— 1036 —
Tapi ini rasa bingoeng begitoe lekas dapet disingkirken, kerna di sitoe Ko Siotjia dapet ingetan pada ia poenja sendjata Liong Bwe Kim, sendjata mana boleh di goenaken boeat menjerang moesoe di tempat jang sedikit djaoe. Sigra ia kaloearken itoe sendjata jang berbahaja dan bersedia djoega aken menjerang pada marika itoe. Begitoelah baroe sadja itoe kawanan pendjahat maoe naek ka atas praoe, anem toedjoe orang telah roeboe di tana, kerna Liong Bwe Kim poenja besi gaetan soeda dikasi kerdja dengen sampoerna.
„Tjiongwie Hengte, awas-awas!" berseroe sala satoe dari itoe kawanan orang jang boleh djadi ada kepalanja: „Itoe di atas praoe roepanja ada orang jang mempoenjai sendjata adjaib, kita poenja kawanan soeda roeboe bebrapa orang!"
Ini kawanan ketjoe njatalah semoea ada terdiri dari orang-orang jang brani, sebab kendatipoen liat bebrapa orang temennja soeda roeboe, tapi satoe bersatoe dengen goembira menjerang ka atas praoe. Beroentoeng Tjeng Bwe jang dibantoe oleh Bong Loan soeda kasi kerdja ia poenja sepasang roejoeng dengen bagoes, sampe itoe kawanan pendjahat kepaksa lari sipat koeping dengen bawa brapa orang temennja jang dapet loeka. Tjeng Bwe maoe kedjer marika itoe, tapi Bong Loan menjega, hingga kahendak ini tiada sampe kedjadian.
