa, boleh djadi djoega itoe kabar ada penting aken dirinja.
Itoe kabar dateng dari kota Radja," saoet Hok Tjoen, „dan ada berhoeboeng sama perkaranja Jo Toakoe, jang telah dapet taloekin moesoe di Se-Liang. Djoega dalem itoe warta ada ditoelis, dengen girang Baginda telah kaloearken firman boeat naeken pangkatnja Jo Toakoe ka tingkatan jang lebi tinggi."
Sambil berkata begitoe, ia kaloearken sagoeloeng soerat dari dalem tangan badjoenja, dan djalan menghampirken pada Ko Siotjia, boeat trimaken sendiri soerat itoe pada tangan si nona.
Tapi Tjheng Bwe, jang roepa-roepanja merasa roegi kaloe nonanja dideketin oleh itoe djedjaka edan, ia boeroe-boeroe lantas menjelak dan ambil soerat itoe dari tangannja Hok Tjoen.
Matanja ini djahanam djadi melotot, oleh kerna merasa amat mendongkol; dan tentoelah djoega ia soeda tjoebit pipinja itoe gadis jang kaliwatan amat, kaloe ia tida merasa maloe pada Ko Siotjia.
Tjheng Bwe lantas trimaken soerat itoe
