— 1087 —
Di sitoe Hok Tjoen djadi sanget girang, ia
menghamperi ka deket djendela sambil membri
hormat. Itoe nona tertawa seraja kaloearken tangannja jang pegang kipas dari selat djendela,
kamoedian seperti disengadja ia bikin djato itoe
kipas jang dipegangnja. Hok Tjoen boeroe-boeroe poengoet itoe dan jioemie beroelang-oelang,
samentara itoe nona seabisnja berboeat demikian
lantas berlaloe.
Hok Tjoen kailangan. Tapi saät itoe kadengeran swara kelotrakan dan pintoe lantas terboeka, dari mana kalialan sa-orang prempoean toea kaloear, Hok Tjoen kenali, orang itoe jang tadi bersama-sama itoe nona di dalem bio.
Siangkong, mana itoe kipas?" kata ini prempoean toea: ,,Dengen tiada disangadja baroesan nona kedja djato dan katanja kau jang poengoet, maka ia minta bibajar poelang.
,,Wah, tida bisa!" saoet Hok Tjoen sambil masoekin itoe kipas kadalem sakoenja: „Ini kipas ada barang jang berharga tjara begimana begitoe gampang akoe maoe seraken!"
-,,Segala kertas, apatah harganja!"
-,,Betoel begitoe. Tetapi akoe dapet itoe dari bidadari di kajangan, maka panteslah dipandang barang jang loear biasa. Dan bila maoe diambil poelang akoe tiada bisa kasi, katjoeali itoe bidadari sendiri jang dateng minta!"
